ಕ್ರಿಕೆಟ್‌ನಲ್ಲಿ DLS ವಿಧಾನದ ಸಹ-ಸಂಶೋಧಕ ಫ್ರಾಂಕ್ ಡಕ್ವರ್ತ್ ನಿಧನ; DLS ಎಂದರೇನು?

ಇಂಗ್ಲೆಂಡ್‌ನ ಖ್ಯಾತ ಸಂಖ್ಯಾಶಾಸ್ತ್ರಜ್ಞ ಮತ್ತು ಕ್ರಿಕೆಟ್‌ನಲ್ಲಿನ ಡಕ್ವರ್ತ್-ಲೂಯಿಸ್-ಸ್ಟರ್ನ್ (ಡಿಎಲ್ಎಸ್) ವಿಧಾನದ ಸಂಶೋಧಕರಲ್ಲಿ ಒಬ್ಬರಾಗಿರುವ ಫ್ರಾಂಕ್ ಡಕ್ವರ್ತ್ ಅವರು ತಮ್ಮ 84ನೇ ವಯಸ್ಸಿನಲ್ಲಿ ನಿಧನರಾದರು ಎಂದು ವರದಿಯಾಗಿದೆ.

ESPNcricinfo.com ನಲ್ಲಿನ ವರದಿಯ ಪ್ರಕಾರ, ಫ್ರಾಂಕ್ ಡಕ್ವರ್ತ್ ಅವರು ಶುಕ್ರವಾರ, ಜೂನ್ 21ರಂದು ನಿಧನರಾಗಿದ್ದಾರೆ ಎಂದು ತಿಳಿಸಿದೆ.

ಫ್ರಾಂಕ್ ಡಕ್ವರ್ತ್ ಮತ್ತು ಸಹವರ್ತಿ ಸಂಖ್ಯಾಶಾಸ್ತ್ರಜ್ಞ ಟೋನಿ ಲೂಯಿಸ್ ರೂಪಿಸಿದ ಡಕ್ವರ್ತ್-ಲೂಯಿಸ್ ವಿಧಾನವನ್ನು ಮಳೆ-ಬಾಧಿತ ಕ್ರಿಕೆಟ್ ಪಂದ್ಯಗಳಲ್ಲಿ ಫಲಿತಾಂಶಗಳನ್ನು ನಿರ್ಧರಿಸಲು ಪರಿಚಯಿಸಲಾಯಿತು.

ಈ ವಿಧಾನವನ್ನು ಮೊದಲು 1997ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಬಳಸಲಾಯಿತು. ನಂತರ 2001ರಲ್ಲಿ ಮಳೆಯಿಂದ ಮೊಟಕುಗೊಳಿಸಿದ ಪಂದ್ಯಗಳಲ್ಲಿ ಪರಿಷ್ಕೃತ ಗುರಿಗಳನ್ನು ಹೊಂದಿಸಲು ಪ್ರಮಾಣಿತ ವಿಧಾನವಾಗಿ ಐಸಿಸಿಯಿಂದ ಔಪಚಾರಿಕವಾಗಿ ಅಳವಡಿಸಿಕೊಳ್ಳಲಾಯಿತು.

ಕ್ರಿಕೆಟ್‌ಗಾಗಿ ಡಕ್‌ವರ್ತ್-ಲೂಯಿಸ್ ವಿಧಾನದ ಸಹ-ಸಂಶೋಧಕ ಮತ್ತು ಹೆಚ್ಚು ಇಷ್ಟಪಡುವ ರಾಯಲ್ ಸ್ಟ್ಯಾಟಿಸ್ಟಿಕಲ್ ಸೊಸೈಟಿ (ಆರ್‌ಎಸ್‌ಎಸ್) ಸಹೋದ್ಯೋಗಿ ಫ್ರಾಂಕ್ ಡಕ್ವರ್ತ್ ಎಂಬಿಇ ಅವರ ನಿಧನದ ಬಗ್ಗೆ ತಿಳಿಸಲು ನಮಗೆ ತುಂಬಾ ದುಃಖವಾಗಿದೆ ಎಂದು ಎಕ್ಸ್ (ಟ್ವಿಟ್ಟರ್) ಖಾತೆಯಲ್ಲಿ ಬರೆದುಕೊಂಡಿದೆ.

ಆಸ್ಟ್ರೇಲಿಯಾದ ಸಂಖ್ಯಾಶಾಸ್ತ್ರಜ್ಞ ಸ್ಟೀವನ್ ಸ್ಟರ್ನ್ ಅವರು ಈ ವಿಧಾನದಲ್ಲಿ ಕೆಲವು ಮಾರ್ಪಾಡುಗಳನ್ನು ಮಾಡಿದರು. ಆ ಬಳಿಕ ಫ್ರಾಂಕ್ ಡಕ್ವರ್ತ್ ಮತ್ತು ಟೋನಿ ಲೂಯಿಸ್ ನಿವೃತ್ತಿಯ ನಂತರ ಈ ವಿಧಾನವನ್ನು ಡಕ್ವರ್ತ್-ಲೂಯಿಸ್-ಸ್ಟರ್ನ್ (ಡಿಎಲ್ಎಸ್) ವಿಧಾನ ಎಂದು ಮರುನಾಮಕರಣ ಮಾಡಲಾಯಿತು.

ಜೂನ್ 2010ರಲ್ಲಿ ಫ್ರಾಂಕ್ ಡಕ್ವರ್ತ್ ಮತ್ತು ಟೋನಿ ಲೂಯಿಸ್ ಇಬ್ಬರೂ ಎಂಬಿಇಗಳನ್ನು (ಮೆಂಬರ್ ಆಫ್ ದಿ ಆರ್ಡರ್ ಆಫ್ ದಿ ಬ್ರಿಟಿಷ್ ಎಂಪೈರ್) ಪಡೆದರು.

DLS ವಿಧಾನವು ಸಂಕೀರ್ಣವಾದ ಅಂಕಿಅಂಶಗಳ ವಿಶ್ಲೇಷಣೆಯನ್ನು ಆಧರಿಸಿದೆ. ಇದು ಉಳಿದಿರುವ ವಿಕೆಟ್‌ಗಳು ಮತ್ತು ಮುಗಿದುಹೋದ ಓವರ್‌ಗಳಂತಹ ಅನೇಕ ಅಂಶಗಳನ್ನು ಪರಿಗಣಿಸುತ್ತದೆ. ಎರಡನೇ ಇನ್ನಿಂಗ್ಸ್ ಬ್ಯಾಟಿಂಗ್ ಮಾಡುವ ತಂಡಕ್ಕೆ ಪರಿಷ್ಕೃತ ಗುರಿಯನ್ನು ನಿಗದಿಪಡಿಸುತ್ತದೆ.