15 ಕೋಟಿ ರೂಪಾಯಿ ವಂಚನೆ ಕೇಸ್ ದಾಖಲಿಸಿದ ಎಂಎಸ್ ಧೋನಿ; ಯಾರ ವಿರುದ್ಧ? ಏನು ಕಾರಣ?

ನಾಟಕೀಯ ಬೆಳವಣಿಗೆಯೊಂದರಲ್ಲಿ, ಭಾರತೀಯ ಕ್ರಿಕೆಟ್ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರು ಆರ್ಕಾ ಸ್ಪೋರ್ಟ್ಸ್ ಮತ್ತು ಮ್ಯಾನೇಜ್‌ಮೆಂಟ್ ಲಿಮಿಟೆಡ್‌ನ ಮಿಹಿರ್ ದಿವಾಕರ್ ಮತ್ತು ಸೌಮ್ಯಾ ವಿಶ್ವಾಶ್ ವಿರುದ್ಧ ಕಾನೂನು ಕ್ರಮ ಕೈಗೊಂಡಿದ್ದಾರೆ.

ರಾಂಚಿ ನ್ಯಾಯಾಲಯದಲ್ಲಿ ದಾಖಲಾಗಿರುವ ಪ್ರಕರಣವು 2017ರಲ್ಲಿ ಎಂಎಸ್ ಧೋನಿ ಮತ್ತು ಮಿಹಿರ್ ದಿವಾಕರ್ ನಡುವಿನ ಒಪ್ಪಂದದ ಸುತ್ತ ನಡೆದಿರುವ ವಿವಾದವಾಗಿದೆ.

ಧೋನಿ ಮತ್ತು ದಿವಾಕರ್ ಅವರು ಜಾಗತಿಕ ಕ್ರಿಕೆಟ್ ಅಕಾಡೆಮಿಯನ್ನು ಸ್ಥಾಪಿಸುವ ಗುರಿಯನ್ನು ಹೊಂದಿದ್ದರು. ಫ್ರಾಂಚೈಸಿ ಶುಲ್ಕ ಪಾವತಿ ಮತ್ತು ಲಾಭ ಹಂಚಿಕೆಯನ್ನು ಒಳಗೊಂಡಿರುವ ಒಪ್ಪಂದದ ನಿರ್ದಿಷ್ಟ ಷರತ್ತುಗಳನ್ನು ಪೂರೈಸಲು ಆರ್ಕಾ ಸ್ಪೋರ್ಟ್ಸ್ ವಿಫಲವಾಗಿದೆ ಎಂದು ಎಂಎಸ್ ಧೋನಿ ಆರೋಪಿಸಿದ್ದಾರೆ.

ಸಮಸ್ಯೆಯನ್ನು ಪರಿಹರಿಸಲು ಪದೇ ಪದೇ ಪ್ರಯತ್ನಿಸಿದರೂ ಮತ್ತು ಮಾಜಿ ಕ್ರಿಕೆಟಿಗ ಎಂಎಸ್ ಧೋನಿ ಅವರು ಅನೇಕ ಕಾನೂನು ನೋಟಿಸ್‌ಗಳನ್ನು ಕಳುಹಿಸಿದರೂ, ಒಪ್ಪಂದದಲ್ಲಿ ನಿಗದಿಪಡಿಸಿದ ಷರತ್ತುಗಳು ಈಡೇರಿಲ್ಲ ಎಂದು ಹೇಳಲಾಗಿದೆ.

ಅದರ ಪರಿಣಾಮವಾಗಿ, 2021ರ ಆಗಸ್ಟ್ 15ರಂದು ಎಂಎಸ್ ಧೋನಿ ಅವರು ಆರ್ಕಾ ಸ್ಪೋರ್ಟ್ಸ್ ಸಹಭಾಗಿತ್ವ ಹಕ್ಕನ್ನು ಹಿಂತೆಗೆದುಕೊಂಡರು. ಭಾರತದ ವಿಶ್ವಕಪ್ ವಿಜೇತ ನಾಯಕ ಧೋನಿ ಆರ್ಕಾ ಸ್ಪೋರ್ಟ್ಸ್‌ನ ವಂಚನೆ ಮತ್ತು ನೀತಿಯಿಂದಾಗಿ 15 ಕೋಟಿ ರೂಪಾಯಿಗಳಷ್ಟು ನಷ್ಟವನ್ನು ಅನುಭವಿಸಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ.

ಹೆಚ್ಚುವರಿಯಾಗಿ, ಧೋನಿ ಅವರ ಆಪ್ತ ಸ್ನೇಹಿತ ಸಿಮಂತ್ ಲೋಹಾನಿ ಅವರು ಆರ್ಕಾ ಸ್ಪೋರ್ಟ್ಸ್ ವಿರುದ್ಧ ಕಾನೂನು ಕ್ರಮದ ನಂತರ, ಮಿಹಿರ್ ದಿವಾಕರ್ ಅವರ ವಿರುದ್ಧ ಬೆದರಿಕೆ ಮತ್ತು ಮೌಖಿಕ ನಿಂದನೆಯನ್ನು ಆರೋಪಿಸಿದ್ದಾರೆ.

ಜೂನ್ 2023ರಲ್ಲಿ ಕ್ರಿಕೆಟ್ ಐಕಾನ್ ಎಂಎಸ್ ಧೋನಿ ಮೊಣಕಾಲಿನ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ವೈಯಕ್ತಿಕ ಕಾನೂನು ಸವಾಲುಗಳ ನಡುವೆಯೂ ಮುಂಬೈನ ಕೋಕಿಲಾಬೆನ್ ಆಸ್ಪತ್ರೆಯಲ್ಲಿ ಯಶಸ್ವಿಯಾಗಿ ನಡೆಸಲಾಗಿತ್ತು.

ಸದ್ಯ ಎಂಎಸ್ ಧೋನಿ ಅವರ ಚೇತರಿಕೆಯು ವ್ಯಾಪಕ ಚರ್ಚೆಯ ವಿಷಯವಾಯಿತು. ಬಹು ನಿರೀಕ್ಷಿತ 2024ರ ಐಪಿಎಲ್‌ನಲ್ಲಿ ಮತ್ತೆ ಮೈದಾನಕ್ಕಿಳಿಯುವ ಸೂಚನೆಯನ್ನು ನೀಡಿದ್ದಾರೆ.

ಹೆಲಿಕಾಪ್ಟರ್ ಶಾಟ್ ಸ್ಪೆಷಲಿಸ್ಟ್ ಧೋನಿ ಅವರು ರಾಂಚಿಯಲ್ಲಿ ಸಮಯ ಕಳೆಯುವುದರೊಂದಿಗೆ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದಕ್ಕೂ ಮುನ್ನ ಅವರು ವಿಂಟೇಜ್ ಕಾರುಗಳ ಬಗ್ಗೆ ತಮ್ಮ ಉತ್ಸಾಹ ತೋರ್ಪಡಿಸಿದರು ಮತ್ತು ಅಭಿಮಾನಿಗಳೊಂದಿಗೆ ನಿರಂತರ ಸಂಪರ್ಕ ಹೊಂದಿದ್ದರು.

ಗಮನ ಸೆಳೆಯುತ್ತಲೇ ಇದೆ ಎಂಎಸ್ ಧೋನಿಯ ಆಫ್ ಫೀಲ್ಡ್ ಜನ ಸಂಪರ್ಕ
ಇತ್ತೀಚೆಗೆ ದುಬೈನಿಂದ ಹಿಂದಿರುಗಿದ 42 ವರ್ಷದ ಎಂಎಸ್ ಧೋನಿ ತಮ್ಮ ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಹೊಸ ವರ್ಷದ ದಿನವನ್ನು ಆಚರಿಸಿದರು. ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಸಹ ಆಟಗಾರ ರಿಷಭ್ ಪಂತ್ ಕೂಡ ಜೊತೆಗಿದ್ದರು.

ಡಿಸೆಂಬರ್ 2022ರಲ್ಲಿ ಕಾರು ಅಪಘಾತದಲ್ಲಿ ಉಂಟಾದ ತೀವ್ರ ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ರಿಷಭ್ ಪಂತ್ ಅವರು ಡಿಸೆಂಬರ್ 19ರಂದು ಯುಎಇಯಲ್ಲಿ ನಡೆದ ಐಪಿಎಲ್ 2024ರ ಮಿನಿ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಪ್ರತಿನಿಧಿಸಿದರು.

ಐಪಿಎಲ್ ಮಿನಿ ಹರಾಜಿನ ಸಮಯದಲ್ಲಿ, ರಿಷಭ್ ಪಂತ್ ಅವರು ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮ್ಯಾನೇಜ್‌ಮೆಂಟ್‌ನೊಂದಿಗೆ ಕಾಣಿಸಿಕೊಂಡರು ಮತ್ತು ತಮ್ಮ ಚೇತರಿಕೆಯ ಪ್ರಗತಿಯನ್ನು ಸೂಚಿಸಿದರು.

ಇನ್ನು ಪ್ರೀತಿ-ಪಾತ್ರರ ಜೊತೆ ದುಬೈನಲ್ಲಿ ಕ್ರಿಸ್‌ಮಸ್ ಆಚರಿಸಿದ "ಕ್ಯಾಪ್ಟನ್ ಕೂಲ್' ಎಂಎಸ್ ಧೋನಿ, ವೈಯಕ್ತಿಕ ಚೇತರಿಕೆ ಮತ್ತು ಕಾನೂನು ಪ್ರಕ್ರಿಯೆಗಳೆರಡನ್ನೂ ಸಕ್ರಿಯವಾಗಿ ನಿರ್ವಹಿಸುತ್ತಿದ್ದಾರೆ. 2020ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರೂ, ಮೈದಾನದ ಒಳಗೆ ಮತ್ತು ಹೊರಗೆ ಸದಾ ಸುದ್ದಿಯಲ್ಲಿದ್ದಾರೆ.