ಮಧುಚಂದ್ರದ ಸಮಯದಲ್ಲಿ ನಿಮ್ಮ ಬೆನ್ನು ಹುಷಾರು; ಕ್ರಿಕೆಟಿಗ ದೀಪಕ್ ಚಹರ್‌ಗೆ ಸಹೋದರಿಯ ಸಲಹೆ!

ಟೀಮ್ ಇಂಡಿಯಾ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ವೇಗಿ ದೀಪಕ್ ಚಹರ್ ತಮ್ಮ ದೀರ್ಘಕಾಲದ ಗೆಳತಿ ಜಯಾ ಭಾರದ್ವಾಜ್ ಅವರನ್ನು ಜೂನ್ 1ರಂದು ಆಗ್ರಾದ ಖಾಸಗಿ ಹೋಟೆಲ್‌ನಲ್ಲಿ ಅದ್ಧೂರಿ ಸಮಾರಂಭದಲ್ಲಿ ವಿವಾಹವಾದರು.

ದೀಪಕ್ ಚಹರ್ ಮತ್ತು ಜಯಾ ಭಾರದ್ವಾಜ್ ವಿವಾಹವು ಹಳದಿ, ಸಂಗೀತ ಮತ್ತು ಮೆಹಂದಿ ಸಮಾರಂಭಗಳನ್ನು ಒಳಗೊಂಡ ಎರಡು ದಿನಗಳ ಅದ್ಧೂರಿ ಕಾರ್ಯಕ್ರಮವಾಗಿತ್ತು. ಆಗ್ರಾದ ಜೇಪೀ ಪ್ಯಾಲೇಸ್ ಹೋಟೆಲ್‌ನಲ್ಲಿ ಈ ಕಾರ್ಯಕ್ರಮ ನಡೆದಿದ್ದು, ಅವರ ಸೋದರ ಮತ್ತು ಟೀಂ ಇಂಡಿಯಾ ಕ್ರಿಕೆಟಿಗ ರಾಹುಲ್ ಚಹರ್ ಅವರು ಇತರ ಸ್ನೇಹಿತರು ಮತ್ತು ಕುಟುಂಬ ಸದಸ್ಯರೊಂದಿಗೆ ಭಾಗವಹಿಸಿದ್ದರು.

ಕುತೂಹಲಕಾರಿಯಾದ ಅಂಶವೆಂದರೆ ಐಪಿಎಲ್ ಆಟದ ಸಮಯದಲ್ಲಿ ಮಿಸ್ಟರಿ ಗರ್ಲ್ ಆಗಿ ಬೆಳಕಿಗೆ ಬಂದ ದೀಪಕ್ ಅವರ ಸಹೋದರಿ ನಟಿ ಮಾಲತಿ ಚಹರ್, ಐಪಿಎಲ್ 2022 ಅನ್ನು ತಪ್ಪಿಸಿಕೊಂಡಿರುವ ಮತ್ತು ಪ್ರಸ್ತುತ ಬೆನ್ನುನೋವಿನಿಂದ ಹೊರಗುಳಿದಿರುವ ಸಿಎಸ್‌ಕೆ ವೇಗಿಗೆ ಕಿರು ಸಲಹೆಯನ್ನು ನೀಡಿದ್ದಾರೆ.

ಈ ವರ್ಷದ ಕೊನೆಯಲ್ಲಿ ಆಸ್ಟ್ರೇಲಿಯಾದಲ್ಲಿ ನಡೆಯುವ ಐಸಿಸಿ ಟಿ20 ವಿಶ್ವಕಪ್ 2022 ಇರುವ ಕಾರಣ, ಮಾಲತಿ ಚಹರ್ ಅವರು ಸಹೋದರ ದೀಪಕ್‌ ಮತ್ತು ಜಯಾ ಭಾರದ್ವಾಜ್ ಮಧುಚಂದ್ರದ (ಹನಿಮೂನ್) ಸಮಯದಲ್ಲಿ ಬೆನ್ನನ್ನು ಹುಷಾರಾಗಿ ನೋಡಿಕೊಳ್ಳಿ ಎಂದು ಸಲಹೆ ನೀಡಿದರು.

"Ab ladki hui humari... ದೀಪಕ್ ಚಹರ್ ಮತ್ತು ಜಯಾ ಭಾರದ್ವಾಜ್‌ಗೆ ಮದುವೆಯ ಶುಭಾಶಯಗಳು, ದಯವಿಟ್ಟು ನಿಮ್ಮ ಹನಿಮೂನ್ ಸಮಯದಲ್ಲಿ ನಿಮ್ಮ ಬೆನ್ನನ್ನು ನೋಡಿಕೊಳ್ಳಿ. ನಿಮಗೆ ಮುಂದೆ ಟಿ20 ವಿಶ್ವಕಪ್ ಇದೆ," ಎಂದು Instagramನಲ್ಲಿ ತಮಾಷೆಯಾಗಿ ಪೋಸ್ಟ್ ಮಾಡಿದ್ದಾರೆ.

ವಿಶೇಷವೆಂದರೆ, ಮಾಡೆಲ್ ಆಗಿರುವ ಮಾಲತಿ ಶೀಘ್ರದಲ್ಲೇ ಬಾಲಿವುಡ್ ಚಿತ್ರವೊಂದರಲ್ಲಿ ನಟನೆಗೆ ಪಾದಾರ್ಪಣೆ ಮಾಡಲಿದ್ದಾರೆ. ಚಿತ್ರಕ್ಕೆ 'ಇಷ್ಕ್ ಪಶ್ಮಿನಾ' ಎಂದು ಹೆಸರಿಡಲಾಗಿದ್ದು, ಇದು ಪ್ರೇಮಕಥೆಯಾಗಿದೆ. ಚಲನಚಿತ್ರಗಳು ಮತ್ತು ಟಿವಿ ಶೋಗಳಾದ 'ದೇ ದೇ ಪ್ಯಾರ್ ದೇ', 'ವೆಲ್ಲಪಂತಿ' ಮತ್ತು 'ಎ.ಐ ಶಾ: ನನ್ನ ವರ್ಚುವಲ್ ಗೆಳತಿ'ಯಲ್ಲಿನ ಪಾತ್ರಗಳಿಗೆ ಹೆಸರುವಾಸಿಯಾದ ಭವಿನ್ ಭಾನುಶಾಲಿ ಕೂಡ ನಟಿಸಿದ್ದಾರೆ.

ಈ ಮಧ್ಯೆ, ಮದುವೆಯ ನಂತರ ದೀಪಕ್ ಚಹರ್ ಮತ್ತು ಜಯಾ ಭಾರದ್ವಾಜ್ ದೆಹಲಿಗೆ ಹಾರಿದರು. ಅಲ್ಲಿ ಅವರು ಜೂನ್ 3 ರಂದು (ಶುಕ್ರವಾರ) ಐಟಿಸಿ ಮೌರ್ಯ ಹೋಟೆಲ್‌ನಲ್ಲಿರುವ ಕಮಲ್ ಮಹಲ್‌ನಲ್ಲಿ ಆರತಕ್ಷತೆ ಪಾರ್ಟಿಯನ್ನು ಏರ್ಪಡಿಸಿದ್ದರು. ಈ ಸಂದರ್ಭದಲ್ಲಿ ಮಾಜಿ ಮತ್ತು ಪ್ರಸ್ತುತ ಸಿಎಸ್‌ಕೆ ತಾರೆಗಳಾದ ಸುರೇಶ್ ರೈನಾ, ರಾಬಿನ್ ಉತ್ತಪ್ಪ ಮತ್ತು ಪಿಯೂಶ್ ಚಾವ್ಲಾ ಆರತಕ್ಷತೆ ಸಮಾರಂಭದಲ್ಲಿ ಭಾಗವಹಿಸಿದ್ದರು.

ಸಿಎಸ್‌ಕೆ ನಾಯಕ ಎಂಎಸ್ ಧೋನಿ ಮತ್ತು ಭಾರತ ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಕೂಡ ಆರತಕ್ಷತೆ ಕೂಟದಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ಊಹಿಸಲಾಗಿತ್ತು. ಆದಾಗ್ಯೂ, ಇಬ್ಬರೂ ಕ್ರಿಕೆಟ್ ಸೂಪರ್‌ಸ್ಟಾರ್‌ಗಳು ಸಮಾರಂಭಕ್ಕೆ ಆಗಮಿಸಿದ್ದಾರೆಯೇ ಅಥವಾ ಇಲ್ಲವೇ ಎಂಬುದು ಇನ್ನೂ ತಿಳಿದಿಲ್ಲ.