ಏಕದಿನ ವಿಶ್ವಕಪ್ ತಂಡದಲ್ಲಿ ಸ್ಥಾನ ಸಿಗದಿದ್ದಾಗ ಸಂಜು ಸ್ಯಾಮ್ಸನ್‌ಗೆ ಧೈರ್ಯ ತುಂಬಿದ್ದ ರೋಹಿತ್ ಶರ್ಮಾ!

ಭಾರತ ಕ್ರಿಕೆಟ್‌ ತಂಡದಲ್ಲಿ ಪ್ರಸ್ತುತ ಇರುವ ಅತ್ಯಂತ ಪ್ರತಿಭಾನ್ವಿತ ಆಟಗಾರರಲ್ಲಿ ಸಂಜು ಸ್ಯಾಮ್ಸನ್ ಕೂಡ ಒಬ್ಬರು. ಭಾರತ ಕ್ರಿಕೆಟ್ ತಂಡದಿಂದ ಪದೇ ಪದೇ ಇವರನ್ನು ಕೈ ಬಿಡುವುದಕ್ಕೆ ಅಭಿಮಾನಿಗಳು ಕಿಡಿಕಾರುತ್ತಾರೆ.

ಸಂಜು ಸ್ಯಾಮ್ಸನ್‌ಗೆ ಟೀಮ್ ಇಂಡಿಯಾದಲ್ಲಿ ಅವರ ಕ್ಷಮತೆಗೆ ತಕ್ಕ ಅವಕಾಶ ಲಭಿಸುತ್ತಿಲ್ಲ ಎಂಬ ಕೊರಗು, ಅವರ ಅಭಿಮಾನಿಗಳಲ್ಲಿ ಇದೆ. ಸಂಜು 2015ರಲ್ಲಿ ಟಿ20 ಸ್ವರೂಪದಲ್ಲಿ ತಮ್ಮ ಮೊದಲ ಅಂತಾರಾಷ್ಟ್ರೀಯ ಪಂದ್ಯವನ್ನು ಆಡಿದ್ದರು.

ಆದರೆ ಮುಂದಿನ ಪಂದ್ಯವನ್ನು ಆಡಲು ಸಂಜು ಸ್ಯಾಮ್ಸನ್ ಐದು ವರ್ಷಗಳ ಕಾಲ ಕಾಯಬೇಕಾಯಿತು. ಇದೇ ಸಮಯದಲ್ಲಿ ಏಕದಿನ ಸ್ವರೂಪದಲ್ಲಿ ಅವರ ಚೊಚ್ಚಲ ಪಂದ್ಯವನ್ನು 2021ರಲ್ಲಿ ಮತ್ತು ಏಕದಿನ ಸ್ವರೂಪದಲ್ಲಿ ಅವರ ಪ್ರದರ್ಶನವು 2023ರ ವಿಶ್ವಕಪ್‌ವರೆಗೆ ಉತ್ತಮವಾಗಿತ್ತು.

ಆದರೂ, ಅವರು ಟೀಮ್ ಇಂಡಿಯಾದ ಏಕದಿನ ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆಯಲು ಸಾಧ್ಯವಾಗಲಿಲ್ಲ. ಆ ಬಳಿಕ ಆಸ್ಟ್ರೇಲಿಯಾ ವಿರುದ್ಧ ಆರಂಭವಾದ ಟಿ20 ಸರಣಿಯ ತಂಡದಲ್ಲಿ ಸಂಜು ಸ್ಯಾಮ್ಸನ್ ಹೆಸರನ್ನೂ ಸೇರಿಸಲಾಗಲಿಲ್ಲ. ಹೀಗಿರುವಾಗ ರೋಹಿತ್ ಶರ್ಮಾ ತನಗೆ ಹೇಗೆ ಬೆಂಬಲ ನೀಡಿದ್ದಾರೆ ಎಂದು ಸ್ವತಃ ಸಂಜು ಸ್ಯಾಮ್ಸನ್ ಬಹಿರಂಗಪಡಿಸಿದ್ದಾರೆ.

ಯೂಟ್ಯೂಬ್ ಚಾನೆಲ್‌ಗೆ ನೀಡಿದ ಸಂದರ್ಶನದಲ್ಲಿ ತಮ್ಮ ವೃತ್ತಿಜೀವನದಲ್ಲಿ ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಅವರಿಂದ ಪಡೆದ ಬೆಂಬಲದ ಕುರಿತು ಸಂಜು ಸ್ಯಾಮ್ಸನ್ ಮಾತನಾಡಿದ್ದಾರೆ. ರೋಹಿತ್ ಶರ್ಮಾ ಅವರು ನನ್ನೊಂದಿಗೆ ಬಂದು ಮಾತನಾಡಿರುವ ಮೊದಲ ವ್ಯಕ್ತಿ ಎಂದು ಹೇಳಿದರು.

"ಹೇ ಸಂಜು, ಹೇಗಿದ್ದೀಯಾ?. ಐಪಿಎಲ್‌ಲ್ಲಿ ನೀವು ಅದ್ಭುತವಾಗಿ ಆಡಿದ್ದೀರಿ, ಅಲ್ಲದೆ ನೀವು ಮುಂಬೈ ಇಂಡಿಯನ್ಸ್ ವಿರುದ್ಧ ಸಾಕಷ್ಟು ಸಿಕ್ಸರ್‌ಗಳನ್ನು ಬಾರಿಸಿದ್ದೀರಿ. ನೀವು ನಿಜವಾಗಿಯೂ ಚೆನ್ನಾಗಿ ಬ್ಯಾಟ್ ಮಾಡಿದ್ದೀರಿ ಎಂದರು. ಅವರು ನಿಜವಾಗಿಯೂ ನನಗೆ ಸಾಕಷ್ಟು ಬೆಂಬಲ ನೀಡಿದ್ದಾರೆ," ಎಂದು ಸಂಜು ಸ್ಯಾಮ್ಸನ್ ತಿಳಿಸಿದ್ದಾರೆ.

ಇದಲ್ಲದೆ, ಸಂಜು ಸ್ಯಾಮ್ಸನ್ ಅವರು ತಮ್ಮ ಸಂದರ್ಶನದಲ್ಲಿ, "ಜನರು ಅವರನ್ನು ತುಂಬಾ ದುರದೃಷ್ಟಕರ ಕ್ರಿಕೆಟಿಗ ಎಂದು ಕರೆಯುತ್ತಾರೆ. ಆದರೆ ನಾನು ದುರದೃಷ್ಟವಂತನಲ್ಲ, ನಾನು ಕ್ರಿಕೆಟ್‌ನಲ್ಲಿ ಇಂದಿನ ಸ್ಥಿತಿಗೆ ತಲುಪುವ ಬಗ್ಗೆ ನಾನು ಎಂದಿಗೂ ಯೋಚಿಸಿರಲಿಲ್ಲ," ಎಂದು ಹೇಳಿದ್ದಾರೆ.

ಸಂಜು ಸ್ಯಾಮ್ಸನ್ ತಮ್ಮ ಅಂತಾರಾಷ್ಟ್ರೀಯ ಟಿ20 ವೃತ್ತಿಜೀವನದಲ್ಲಿ 24 ಪಂದ್ಯಗಳನ್ನು ಆಡಿದ್ದಾರೆ ಮತ್ತು 374 ರನ್ ಗಳಿಸಿದ್ದಾರೆ. ಅಲ್ಲದೆ, ಏಕದಿನ ಸ್ವರೂಪದಲ್ಲಿ ಅವರು 12 ಇನ್ನಿಂಗ್ಸ್‌ಗಳಲ್ಲಿ 55.71ರ ಸರಾಸರಿಯಲ್ಲಿ 390 ರನ್ ಗಳಿಸಿದ್ದಾರೆ.

ಇನ್ನು ಐಪಿಎಲ್‌ನಲ್ಲಿ ಸಂಜು ಸ್ಯಾಮ್ಸನ್ ಅವರ ದಾಖಲೆಗಳನ್ನು ಗಮನಿಸಿದರೆ, ಅವರು ಇಲ್ಲಿಯವರೆಗೆ ಒಟ್ಟು 152 ಪಂದ್ಯಗಳನ್ನು ಆಡಿದ್ದಾರೆ ಮತ್ತು 3,888 ರನ್ ಬಾರಿಸಿದ್ದಾರೆ.

ಈ ಅವಧಿಯಲ್ಲಿ ಸಂಜು ಸ್ಯಾಮ್ಸನ್ ಹಲವು ಬಾರಿ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌ಗಳನ್ನು ಆಡಿದ್ದಾರೆ. ಅವರು ಕಳೆದ ಹಲವಾರು ವರ್ಷಗಳಿಂದ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಐಪಿಎಲ್‌ನಲ್ಲಿ ಮುನ್ನಡೆಸುತ್ತಿದ್ದಾರೆ ಮತ್ತು ಐಪಿಎಲ್ 2022ರಲ್ಲಿ ತಮ್ಮ ತಂಡವನ್ನು ಫೈನಲ್‌ಗೆ ಕರೆದೊಯ್ದಿದ್ದರು.