ವಿಶ್ವ ಬಾಡ್ಮಿಂಟನ್ ಚಾಂಪಿಯನ್ ಶಿಪ್ ನಿಂದ ಸೈನಾ ಹೊರಕ್ಕೆ!

ನಂಜಿಂಗ್, ಆಗಸ್ಟ್ 03: ಎರಡು ಬಾರಿ ಚಾಂಪಿಯನ್ ಸ್ಪೇನಿನ ಕರೋಲಿನಾ ಮರೀನ್ ವಿರುದ್ಧ ಸೋಲು ಕಾಣುವ ಮೂಲಕ ಭಾರತದ ಸೈನಾ ನೆಹ್ವಾಲ್ ಅವರು ವಿಶ್ವ ಬಾಡ್ಮಿಂಟನ್ ಚಾಂಪಿಯನ್ ಶಿಪ್ ನಿಂದ ಹೊರ ನಡೆದಿದ್ದಾರೆ. ಆದರೆ, 2009ರಿಂದ ಇಲ್ಲಿವರೆಗೆ ಎಂಟು ವರ್ಷಗಳಲ್ಲಿ ಎಲ್ಲಾ ಕ್ವಾರ್ಟರ್​ ಫೈನಲ್​ ತಲುಪುವ ಮೂಲಕ ದಾಖಲೆ ಬರೆದಿದ್ದಾರೆ.

ಶುಕ್ರವಾರ (ಆಗಸ್ಟ್ 03) ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ನೇರ ಸೆಟ್ ಗಳಲ್ಲಿ ಸೈನಾ ಪರಾಭವಗೊಂಡರು. ಒಲಿಂಪಿಕ್ ಚಾಂಪಿಯನ್ ಮರೀನ್ ಅವರು 21-6, 21-11ರಲ್ಲಿ ಗೆಲುವು ಕಂಡಿದ್ದಾರೆ.

'ವೇಗವಾಗಿ ಆಡುವುದು ನನ್ನ ಹೆಗ್ಗುರುತು, ಅದೇ ಬಲದ ಮೇಲೆ ಇಲ್ಲಿ ತನಕ ಬಂದಿದ್ದೇನೆ. ಟೂರ್ನಮೆಂಟ್ ನ ನೆಚ್ಚಿನ ಆಟಗಾರ್ತಿ ತಾಯ್ ತ್ಸು ಯಿಂಗ್ ಅವರು ಸೋಲು ಕಂಡಿದ್ದಾರೆ. ಹೀಗಾಗಿ, ಚೀನಾದ ಹೆ ಬಿಂಗ್ಜಿಯೋ ವಿರುದ್ಧ ಉತ್ತಮ ಆಟ ಪ್ರದರ್ಶಿಸುವ ವಿಶ್ವಾಸ ಹೊಂದಿದ್ದೇನೆ' ಎಂದು ಮರೀನ್ ಪ್ರತಿಕ್ರಿಯಿಸಿದ್ದಾರೆ.

ಪೊನ್ನಪ್ಪಗೆ ಸೋಲು: ಮಿಶ್ರ ಡಬಲ್ಸ್ ನಲ್ಲಿ ಸಾತ್ವಿಕ್ ಸಾಯಿರಾಜ್ ರಂಕಿರೆಡ್ಡಿ ಹಾಗೂ ಅಶ್ವಿನಿ ಪೊನ್ನಪ್ಪ ಅವರು ಎಂಟರ ಘಟ್ಟದ ಪಂದ್ಯದಲ್ಲಿ ಚೀನಾದ ಹ್ಯುಂಗ್ ಯುಕ್ಸಿಂಗ್ ಹಾಗೂ ಜೆಂಗ್ ಸಾಯಿಸಾಯಿ ವಿರುದ್ಧ 17-21, 10-21ರಲ್ಲಿ ಸೋಲು ಕಂಡರು.

ಪಿವಿ ಸಿಂಧು ಅವರು ಹಾಲಿ ಚಾಂಪಿಯನ್ ನೊಜೊಮಿ ಓಕುಹರಾ ಅವರ ವಿರುದ್ಧ ಶುಕ್ರವಾರ ಸಂಜೆ ಆಡಲಿದ್ದಾರೆ. ಸಾಯಿ ಪ್ರಣೀತ್ ಅವರು ಆರನೇ ಸೀಡೆಡ್ ಕೆಂಟೋ ಮೊಮೊಟೋ ವಿರುದ್ಧ ಸೆಣಸಲಿದ್ದಾರೆ.