ನನ್ನನ್ನು ತಂಡದಿಂದ ಹೊರದಬ್ಬಿದ್ದಾರೆ: ಕಣ್ಣೀರಿಟ್ಟ ಸ್ಫೋಟಕ ಬ್ಯಾಟ್ಸ್‌ಮನ್

ನಾನು ಸಂಪೂರ್ಣ ಫಿಟ್ ಇದ್ದೇನೆ

'ನನಗೆ ಯಾವ ಸಮಸ್ಯೆಯೂ ಇಲ್ಲ ಮತ್ತು ಗಾಯವೂ ಇಲ್ಲ. ನಾನು ಸಂಪೂರ್ಣವಾಗಿ ಫಿಟ್ ಆಗಿದ್ದೇನೆ. ಎಸಿಬಿ ಅಧಿಕಾರಿಗಳು ನನ್ನನ್ನು ಯಾವುದೇ ರೀತಿ ಸಂಪರ್ಕಿಸದೆಯೇ ಬಲವಂತವಾಗಿ ನನ್ನನ್ನು ತಂಡದಿಂದ ಹೊರಹಾಕಿದ್ದಾರೆ. ಮೊಣಕಾಲು ಗಾಯದಿಂದ ತಂಡದಿಂದ ಹೊರಹೋಗುತ್ತಿರುವುದಾಗಿ ಹೇಳಿದ್ದಾರೆ' ಎಂದು ಶಹಜಾದ್ ಮಾಧ್ಯಮಗಳಿಗೆ ಬಿಡುಗಡೆ ಮಾಡಿರುವ ಆಡಿಯೋ ಕ್ಲಿಪ್‌ನಲ್ಲಿ ನೋವಿನಿಂದ ಹೇಳಿಕೊಂಡಿದ್ದಾರೆ.

ಮೊದಲ ಎರಡು ಪಂದ್ಯ ಹೇಗೆ ಆಡುತ್ತಿದ್ದೆ?

'ನಾನು ಫಿಟ್ ಆಗಿರದೆ ಇದ್ದಿದ್ದರೆ ಮೊದಲ ಎರಡು ಪಂದ್ಯಗಳನ್ನು ಹೇಗೆ ಆಡಲು ಸಾಧ್ಯವಾಗುತ್ತಿತ್ತು? ಸ್ವಲ್ಪ ವಿಶ್ರಾಂತಿ ಪಡೆದುಕೊಂಡರೆ ನಾನು ಸಂಪೂರ್ಣವಾಗಿ ಚೇತರಿಸಿಕೊಳ್ಳುತ್ತೇನೆ ಎಂದು ಫಿಸಿಯೋ ಹೇಳಿದ್ದರು. ಇದ್ದಕ್ಕಿದ್ದಂತೆ ಟೂರ್ನಿಯಿಂದಲೇ ಹೊರಹಾಕಲಾಯಿತು. ಅಫ್ಘಾನಿಸ್ತಾನ ಕ್ರಿಕೆಟ್‌ಗೆ ನಾನು ಸಾಕಷ್ಟು ಶ್ರಮಿಸಿದ್ದೇನೆ. ಈಗ ಈ ರೀತಿ ನನಗೆ ಆಗಿದೆ' ಎಂದು ಅಲವತ್ತುಕೊಂಡಿದ್ದಾರೆ.

ನನ್ನ ಬ್ಯಾಟಿಂಗ್ ಶೈಲಿಯೇ ಹೀಗೆ

'ನಾನು ಅನ್‌ಫಿಟ್ ಆಗಿದ್ದೇನೆ. ಫುಟ್‌ವರ್ಕ್ ಇಲ್ಲದ ಕಾರಣ ಶಾಟ್‌ಗಳನ್ನು ಬಾರಿಸಲು ನನಗೆ ಸಾಧ್ಯವಾಗುತ್ತಿಲ್ಲ ಎಂದಿದ್ದಾರೆ. ಆದರೆ, ನನ್ನ ಬ್ಯಾಟಿಂಗ್ ಶೈಲಿಯೇ ಇದು. ನಾನು ಬ್ಯಾಟಿಂಗ್ ಮಾಡುವಾಗ ಹೆಚ್ಚು ಚಲಿಸುವುದಿಲ್ಲ. ಆದರೂ ರನ್ ಬಾರಿಸಿದ್ದೇನೆ' ಎಂದಿದ್ದಾರೆ.

ಐಸಿಸಿಗೆ ವೈದ್ಯಕೀಯ ವರದಿ

ಶಹಜಾದ್ ಅವರ ಆರೋಪವನ್ನು ತಳ್ಳಿ ಹಾಕಿರುವ ಎಸಿಬಿ ಅಧಿಕಾರಿಗಳು, 'ಐಸಿಸಿಗೆ ವೈದ್ಯಕೀಯ ವರದಿಯನ್ನು ಸಲ್ಲಿಸಿದ್ದೆವು. ಬಳಿಕವೇ ಐಸಿಸಿ ಅವರ ಬದಲಿ ಆಟಗಾರನನ್ನು ಸೇರಿಸಿಕೊಳ್ಳಲು ನಮಗೆ ಅವಕಾಶ ನೀಡಿತು. ಶಹಜಾದ್ ಸಂಪೂರ್ಣವಾಗಿ ಗಾಯಗೊಂಡಿದ್ದಾರೆ' ಎಂದಿದ್ದಾರೆ.