2020ರ ಐಪಿಎಲ್‌ಗೆ ಮತ್ತೊಂದು ಹಿನ್ನಡೆ, ಟೂರ್ನಿ ಆರಂಭ ವಿಳಂಬ ಸಾಧ್ಯತೆ!

13 ಮಂದಿಗೆ ಕೊರೊನಾ

ಸೆಪ್ಟೆಂಬರ್ 19ರಿಂದ ಆರಂಭವಾಗಲಿರುವ ಐಪಿಎಲ್‌ಗಾಗಿ ತಯಾರಿಯಲ್ಲಿದ್ದ ಇಬ್ಬರು ಆಟಗಾರರು ಸೇರಿ ಒಟ್ಟು 13 ಮಂದಿಗೆ ಈಗಾಗಲೇ ಕೊರೊನಾ ಸೋಂಕು ತಗುಲಿರುವುದು ವರದಿಯಾಗಿದೆ. ಚೆನ್ನೈ ಸೂಪರ್ ಕಿಂಗ್ಸ್ ಆಟಗಾರರಾದ ದೀಪಕ್ ಚಹಾರ್ ಮತ್ತು ರುತುರಾಜ್ ಗಾಯಕ್ವಾಡ್‌ಗೆ ಕೊರೊನಾ ಪಾಸಿಟಿವ್ ಬಂದಿತ್ತು.

ಕೋವಿಡ್ 19 ಪರೀಕ್ಷೆ

'ಆಗಸ್ಟ್ 31ರಂದು ಯುಎಇಗೆ ತಲುಪುವಂತೆ ತನ್ನ ಸಿಬ್ಬಂದಿಗಳಿಗೆ ಸ್ಟಾರ್ ಹೇಳಿತ್ತು. ಕೊರೊನಾ ಪರೀಕ್ಷೆಯ ಬಳಿಕವೇ ಯುಎಇಗೆ ಹೊರಡುವಂತೆ ತಿಳಿಸಲಾಗಿದ್ದರಿಂದ ಪ್ರಸಾರಕದ ಮಾರ್ಗಸೂಚಿಯಂತೆ ಶನಿವಾರ ಕೋವಿಡ್ 19 ಪರೀಕ್ಷೆ ನಡೆಸಲಾಗಿತ್ತು,' ಎಂದು ಮೂಲವೊಂದು ಐಎಎನ್‌ಎಸ್‌ಗೆ ಹೇಳಿದೆ.

ವಿಮಾನಯಾನ ರದ್ದು

'ಕೊರೊನಾ ಪರೀಕ್ಷೆ ನಡೆಸಿದವರಲ್ಲಿ ಒಬ್ಬರಿಗೆ ಕೊರೊನಾವೈರಸ್ ಸೋಂಕು ಪಾಸಿಟಿವ್ ಬಂದಿದೆ. ಈ ವಿಚಾರ ತಿಳಿದ ತಕ್ಷಣ ಪ್ರಸಾರಕ ಎಲ್ಲಾ ಸಿಬ್ಬಂದಿಗಳಿಗೆ ಮತ್ತೊಂದು ಸೂಚನೆ ಕಳುಹಿಸಿ, ಆಗಸ್ಟ್ 31ರಂದು ಯುಎಇಗೆ ಹೊರಡಲಿದ್ದ ವಿಮಾನಯಾವನ್ನು ಮುಂದೂಡಲು ಹೇಳಿದೆ,' ಎಂದು ಅದೇ ಮೂಲ ಮಾಹಿತಿ ನೀಡಿದೆ.

ಸಮಸ್ಯೆಯಲ್ಲಿ ಸಿಎಸ್‌ಕೆ

ಈ ಮೊದಲು ಕೊರೊನಾ ತಗುಲಿದ್ದ 13 ಮಂದಿಯೂ ಸಿಎಸ್‌ಕೆಯವರಾಗಿದ್ದರು. ಇಬ್ಬರು ಆಟಗಾರರ ಜೊತೆ 11 ಸಿಬ್ಬಂದಿಗಳು ಕೋವಿಡ್‌ 19ಗೆ ಈಡಾಗಿದ್ದರು. ಇದರ ಜೊತೆಗೆ ಸಿಎಸ್‌ಕೆ ಆಟಗಾರ ಸುರೇಶ್ ರೈನಾ ಫ್ರಾಂಚೈಸಿ ಜೊತೆಗಿನ ಮನಸ್ತಾಪದಿಂದಾಗಿ ಟೂರ್ನಿಯಿಂದಲೇ ದೂರ ಉಳಿಯಲಿದ್ದಾರೆ ಎನ್ನಲಾಗುತ್ತಿದೆ. ಈ ಎಲ್ಲಾ ಸಮಸ್ಯೆಗಳಿಂದಾಗಿ ಐಪಿಎಲ್‌ ಆರಂಭಿಕ ಪಂದ್ಯದಲ್ಲಿ ಸಿಎಸ್‌ಕೆ ಬದಲು ಎಂಐ-ಆರ್‌ಸಿಬಿ ಕಾದಾಡಲಿದೆ ಎನ್ನುವ ಮಾತುಗಳೂ ಕ್ರಿಕೆಟ್ ವಲಯದಲ್ಲಿ ಹರಿದಾಡುತ್ತಿದೆ.