ಕೋಪದಲ್ಲಿ ಯಾಮಾರಿ ಕೈ ಮುರಿದುಕೊಂಡ ಆಸ್ಟ್ರೇಲಿಯಾ ಆಲ್ ರೌಂಡರ್!

ಸಿಡ್ನಿ, ಅಕ್ಟೋಬರ್ 15: 'ಕೋಪದಲ್ಲಿ ಕುಯ್ದುಕೊಂಡ ಮೂಗು ಮತ್ತೆ ಬಾರದು' ಅನ್ನೋ ಗಾದೆ ಸಾಲು ಆಸ್ಟ್ರೇಲಿಯಾದ ಆಲ್ ರೌಂಡರ್‌ ಮಿಚೆಲ್ ಮಾರ್ಷ್ ಪಾಲಿಗೆ ಸದ್ಯಕ್ಕಂತೂ ಸೂಕ್ತವೆನಿಸಿದೆ. ಕೋಪ, ಹತಾಶೆಗೆ ಒಳಗಾಗಿ ಮಾರ್ಷ್ ತನ್ನ ಕೈಯನ್ನೇ ಮುರಿದುಕೊಂಡು ಪ್ರಮುಖ ಸರಣಿಯೊಂದರಿಂದ ಹೊರಬಿದ್ದಿದ್ದಾರೆ.

ಆಸ್ಟ್ರೇಲಿಯಾ ದೇಸಿ ಕ್ರಿಕೆಟ್ ಟೂರ್ನಿ 'ಶೆಫೀಲ್ಡ್ ಶೀಲ್ಡ್'ನ ಪಂದ್ಯದ ವೇಳೆ ಹತಾಶೆಗೊಳಗಾದ ಮಿಚೆಲ್ ಮಾರ್ಚ್, ಡ್ರೆಸ್ಸಿಂಗ್ ರೂಮ್‌ನಲ್ಲಿ ತನ್ನ ಬೌಲಿಂಗ್ ಕೈಯನ್ನು ಗೋಡೆಗೆ ಗುದ್ದಿಕೊಂಡು ಮುರಿದುಕೊಂಡಿದ್ದಾರೆ. ಹೀಗಾಗಿ ಪಾಕಿಸ್ತಾನ ವಿರುದ್ಧದ 2 ಪಂದ್ಯಗಳ ಟೆಸ್ಟ್ ಸರಣಿಯಿಂದ ಮಾರ್ಚ್ ತಾನೇ ಹೊರ ನಡೆದಂತಾಗಿದೆ.

ಪಾಕಿಸ್ತಾನ ವಿರುದ್ಧದ ಟೆಸ್ಟ್‌ ಸರಣಿಗೆ ಆಸೀಸ್ ತಂಡದಲ್ಲಿ 27ರ ಹರೆಯದ ಮಾರ್ಚ್ ಕೂಡ ಹೆಸರಿಸಲ್ಪಟ್ಟಿದ್ದರು. ಆದರೆ ಶೆಫೀಲ್ಡ್ ಶೀಲ್ಡ್ ಟೂರ್ನಿಯ ವೆಸ್ಟರ್ನ್ ಆಸ್ಟ್ರೇಲಿಯಾ ಮತ್ತು ಟ್ಯಾಸ್ಮೆನಿಯಾ ನಡುವಿನ ಪಂದ್ಯದ ವೇಳೆ ಹತಾಶೆಯಿಂದ ಮಾರ್ಷ್ ಕೈ ಮುರಿದುಕೊಂಡಿದ್ದಾರೆ. ಈ ಪಂದ್ಯ ಡ್ರಾ ಎನಿಸಿತ್ತು.

'ನೀನೊಬ್ಬ ಮೂರ್ಖ ಎಂದು ಆಸ್ಟ್ರೇಲಿಯಾ ಕೋಚ್ ಜಸ್ಟಿನ್ ಲ್ಯಾಂಗರ್ ನನ್ನಲ್ಲಿ ಹೇಳಿದರು. ಅವರಿಗೆ ನನ್ನ ವರ್ತನೆಯಿಂದ ನಿರಾಶೆಯಾಗಿದೆ,' ಎಂದು ಮಾರ್ಷ್ ಕ್ರಿಕೆಟ್‌ ಡಾಟ್ ಕಾಮ್ ಡಾಟ್ ಯುಗೆ ಪ್ರತಿಕ್ರಿಯಿಸಿದ್ದಾರೆ. ಪಾಕಿಸ್ತಾನ ವಿರುದ್ಧದ ಟೆಸ್ಟ್ ಸರಣಿ ನವೆಂಬರ್ 21ರಿಂದ ಬ್ರಿಸ್ಬೇನ್‌ನಲ್ಲಿ ಆರಂಭವಾಗಲಿದೆ.