ಮ್ಯಾಥ್ಯೂ ವೇಡ್-ರಿಷಭ್ ಪಂತ್ ಮಧ್ಯೆ ಬಿಸಿ ಬಿಸಿ ಸಂಭಾಷಣೆ: ವಿಡಿಯೋಗಳು

ವೇಡ್ ಉರಿಸಿದ ಪಂತ್

ಮ್ಯಾಥ್ಯೂ ವೇಡ್ ಅವರು ಸ್ಟ್ರೈಕ್‌ನಲ್ಲಿದ್ದಾಗ ಕೀಪಿಂಗ್ ಮಾಡುತ್ತಿದ್ದ ಪಂತ್, 'ಹೆ ಹ್ಹೆ ಹ್ಹೆ.. ಕಮಾನ್ ಬಾಯ್ಸ್' ಅಂತೆಲ್ಲ ಕಿರುಚುತ್ತ ಬ್ಯಾಟಿಂಗ್‌ ತಂಡವನ್ನು ಕಿಚಾಯಿಸುತ್ತಿದ್ದರು. ಪಂತ್‌ ಅವರ ಈ ವರ್ತನೆ ಇದೇ ಮೊದಲಲ್ಲ. ಇಂಗ್ಲೆಂಡ್, ಆಸ್ಟ್ರೇಲಿಯಾ, ಪಾಕಿಸ್ತಾನ, ವೆಸ್ಟ್ ಇಂಡೀಸ್ ಇಂಥ ಪ್ರಮುಖ ತಂಡಗಳ ವಿರುದ್ಧ ಪಂದ್ಯಗಳಿದ್ದಾಗ ಪಂತ್ ವಿಕೆಟ್ ಕೀಪಿಂಗ್ ಮಧ್ಯೆ ಎದುರಾಳಿಗೆ ಕಿರಿ ಕಿರಿ ಅನ್ನಿಸುವ ಮಟ್ಟಿಗೆ ಹೀಗೆ ಮಾತನಾಡುತ್ತಿರುತ್ತಾರೆ.

ಉರಿದು ಪ್ರತಿಕ್ರಿಯಿಸಿದ ವೇಡ್

ಪಂತ್ ಆಟದ ಮಧ್ಯೆ ಆಗಾಗ ಹೆ ಹ್ಹೆ ಹ್ಹೆ ಅಂತ ನಗೋದು, ತಂಡದ ಆಟಗಾರರಿಗೆ ಶಹಭಾಶ್ ಹೇಳೋದು ನಡೆಯುತ್ತಲೇ ಇದ್ದಿದ್ದರಿಂದ ಬ್ಯಾಟಿಂಗ್‌ ಮಾಡುತ್ತಿದ್ದ ವೇಡ್‌ಗೆ ಉರಿದು ಹೋಯಿತು ಅನ್ನಿಸುತ್ತೆ. ಬ್ಯಾಟಿಂಗ್‌ ಮಾಡುತ್ತಲೇ, 'ಹೆ ಹ್ಹೆ ಹ್ಹೆ.. ನಿನ್ನ ದೊಡ್ಡ ಮುಖ ಸ್ಟ್ರೀನ್‌ನಲ್ಲಿ ನೋಡಿದೆ ಅನ್ಸುತ್ತೆ. ಅದಕ್ಕೆ ನೀನು ನಗಾಡುತ್ತಿದ್ದೀಯ,' ಅಂತ ಪ್ರತಿಕ್ರಿಯಿಸಿದ್ದಾರೆ. ಪಂತ್-ವೇಡ್ ನಡುವಿನ ಸಂಭಾಷಣೆ ಸ್ಟಂಪ್‌ ಮೈಕ್‌ನಲ್ಲಿ ಸೆರೆಯಾಗಿದೆ.

ಪಂತ್-ವೇಡ್ ಎದುರುಬದುರು

ಬ್ಯಾಟಿಂಗ್‌ ಮಾಡುತ್ತಿದ್ದ ವೇಡ್ ಮತ್ತು ಕೀಪಿಂಗ್ ಮಾಡುತ್ತಿದ್ದ ಪಂತ್ ಮಧ್ಯೆ ಮಾತು ಅಲ್ಲದೆ, ಮೌನವಾಗಿಯೇ ಬಿಸಿಬಿಸಿ ಸಂಭಾಷಣೆಗಳು ನಡೆಯುತ್ತಲೇ ಇತ್ತು. ಬ್ಯಾಟಿಂಗ್‌ ಮಾಡುತ್ತ ವೇಡ್ ಅವರು ಶಾಟ್‌ಗೆ ಯತ್ನಿಸಿ ಪಂತ್ ಅವರ ಸಮೀಪಕ್ಕೆ ಬಂದಿದ್ದ ಚಿತ್ರ-ವಿಡಿಯೋಗಳೂ ಸಾಮಾಜಿಕ ಜಾಲತಾಣದಲ್ಲಿ ಓಡಾಡುತ್ತಿದೆ. ರವೀಂದ್ರ ಜಡೇಜಾ ಅವರ 43.6ನೇ ಓವರ್‌ನಲ್ಲಿ ವೇಡ್ ಎಲ್‌ಬಿಡಬ್ಲ್ಯೂ ಆಗಿ 40 ರನ್‌ಗೆ ನಿರ್ಗಮಿಸಿದ ಬಳಿಕ ಪಂತ್-ವೇಡ್ ನಡುವಿನ ಸಂಭಾಷಣೆ ಕೊನೆಗೊಂಡಿತು.