IPL Auction: ದುಬೈನಲ್ಲಿ ಐಪಿಎಲ್ ಮಿನಿ ಹರಾಜು ಅಧಿಕೃತಗೊಳಿಸಿದ ಬಿಸಿಸಿಐ; ನೀವು ತಿಳಿದುಕೊಳ್ಳಬೇಕಾದ ಅಂಶಗಳಿವು!

ಇಂಡಿಯನ್ ಪ್ರೀಮಿಯರ್ ಲೀಗ್ 2024ರ ಆವೃತ್ತಿಗಾಗಿ ಕಿರು ಹರಾಜು ಪ್ರಕ್ರಿಯೆ ಡಿಸೆಂಬರ್ 19ರಂದು ದುಬೈನಲ್ಲಿ ನಡೆಯಲಿದೆ ಎಂದು ಭಾರತೀಯ ಕ್ರಿಕೆಟ್ ಮಂಡಳಿ (ಬಿಸಿಸಿಐ) ಭಾನುವಾರ, ಡಿಸೆಂಬರ್ 3ರಂದು ಅಧಿಕೃತಗೊಳಿಸಿದೆ. ಇದು ವಿದೇಶದಲ್ಲಿ ಮೊದಲ ಬಾರಿಗೆ ಹರಾಜು ನಡೆಯುತ್ತಿರುವ ಪ್ರಸಂಗವಾಗಿದೆ.

ಒಟ್ಟು 1166 ಆಟಗಾರರು ಮಿನಿ ಹರಾಜಿಗೆ ನೋಂದಾಯಿಸಿಕೊಂಡಿದ್ದಾರೆ. ಇದು ಮುಂದಿನ ವರ್ಷದ ಮೆಗಾ ಹರಾಜಿಗೆ ಮೊದಲು ಕೊನೆಯ ಕಿರು ಹರಾಜಾಗಿದೆ ಎಂದು ಪಿಟಿಐ ಸುದ್ದಿ ಸಂಸ್ಥೆ ತಿಳಿಸಿದೆ. ಒಟ್ಟು 77 ಸ್ಲಾಟ್‌ಗಳು ಖಾಲಿ ಉಳಿದಿವೆ ಮತ್ತು ಅವುಗಳಲ್ಲಿ 30 ಸಾಗರೋತ್ತರ ಆಟಗಾರರಿಗೆ ಮೀಸಲಿವೆ. ಎಲ್ಲಾ 10 ತಂಡಗಳ ಬಳಿ 262.95 ಕೋಟಿ ರೂ. ಪರ್ಸ್ ಮೌಲ್ಯವಿದೆ.

ಟ್ರಾವಿಸ್ ಹೆಡ್, ಪ್ಯಾಟ್ ಕಮಿನ್ಸ್ ಮತ್ತು ಮಿಚೆಲ್ ಸ್ಟಾರ್ಕ್ ಸೇರಿದಂತೆ ವಿಶ್ವಕಪ್ ವಿಜೇತ ಆಸ್ಟ್ರೇಲಿಯಾದ ತಾರೆಗಳು ಮಿನಿ ಹರಾಜಿನ ಭಾಗವಾಗಲಿದ್ದಾರೆ. ಈ ಮೂವರೂ ತಮ್ಮ ಮೂಲ ಬೆಲೆಯನ್ನು 2 ಕೋಟಿ ರೂಪಾಯಿಗೆ ನಿಗದಿಪಡಿಸಿದ್ದಾರೆ.

ಏಕದಿನ ವಿಶ್ವಕಪ್‌ನಲ್ಲಿ ನ್ಯೂಜಿಲೆಂಡ್ ಪರ ಹೆಚ್ಚು ರನ್ ಗಳಿಸಿದ ಯುವ ಆಲ್‌ರೌಂಡರ್ ರಚಿನ್ ರವೀಂದ್ರ 50 ಲಕ್ಷ ರೂಪಾಯಿಗೆ ತಮ್ಮ ಮೂಲ ಬೆಲೆಗೆ ಲಭ್ಯವಾಗಲಿದ್ದಾರೆ.

ರಚಿನ್ ರವೀಂದ್ರ ಅವರು 2023ರ ಏಕದಿನ ವಿಶ್ವಕಪ್‌ನಲ್ಲಿ ತಮ್ಮ ಅತ್ಯುತ್ತಮ ಪ್ರದರ್ಶನದೊಂದಿಗೆ ಎಲ್ಲ ಐಪಿಎಲ್ ಫ್ರಾಂಚೈಸಿಗಳ ಗಮನ ಸೆಳೆದಿದ್ದಾರೆ, 10 ಪಂದ್ಯಗಳಲ್ಲಿ 543 ರನ್ ಮತ್ತು 5 ವಿಕೆಟ್ ಪಡೆದರು.

ಐಪಿಎಲ್ ಸಂಘಟನಾ ಸಮಿತಿಯು ಆಟಗಾರರ ಪಟ್ಟಿಯನ್ನು ಟ್ರಿಮ್ ಮಾಡುತ್ತದೆ ಮತ್ತು ಮುಂಬರುವ ದಿನಗಳಲ್ಲಿ ಹರಾಜಿನಲ್ಲಿ ಲಭ್ಯವಿರುವ ಆಟಗಾರರ ಶಾರ್ಟ್‌ಲಿಸ್ಟ್ ಅನ್ನು ಹಂಚಿಕೊಳ್ಳುತ್ತದೆ.

ಗಮನಾರ್ಹವಾಗಿ, ಆಟಗಾರರನ್ನು ಉಳಿಸಿಕೊಂಡ ಪಟ್ಟಿಯನ್ನು ನೀಡಲು ನವೆಂಬರ್ 26ರ ಗಡುವು ನೀಡಲಾಗಿತ್ತು. ತಂಡಗಳು ಕೆಲವು ಆಟಗಾರರನ್ನು ಬಿಡುಗಡೆ ಮಾಡಿವೆ. ಟ್ರೇಡ್ ವಿಂಡೋ ಇನ್ನೂ ತೆರೆದಿದ್ದು ಮತ್ತು ಮಿನಿ ಹರಾಜಿನ ಒಂದು ವಾರದ ಮೊದಲು ಡಿಸೆಂಬರ್ 12ರಂದು ಕೊನೆಗಳ್ಳಲಿದೆ.

ಐಪಿಎಲ್ 2022ರಲ್ಲಿ ಗುಜರಾತ್ ಟೈಟನ್ಸ್ ತಂಡವು ಚಾಂಪಿಯನ್ ಪಟ್ಟಕ್ಕೇರಿಸಿದ ಮತ್ತು 2023ರಲ್ಲಿ ತಂಡವನ್ನು ಫೈನಲ್‌ಗೆ ಕರೆದೊಯ್ದ ಹಾರ್ದಿಕ್ ಪಾಂಡ್ಯ ಎಲ್ಲಾ ನಗದು ವ್ಯಾಪಾರದಲ್ಲಿ ಮುಂಬೈ ಇಂಡಿಯನ್ಸ್‌ಗೆ ಮರಳಿದರು. ಇದು ಟ್ರೇಡಿಂಗ್ ವಿಂಡೋ ಲೀಗ್‌ನಲ್ಲಿ ಅತ್ಯಂತ ಐತಿಹಾಸಿಕ ವರ್ಗಾವಣೆ ಎನಿಸಿತು.

ಮುಂಬೈ ಇಂಡಿಯನ್ಸ್ ಸಹ ಆಸ್ಟ್ರೇಲಿಯಾದ ಆಲ್‌ರೌಂಡರ್ ಕ್ಯಾಮರೂನ್ ಗ್ರೀನ್ ಅವರನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡಕ್ಕೆ ವ್ಯಾಪಾರ ಮಾಡಿತು. ನವೆಂಬರ್ 26ರ ಗಡುವಿನ ದಿನದಂದು ಎಲ್ಲ ಹತ್ತು ತಂಡಗಳು ಒಟ್ಟು 173 ಆಟಗಾರರನ್ನು ಉಳಿಸಿಕೊಂಡಿವೆ.

ಹಾರ್ದಿಕ್ ಪಾಂಡ್ಯ ವ್ಯಾಪಾರದ ಪರಿಣಾಮವಾಗಿ, ಗುಜರಾತ್ ಟೈಟನ್ಸ್ ಗರಿಷ್ಠ 38.15 ಕೋಟಿ ರೂಪಾಯಿಗಳೊಂದಿಗೆ ಹರಾಜಿಗೆ ಹೋಗಲಿದೆ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ದೆಹಲಿ ಕ್ಯಾಪಿಟಲ್ಸ್ ಕ್ರಮವಾಗಿ 31.4 ಕೋಟಿ ರೂಪಾಯಿ ಮತ್ತು 28.95 ಕೋಟಿ ರೂಪಾಯಿಗಳನ್ನು ಹೊಂದಿದೆ.