ಹೆಚ್ಚಾಯ್ತು ಲೀಗ್‌ ಕ್ರಿಕೆಟ್‌ನ ಅಬ್ಬರ: ಬಿಸಿಸಿಐಗೆ ನಿದ್ದೆಗೆಡಿಸಿದೆ ಐಪಿಎಲ್ ಫ್ರಾಂಚೈಸಿಗಳ ಈ ನಡೆ!

ಬಿಸಿಸಿಐ ಕಳವಳಕ್ಕೆ ಕಾರಣ

ಐಪಿಎಲ್ ಫ್ರಾಂಚೈಸಿಗಳ ಮಾಲೀಕರು ಇತ್ತೀಚೆಗೆ ವಿದೇಶಿ ಲೀಗ್‌ಗಳ ಕಡೆಗೆ ಒಲವು ವ್ಯಕ್ತಪಡಿಸುತ್ತಿದ್ದಾರೆ. ವಿದೇಶಿ ಲೀಗ್‌ಗಳಲ್ಲಿ ಕೂಡ ತಂಡಗಳನ್ನು ಖರೀದಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ ಕ್ರಿಕೆಟ್ ದಕ್ಷಿಣ ಆಫ್ರಿಕಾ ಆಯೋಜಿಸುತ್ತಿರುವ ಲೀಗ್‌ನಲ್ಲಿ ಕೂಡ ಐಪಿಎಲ್‌ನ ಫ್ರಾಂಚೈಸಿಗಳೇ ಸಂಪೂರ್ಣ ಪಾರುಪತ್ಯ ಮೆರೆದಿದೆ. ಇದು ಬಿಸಿಸಿಐನ ಕಳವಳಕ್ಕೆ ಕಾರಣವಾಗಿದೆ. ಈ ಬಗ್ಗೆ ಸ್ವತಃ ಬಿಸಿಸಿಐನ ಅಧಿಕಾರಿಯೊಬ್ಬರು ಇನ್‌ಸೈಡ್‌ಸ್ಪೋರ್ಟ್‌ಗೆ ಪ್ರತಿಕ್ರಿಯಿಸಿ ಬಿಸಿಸಿಐನ ಆತಂಕವನ್ನು ಹಂಚಿಕೊಂಡಿದ್ದಾರೆ.

ನಮ್ಮ ಬ್ರ್ಯಾಂಡ್ ರಕ್ಷಣೆ ಮಾಡಬೇಕಿದೆ

ಬಿಸಿಸಿಐನ ಅಧಿಕಾರಿ ಐಪಿಎಲ್‌ನ ಬ್ರ್ಯಾಂಡ್‌ಗೆ ಧಕ್ಕೆಯುಂಟಾಗಬಹುದಾದ ಆತಂಕವನ್ನು ಬಿಸಿಸಿಐ ಹೊಂದಿದೆ ಎಂಬುದನ್ನು ಸ್ಪಷ್ಟಪಡಿಸಿದ್ದಾರೆ. "ಬಿಸಿಸಿಐ ಐಪಿಎಲ್ ಎಂಬ ಬ್ರ್ಯಾಂಡ್‌ಅನ್ನು ಸೃಷ್ಟಿ ಮಾಡಿದೆ. ಇಡೀ ಕ್ರೀಡಾ ಜಗತ್ತೇ ಅದಕ್ಕೆ ಅಚ್ಚರಿಗೊಂಡಿದೆ. ನಾವು ನಮ್ಮ ಬ್ರ್ಯಾಂಡ್‌ಅನ್ನು ರಕ್ಷಣೆ ಮಾಡಬೇಕಿದೆ. ಪ್ರತೀ ವಿದೇಶಿ ಲೀಗ್‌ಗಳೊಂದಿಗೂ ನಮ್ಮ ಫ್ರಾಂಚೈಸಿಗಳು ಸಂಬಂಧವನ್ನು ಹೊಂದಿರುವುದನ್ನು ನೋಡಿದರೆ ಕಳವಳವಾಗುತ್ತದೆ" ಎಂದಿದ್ದಾರೆ ಬಿಸಿಸಿಐನ ಅಧಿಕಾರಿ. ಮುಂದುವರಿದು ಮಾತನಾಡಿದ ಅವರು "ಅವರು ಅವರಿಗೆ ಇಷ್ಟವಿದ್ದಲ್ಲಿ ಹೂಡಿಕೆ ಮಾಡಲು ಸ್ವತಂತ್ರರಾಗಿದ್ದಾರೆ. ಆದರೆ ಐಪಿಎಲ್ ಹೆಸರಿನಲ್ಲಿ ಮಾಡುವುದನ್ನು ನಾವು ಅನುಮತಿಸಲಾರೆವು ಎಂದಿದ್ದಾರೆ.

ವಿದೇಶಿ ಲೀಗ್‌ಗಳ ಮಾಲಿಕತ್ವ ಹೊಂದಿರುವ ಐಪಿಎಲ್ ಫ್ರಾಂಚೈಸಿಗಳು

ಈಗಷ್ಟೇ ಆರಂಭವಾಗುತ್ತಿರುವ ಯುಎಇನ ಐಎಲ್‌ಟಿ20 ಲೀಗ್, ಕ್ರಿಕೆಟ್ ದಕ್ಷಿಣ ಆಫ್ರಿಕಾದ ಟಿ20 ಲೀಗ್, ಕೆರಿಬಿಯನ್ ಪ್ರೀಮಿಯರ್ ಲೀಗ್‌ಗಳಲ್ಲಿ ಐಪಿಎಲ್ ಫ್ರಾಂಚೈಸಿಗಳ ಮಾಲೀಕರು ಮುಖ್ಯ ಪಾತ್ರವನ್ನು ವಹಿಸಿದ್ದಾರೆ. ಪ್ರಖ್ಯಾತ ಲೀಗ್‌ಗಳಲ್ಲಿ ಒಂದಾಗಿರುವ ಕೆರಿಬಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಇರುವ ಐದು ಫ್ರಾಂಚೈಸಿಗಳ ಪೈಕಿ ಮೂರು ಫ್ರಾಂಚೈಸಿಯ ಮಾಲೀಕತ್ವವನ್ನು ಐಪಿಎಲ್ ಮಾಲೀಕರು ಹೊಂದಿದ್ದಾರೆ. ರಾಜಸ್ಥಾನ್ ರಾಯಲ್ಸ್, ಪಂಜಾಬ್ ಕಿಂಗ್ಸ್ ಹಾಗೂ ಕೊಲ್ಕತ್ತಾ ನೈಟ್ ರೈಡರ್ಸ್ ಮಾಲೀಕರು ತಂಡಗಳನ್ನು ಹೊಂದಿದ್ದಾರೆ. ಇನ್ನು ಎಮಿರೇಟ್ಸ್ ಕ್ರಿಕೆಟ್ ಮಂಡಳಿ ಆಯೋಜಿಸುತ್ತಿರುವ ಹೊಸ ಟಿ20 ಲೀಗ್ ಇಂಟರ್‌ನ್ಯಾಶನಲ್ ಟಿ20 ಲೀಗ್‌ನಲ್ಲಿ ಕೊಲ್ಕತ್ತಾ ನೈಟ್ ರೈಡರ್ಸ್, ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ಮುಂಬೈ ಇಂಡಿಯನ್ಸ್ ಮಾಲೀಕರು ತಂಡಗಳನ್ನು ಖರೀದಿಸಿದ್ದಾರೆ. ಅದಾದ ಬಳಿಕ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ಆಯೋಜನೆ ಮಾಡುತ್ತಿರುವ ಲೀಗ್‌ನಲ್ಲಿ ಎಲ್ಲಾ ಆರು ತಂಡಗಳು ಕೂಡ ಐಪಿಎಲ್ ಫ್ರಾಂಚೈಸಿಯ ಮಾಲೀಕರ ಪಾಲಾಗಿದೆ.

Pakistanದ ಈ ಮೂವರನ್ನು ಕಂಟ್ರೋಲ್ ಮಾಡಿದ್ರೆ ಟೀಮ್ ಇಂಡಿಯಾ ಗೆದ್ದ ಹಾಗೇನೇ... | *Cricket | OneIndia Kannada

ಭಾರತೀಯ ಆಟಗಾರರ ಸಹಭಾಗಿತ್ವಕ್ಕೆ ಒತ್ತಡ

ಈ ಸಂದರ್ಭದಲ್ಲಿ ವಿದೇಶಿ ಲೀಗ್‌ಗಳಲ್ಲಿ ಭಾರತೀಯ ಆಟಗಾರರಿಗೂ ಅವಕಾಶಗಳನ್ನು ನಿಡಬೇಕು ಎಂಬ ಅಭಿಪ್ರಾಯಗಳು ವ್ಯಕ್ತವಾಗುತ್ತಿದೆ. ಕನಿಷ್ಠ ಕಾಂಟ್ರಾಕ್ಟ್ ಹೊಂದಿರದ ಭಾರತೀಯ ಆಟಗಾರರಿಗಾದರೂ ಅವಕಾಶ ನೀಡಬೇಕು ಎಂಬ ಒತ್ತಡಗಳು ಬರುತ್ತಿದೆ. ಆದರೆ ಬಿಸಿಸಿಐ ಇದಕ್ಕೆ ಅನುಮತಿ ನೀಡುವ ಸಾಧ್ಯತೆ ಇಲ್ಲ. ಐಪಿಎಲ್‌ನ ಮೌಲ್ಯವನ್ನು ಗಮನದಲ್ಲಿಟ್ಟುಕೊಂಡು ಬಿಸಿಸಿಊ ಭಾರತೀಯ ಆಟಗಾರರಿಗೆ ಅನುಮತಿಯನ್ನು ನೀಡುತ್ತಿಲ್ಲ.