ಆರ್‌ಸಿಬಿ ಹೇಗೆ ಆಡಬೇಕೆಂಬ ಬ್ಲೂಪ್ರಿಂಟ್ ಇಲ್ಲದ ತಂಡ: ಮೆಕ್ಕಲಮ್

ಎರಡೂ ತಂಡಗಳನ್ನು ಪ್ರತಿನಿಧಿಸಿದ್ದಾರೆ ಮೆಕ್ಕಲಮ್

ಬ್ರೆಂಡನ್ ಮೆಕ್ಕಲಮ್ ಐಪಿಎಲ್‌ನಲ್ಲಿ ಎರಡೂ ತಂಡಗಳನ್ನು ಪ್ರತಿನಿಧಿಸಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಬೆಂಗಳೂರು ತಂಡದ ಸದಸ್ಯರಾಗಿದ್ದರು ಮೆಕ್ಕಲಮ್. ಹೀಗಾಗಿ ತಂಡದ ಒಳಗಿನ ವಾತಾವರಣ ಮತ್ತು ಆಟದ ರಣತಂತ್ರದ ಬಗ್ಗೆ ಮೆಕ್ಕಲಮ್‌ಗೆ ಸಾಕಷ್ಟು ಅರಿವಿದೆ.

ಹೇಗೆ ಆಡಬೇಕೆಂಬ ಬ್ಲೂಪ್ರಿಂಟ್ ಇಲ್ಲ

ಆರ್‌ಸಿಬಿ ತಂಡಕ್ಕೆ ಯಾವ ರೀತಿ ಎದುರಾಳಿಯ ವಿರುದ್ಧ ರಣತಂತ್ರವನ್ನು ರಚಿಸಿ ಮುನ್ನುಗ್ಗಬೇಕು ಎಂಬ ನೀಲನಕಾಶೆಯೇ ಇಲ್ಲ ಎಂದಿದ್ದಾರೆ ಬ್ರೆಂಡನ್ ಮೆಕ್ಕಲಮ್. ಚುಟುಕು ಕ್ರಿಕೆಟ್‌ಗೆ ಹೇಳಿ ಮಾಡಿಸಿದ ಆಟಗಾರರಿದ್ದರೂ ಬ್ಲೂಪ್ರಿಂಟ್ ಇಲ್ಲದೆ ಎಡವುತ್ತಿದೆ ಎಂದು ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.

'ಇರುವ ತಂಡವನ್ನು ಅದ್ಭುತವಾಗಿ ಬಳಸಿಕೊಳ್ಳುತ್ತಿದೆ'

ಆದರೆ ಚೆನ್ನೈ ತಂಡ ಹಾಗಿಲ್ಲ. ಚೆನ್ನೈ ತಂಡ ತನ್ನಲ್ಲಿರುವ ಸಂಪನ್ಮೂಲವನ್ನು ಅತ್ಯುತ್ತಮವಾಗಿ ಬಳಸಿಕೊಳ್ಳುತ್ತಿದೆ ಎಂದು ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಇದು ವೆನ್ನೈ ಮತ್ತು ಆರ್‌ಸಿಬಿ ತಂಡದ ಮಧ್ಯೆ ಇರುವ ಪ್ರಮುಖ ವ್ಯತ್ಯಾಸ ಎಂದು ಮೆಕ್ಕಲಮ್ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.

ಎರಡೂ ತಂಡಕ್ಕೂ ನಾಯಕರೇ ಬಲ

ಚೆನ್ನೈ ಸೂಪರ್ ಕಿಂಗ್ಸ್‌ ತಂಡಕ್ಕೆ ಟೀಮ್ ಇಂಡಿಯಾದ ಮಾಜಿ ನಾಯಕ ಎಂ ಎಸ್‌ ಧೋನಿಯ ಬಲ ಇದೆ. ಚಾಣಾಕ್ಷತನದಿಂದ ಮುನ್ನಡೆಸುವ ಧೋನಿ ಚೆನ್ನೈ ತಂಡವನ್ನು ಮೂರು ಬಾರಿ ಚಾಂಪಿಯನ್ ಪಟ್ಟಕ್ಕೇರಿಸಿದ್ದಾರೆ. ಆದರೆ ಟೀಮ್ ಇಂಡಿಯಾದಲ್ಲಿ ಯಶಸ್ವಿ ನಾಯಕ ಎನಿಸಿರುವ ವಿರಾಟ್ ಕೊಹ್ಲಿ ಐಪಿಎಲ್‌ನಲ್ಲಿ ಮಾತ್ರ ಮುಗ್ಗರಿಸುತ್ತಲೇ ಇದ್ದಾರೆ

ಧೋನಿಯನ್ನು ಮೆಚ್ಚಿದ್ದ ಅಲ್ಬಿ ಮಾರ್ಕೆಲ್

ಚೆನ್ನೈ ತಂಡವನ್ನು ಪ್ರತಿನಿಧಿಸಿರುವ ಮತ್ತೋರ್ವ ಆಟಗಾರ ಅಲ್ಬಿ ಮಾರ್ಕೆಲ್ ಇತ್ತೀಚೆಗಷ್ಟೇ ಧೋನಿ ಕುರಿತಾಗಿ ಹೇಳಿಕೆಯನ್ನು ನೀಡಿದ್ದರು. ಧೋನಿ ನಾಯಕತ್ಬದ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದರು. ಧೋನಿಗೆ ತನ್ನ ತಂಡದ ಆಟಗಾರರಿಂದ ಅತ್ಯುತ್ತಮ ಆಟ ಪಡೆಯುವ ಕಲೆ ಗೊತ್ತಿದೆ ಎಂದು ಹೇಳಿದ್ದರು.

10ರಲ್ಲಿ 8 ಬಾರಿ ಫೈನಲ್‌ಗೆ

ಚೆನ್ನೈ ಸೂಪರ್ ಕಿಂಗ್ಸ್ ಐಪಿಎಲ್‌ನಲ್ಲಿ ಪಾಲ್ಗೊಂಡ ಕಳೆದ ಹತ್ತು ಟೂರ್ನಿಗಳಲ್ಲಿ 8 ಬಾರಿ ಫೈನಲ್‌ಗೆ ಏರುವಲ್ಲಿ ಯಶಸ್ವಿಯಾಗಿದೆ. ಇದು ಚೆನ್ನೈ ಸೂಪರ್ ಕಿಂಗ್ಸ್‌ ತಂಡ ಎಷ್ಟು ಸಮರ್ಥವಾಗಿದೆ ಎಂಬುದಕ್ಕೆ ಪ್ರಮುಖ ನಿದರ್ಶನವಾಗಿದೆ.