Virat Kohli: ಇದೇ ವೇಗದಲ್ಲಿ ಸಾಗಿದರೆ ತೆಂಡೂಲ್ಕರ್ ದಾಖಲೆ ಕೊಹ್ಲಿ ಮುರಿಯೋದು ಯಾವಾಗ?

ಏಷ್ಯಾಕಪ್‌ನಲ್ಲಿ ಪಾಕಿಸ್ತಾನ ವಿರುದ್ಧ ಶತಕ ಬಾರಿಸುವ ಮೂಲಕ ವಿರಾಟ್ ಕೊಹ್ಲಿ ತಮ್ಮ ಅತ್ಯುತ್ತಮ ಫಾರ್ಮ್ ಕಂಡುಕೊಂಡಿದ್ದಾರೆ. ಪಾಕಿಸ್ತಾನದ ವಿರುದ್ಧ, ಕೊಹ್ಲಿ ಕೇವಲ 84 ಎಸೆತಗಳಲ್ಲಿ ತಮ್ಮ 47 ನೇ ODI ಶತಕವನ್ನು ಗಳಿಸಿದರು. ಇದು ಮೂರು ಸ್ವರೂಪಗಳಲ್ಲಿ ಅವರ 77ನೇ ಅಂತಾರಾಷ್ಟ್ರೀಯ ಶತಕವಾಗಿದೆ.

ಕಳೆದ 12 ತಿಂಗಳುಗಳಲ್ಲಿ ಅವರು ಎಲ್ಲಾ ಮೂರು ಮಾದರಿಗಳಲ್ಲಿ 7 ಶತಕಗಳನ್ನು ಗಳಿಸಿದ್ದಾರೆ. ವಿರಾಟ್ ಏಕದಿನದಲ್ಲಿ 3 ಶತಕಗಳನ್ನು ಗಳಿಸಿದ ತಕ್ಷಣ, ಅವರು ಸಚಿನ್ ತೆಂಡೂಲ್ಕರ್ ಅವರ 49 ಶತಕಗಳ ದಾಖಲೆಯನ್ನು ಮುರಿಯುತ್ತಾರೆ. ಆದರೆ, ತೆಂಡೂಲ್ಕರ್ ಅವರ 100 ಶತಕಗಳ ದಾಖಲೆಯನ್ನು ಮುರಿಯಲು ಅವರಿಗೆ ಸಾಧ್ಯವಾಗುವುದೇ ಎನ್ನುವ ದೊಡ್ಡ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ.

34ರ ಹರೆಯದ ವಿರಾಟ್ 100 ಅಥವಾ ಅದಕ್ಕಿಂತ ಹೆಚ್ಚು ಶತಕಗಳನ್ನು ಗಳಿಸಲು ಸಾಧ್ಯವಾಗಬೇಕಾದರೆ, ಅವರು ಇನ್ನೂ ಕೆಲವು ವರ್ಷಗಳ ಕಾಲ ಆಟವಾಡುತ್ತಾ ಇರಬೇಕು. ಇದುವರೆಗೂ ವಿರಾಟ್ ಕ್ರಿಕೆಟ್‌ನಿಂದ ದೂರ ಉಳಿಯುವ ಬಗ್ಗೆ ಯಾವುದೇ ಸುಳಿವು ನೀಡಿಲ್ಲ. ಅಂದರೆ ಅವರು ಸದ್ಯಕ್ಕೆ ಆಟವಾಡುವುದನ್ನು ನಿಲ್ಲಿಸುವಂತೆ ಕಾಣುತ್ತಿಲ್ಲ. ವಿರಾಟ್ ಸದ್ಯ ಭರ್ಜರಿ ಫಿಟ್ನೆಸ್ ಹೊಂದಿರುವುದರಿಂದ ಅವರಿಗೆ ಆಡಲು ಯಾವುದೇ ಸಮಸ್ಯೆ ಆಗುವುದಿಲ್ಲ.

ಏಷ್ಯಾಕಪ್‌ಗೂ ಮುನ್ನ ನಡೆದ ಯೋ-ಯೋ ಟೆಸ್ಟ್‌ನಲ್ಲಿ ವಿರಾಟ್ 17.2 ಅಂಕ ಗಳಿಸಿದ್ದರು. ವಿರಾಟ್ ಎಷ್ಟು ಸಮಯದವರೆಗೆ ಆಡುತ್ತಾರೆ ಎಂಬುದಕ್ಕೆ ಉತ್ತರ ಹುಡುಕುವ ಪ್ರಯತ್ನ ನಡೆದಿದೆ. ಸಚಿನ್ ತೆಂಡೂಲ್ಕರ್ ಅವರು 40 ವರ್ಷ ವಯಸ್ಸಿನವರೆಗೆ ಭಾರತಕ್ಕಾಗಿ ಆಡಿದ್ದರು. ರಾಹುಲ್ ದ್ರಾವಿಡ್ 39 ವರ್ಷದವರೆಗೂ ಆಡಿದ್ದರು. ಮಹೇಂದ್ರ ಸಿಂಗ್ ಧೋನಿ ಅವರಿಗೆ 38 ವರ್ಷ ಆಗಿದ್ದಾಗಲೂ ಟೀಂ ಇಂಡಿಯಾದ ಭಾಗವಾಗಿದ್ದರು.

ವಿರಾಟ್ ಕೂಡ ಈ ದಿಗ್ಗಜರ ಹಾದಿ ಹಿಡಿದರೆ!

ವಿರಾಟ್ ಕೂಡ ಈ ದಿಗ್ಗಜರ ಹಾದಿ ಹಿಡಿದರೆ 4ರಿಂದ 5 ವರ್ಷಗಳ ಕಾಲ ಆರಾಮವಾಗಿ ಆಡಬಹುದು. ಇನ್ನು 4ರಿಂದ 5 ವರ್ಷ ಆಡಿದರೆ ಇನ್ನು 24 ಶತಕ ಸಿಡಿಸಬಹುದೇ ಎಂಬ ಲೆಕ್ಕಾಚಾರಗಳನ್ನು ಹಾಕಿಕೊಳ್ಳಲಾಗಿದೆ. ಪ್ರಸ್ತುತ ಅವರ ಹೆಸರಿನಲ್ಲಿ 77 ಶತಕಗಳಿವೆ. ಸಚಿನ್ 782 ಇನ್ನಿಂಗ್ಸ್ ಗಳಲ್ಲಿ 100 ಶತಕ ಗಳಿಸಿದ್ದಾರೆ. ಎಲ್ಲಾ ಮೂರು ಸ್ವರೂಪಗಳಲ್ಲಿ ಒಟ್ಟುಗೂಡಿಸಿ ವಿರಾಟ್ 561 ಇನ್ನಿಂಗ್ಸ್ ಗಳಲ್ಲಿ 77 ಶತಕಗಳನ್ನು ಸಿಡಿಸಿದ್ದಾರೆ.

ಅವರು ಪ್ರತಿ ಶತಕಕ್ಕೆ ಸರಾಸರಿ 7.29 ಇನ್ನಿಂಗ್ಸ್ ಗಳನ್ನು ತೆಗೆದುಕೊಳ್ಳುತ್ತಾರೆ. ಇದರ ಪ್ರಕಾರ 24 ಶತಕಗಳನ್ನು ಗಳಿಸಲು 175 ಇನ್ನಿಂಗ್ಸ್ ಗಳ ಅಗತ್ಯವಿದೆ. ತಮ್ಮ 16 ವರ್ಷಗಳ ವೃತ್ತಿ ಜೀವನದಲ್ಲಿ ಕೊಹ್ಲಿ ಪ್ರತಿ ವರ್ಷ ಸರಾಸರಿ 35 ಇನ್ನಿಂಗ್ಸ್ ಗಳನ್ನು ಆಡಿದ್ದಾರೆ. ಅಂದರೆ ಅವರು 175 ಇನ್ನಿಂಗ್ಸ್ ಗಳಿಗೆ ಇನ್ನೂ 5 ವರ್ಷಗಳ ಕಾಲ ಆಡಬೇಕಾಗುತ್ತದೆ.

ಇನ್ನೂ 5 ವರ್ಷಗಳ ಕಾಲ ಆಡುವ ಸಾಧ್ಯತೆ

ಅವರು ಇನ್ನೂ 5 ವರ್ಷಗಳ ಕಾಲ ಆಡುವ ಸಾಧ್ಯತೆಯಿದೆ ಮತ್ತು ಈ ವೇಗದಲ್ಲಿ ಅವರು 2028 ರ ಅಂತ್ಯದ ವೇಳೆಗೆ ಸಚಿನ್ ಅವರ ದಾಖಲೆಯನ್ನು ಮುರಿಯಬಹುದು. ಪ್ರಸ್ತುತ ಫಾರ್ಮ್ ನಲ್ಲೇ ವಿರಾಟ್ ಮುಂದುವರಿದರೆ, 2027 ರ ವೇಳೆಗೆ 100 ಶತಕಗಳ ದಾಖಲೆಯನ್ನು ಮುಟ್ಟಬಹುದು. ವಿರಾಟ್ ಕೊಹ್ಲಿ ಡಿಸೆಂಬರ್ 2019 ರಿಂದ ಆಗಸ್ಟ್ 2022 ರವರೆಗೆ ಯಾವುದೇ ಅಂತಾರಾಷ್ಟ್ರೀಯ ಶತಕ ಗಳಿಸಲು ಸಾಧ್ಯವಾಗಿರಲಿಲ್ಲ.

ಟಿ-20 ಶತಕ ಬಾರಿಸುವ ಮೂಲಕ ಶತಕದ ಬರ ಅಂತ್ಯ

ನಂತರ ಕಳೆದ ವರ್ಷ ಸೆಪ್ಟೆಂಬರ್ 8ರಂದು ಏಷ್ಯಾಕಪ್ ನಲ್ಲೇ ಟಿ-20 ಶತಕ ಬಾರಿಸುವ ಮೂಲಕ ಶತಕದ ಬರವನ್ನು ಅಂತ್ಯಗೊಳಿಸಿದ್ದರು. ಇದರ ನಂತರ, ಕೊಹ್ಲಿ 11 ಸೆಪ್ಟೆಂಬರ್ 2023 ರವರೆಗೆ ಎಲ್ಲಾ ಮೂರು ಸ್ವರೂಪಗಳಲ್ಲಿ 6 ಶತಕಗಳನ್ನು ಗಳಿಸಿದರು. ಕಳೆದ 12 ತಿಂಗಳುಗಳಲ್ಲಿ, ಕೊಹ್ಲಿ 7 ಅಂತಾರಾಷ್ಟ್ರೀಯ ಶತಕಗಳನ್ನು ಗಳಿಸಿದ್ದಾರೆ. ಇದಕ್ಕಾಗಿ ಅವರು 40 ಇನ್ನಿಂಗ್ಸ್ ತೆಗೆದುಕೊಂಡಿದ್ದಾರೆ.

ಅಂದರೆ, ಅವರು 5.7 ಇನಿಂಗ್ಸ್ ಸರಾಸರಿಯಲ್ಲಿ ಶತಕ ಸಿಡಿಸಿದ್ದಾರೆ. ಅದರಂತೆ ಮುಂದಿನ 137 ಇನ್ನಿಂಗ್ಸ್ ಗಳಲ್ಲಿ 24 ಶತಕ ಸಿಡಿಸಲಿದ್ದಾರೆ ಎಂಬ ಲೆಕ್ಕಾಚಾರವನ್ನು ಹಾಕಿಕೊಳ್ಳಲಾಗಿದೆ. ಏಷ್ಯಾಕಪ್‌ನಲ್ಲಿ ಪಾಕಿಸ್ತಾನ ವಿರುದ್ಧ ವಿರಾಟ್ 122 ರನ್ ಗಳಿಸಿದ್ದರು.