ಕೆಕೆಆರ್ ಸೋಲಿಸಿ ಅಂಕಪಟ್ಟಿಯಲ್ಲಿ ಮತ್ತೆ ಅಗ್ರಸ್ಥಾನಕ್ಕೇರಿದ ಸಿಎಸ್‌ಕೆ

ಚೆನ್ನೈ, ಏಪ್ರಿಲ್ 9: ಚೆನ್ನೈಯ ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ಮಂಗಳವಾರ (ಏಪ್ರಿಲ್ 9) ನಡೆದ ಐಪಿಎಲ್ 23ನೇ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಚೆನ್ನೈ ಸೂಪರ್ ಕಿಂಗ್ಸ್‌ 7 ವಿಕೆಟ್ ಜಯ ಗಳಿಸಿದೆ. ಈ ಗೆಲುವಿನೊಂದಿಗೆ ಹಾಲಿ ಚಾಂಪಿಯನ್ ಸಿಎಸ್‌ಕೆ ಅಂಕಪಟ್ಟಿಯಲ್ಲಿ ಮತ್ತೆ ಅಗ್ರಸ್ಥಾನಕ್ಕೇರಿದೆ.

ಸ್ಕೋರ್‌ಕಾರ್ಡ್‌ಗೆ ಕೆಳಗಿನ ಲಿಂಕ್ ಕ್ಲಿಕ್ ಮಾಡಿ

ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಕೆಕೆಆರ್, ಸಿಎಸ್‌ಕೆ ಬೌಲರ್‌ಗಳ ದಾಳಿಗೆ ನಲುಗಿತು. ಕ್ರಿಸ್ ಲಿನ್ 0, ಸುನಿಲ್ ನರೇನ್ 6, ರಾಬಿನ್ ಉತ್ತಪ್ಪ 11, ನಿತೀಶ್ ರಾಣಾ 0, ದಿನೇಶ್ ಕಾರ್ತಿಕ್ 19, ಶುಭ್‌ಮಾನ್ ಗಿಲ್ 9 ರನ್‌ಗೆ ವಿಕೆಟ್ ಒಪ್ಪಿಸಿದರು.

ಚೆನ್ನೈ ಸೂಪರ್ ಕಿಂಗ್ಸ್‌ ಪರ ದೀಪಕ್ ಚಾಹರ್ 20 ರನ್‌ಗೆ 3, ಹರ್ಭಜನ್ ಸಿಂಗ್ 15 ರನ್‌ಗೆ 2, ಇಮ್ರಾನ್ ತಾಹಿರ್ 21 ರನ್‌ಗೆ 2 ವಿಕೆಟ್ ಕೆಡವಿ ಕಾಡಿದರು. ಕೋಲ್ಕತ್ತಾಗೆ ರಸೆಲ್ 44 ಎಸೆತಕ್ಕೆ ಭರ್ತಿ 50 ರನ್ ಸೇರಿಸಿ ಕೊಂಚ ಬೆಂಬಲಿಸಿದರು. ಕೆಕೆಆರ್ 20 ಓವರ್‌ಗೆ 9 ವಿಕೆಟ್ ನಷ್ಟದಲ್ಲಿ 108 ರನ್ ಗಳಿಸಿತು.

109 ರನ್ ಸುಲಭ ಗುರಿ ಬೆನ್ನಟ್ಟಿದ ಚೆನ್ನೈ ಫಾ ಡು ಪ್ಲೆಸಿಸ್ ಅಜೇಯ 43 ರನ್ ನೆರವಿನೊಂದಿಗೆ 17.2 ಓವರ್‌ಗೆ 3 ವಿಕೆಟ್ ಕಳೆದು 111 ರನ್ ಗಳಿಸಿತು. ಉತ್ತಮ ಬೌಲಿಂಗ್‌ ಪ್ರದರ್ಶಿಸಿದ ಚೆನ್ನೈಯ ದೀಪಕ್ ಚಾಹರ್ ಪಂದ್ಯಶ್ರೇಷ್ಠರೆನಿಸಿದರು.

ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡ: ಕ್ರಿಸ್ ಲಿನ್, ಸುನಿಲ್ ನರೇನ್, ರಾಬಿನ್ ಉತ್ತಪ್ಪ, ನಿತೀಶ್ ರಾಣಾ, ದಿನೇಶ್ ಕಾರ್ತಿಕ್ (ಸಿ & ವಿ.ಕೆ), ಶುಭ್‌ಮಾನ್ ಗಿಲ್, ಆ್ಯಂಡ್ರೆ ರಸೆಲ್, ಪಿಯೂಶ್ ಚಾವ್ಲಾ, ಕುಲ್ದೀಪ್ ಯಾದವ್, ಹ್ಯಾರಿ ಗರ್ನಿ, ಪ್ರಸಿದ್ಧ್ ಕೃಷ್ಣ.

ಚೆನ್ನೈ ಸೂಪರ್ ಕಿಂಗ್ಸ್‌ ತಂಡ: ಶೇನ್ ವ್ಯಾಟ್ಸನ್, ಫಾ ಡು ಪ್ಲೆಸಿಸ್, ಸುರೇಶ್ ರೈನಾ, ಅಂಬಾಟಿ ರಾಯುಡು, ಎಂಎಸ್ ಧೋನಿ (ಸಿ & ವಿ.ಕೆ), ಕೇದಾರ್ ಜಾಧವ್, ರವೀಂದ್ರ ಜಡೇಜಾ, ಸ್ಕಾಟ್ ಕುಗ್ಲೆಲೀಜನ್, ದೀಪಕ್ ಚಾಹರ್, ಹರ್ಭಜನ್ ಸಿಂಗ್, ಇಮ್ರಾನ್ ತಾಹಿರ್.