91 ವರ್ಷ ಹಳೆ ದಾಖಲೆ ಮುರಿದ ಆಸೀಸ್ ಕ್ರಿಕೆಟರ್ಸ್

ಸಿಡ್ನಿ, ಅ. 30: ಆಸ್ಟ್ರೇಲಿಯಾದ ಕ್ರಿಕೆಟ್ ಇತಿಹಾಸದ ಹೊಸ ದಾಖಲೆ ನಿರ್ಮಾಣವಾಗಿದೆ. ಸುಮಾರು 91 ವರ್ಷಗಳ ನಂತರ ಪ್ರಥಮ ದರ್ಜೆ ಕ್ರಿಕೆಟ್ ನ ಜೊತೆಯಾಟದ ದಾಖಲೆ ಮುರಿಯಲಾಗಿದೆ.

ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧ ಅರೋನ್ ಫಿಂಚ್ ಹಾಗೂ ರಿಯಾನ್ ಕಾರ್ಟರ್ಸ್ ಜೋಡಿ ಕ್ರಿಕೆಟ್ ಆಸ್ಟ್ರೇಲಿಯಾ XI ಪರ ಆಡುತ್ತಾ ಅಜೇಯ 501 ರನ್ ಕಲೆಹಾಕಿದ್ದಾರೆ. ಈ ಮೂಲಕ ಆಸ್ಟ್ರೇಲಿಯಾ ಕ್ರಿಕೆಟ್ ಇತಿಹಾಸದ ದಾಖಲೆಯಾಗಿದ್ದ 456 ರನ್ ಜೊತೆಯಾಟವನ್ನು ಮುರಿದಿದ್ದಾರೆ. 1923-24ರಲ್ಲಿ ವಿಕ್ಟೋರಿಯಾದ ಬಿಲ್ ಪೊನ್ಸ್ ಫರ್ಡ್ ಹಾಗೂ ಎಡ್ಗರ್ ಮೇಯ್ನ್ ಈ ಜೊತೆಯಾಟದಲ್ಲಿ ಭಾಗಿಯಾಗಿದ್ದರು. [ಕೌಂಟಿ ಕ್ರಿಕೆಟರ್ ನಿಂದ ವಿಶ್ವದಾಖಲೆ 350]

ಈಗ ಅರೋನ್ ಫಿಂಚ್ ಹಾಗೂ ಕಾಟರ್ಸ್ ಅವರು ಕ್ರಮವಾಗಿ ಅಜೇಯ 287 ಹಾಗೂ ಅಜೇಯ 208ರನ್ ಗಳಿಸಿ 501ರನ್ ಜೊತೆಯಾಟ ಪ್ರದರ್ಶಿಸಿದ್ದಾರೆ. ಕ್ರಿಕೆಟ್ ಆಸ್ಟ್ರೇಲಿಯಾ XI ಬ್ಲಾಕ್ ಟೌನ್ ಇಂಟರ್ ನ್ಯಾಷನಲ್ ಸ್ಫೋರ್ಟ್ಸ್ ಪಾರ್ಕ್ ನ ಎರಡನೇ ದಿನದ ಆಟವನ್ನು 501-0ಸ್ಕೋರ್ ಆಗಿದ್ದಾಗ ಡಿಕ್ಲೇರ್ ಮಾಡಿಕೊಂಡಿದೆ. ಮೂರು ದಿನಗಳ ಪಂದ್ಯದಲ್ಲಿ ಮೊದಲ ದಿನ 376/0 ಮೊತ್ತ ಗಳಿಸಿತ್ತು. [ಶತಕ ಕೈತಪ್ಪಿದ್ದರೂ ವಿಶ್ವದಾಖಲೆ ಬರೆದ ಕ್ರಿಸ್]

ಪ್ರಥಮ ದರ್ಜೆಯಲ್ಲಿ ವಿಶ್ವದಾಖಲೆ ಅರಂಭಿಕ ವಿಕೆಟ್ ಗೆ 561 ರನ್ ಆಗಿದೆ. ಪಾಕಿಸ್ತಾನದ ವಹೀದ್ ಮಿರ್ಜಾ ಹಾಗೂ ಮನ್ಸೂರ್ ಅಖ್ತರ್ ಅವರು 1976-77ರಲ್ಲಿ ಕರಾಚಿಯಲ್ಲಿ ದಾಖಲೆ ಬರೆದಿದ್ದು, ಇನ್ನೂ ಯಾರೂ ಅಳಿಸಲು ಸಾಧ್ಯವಾಗಿಲ್ಲ. (ಎಪಿ)