T20 World Cup 2026: ಪಾಕಿಸ್ತಾನ ಬೌಲರ್‌ಗಳನ್ನು ಅಟ್ಟಾಡಿಸಿ ಹೊಡೆದ ಹ್ಯಾರಿ ಬ್ರೂಕ್: ಇಂಗ್ಲೆಂಡ್‌ಗೆ ಭರ್ಜರಿ ಜಯ

ENG vs PAK T20 World Cup 2026: ಪಲ್ಲೆಕಲೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣ ನಡದ ಟಿ20 ವಿಶ್ವಕಪ್ 2026ರ ಸೂಪರ್ 8 ಹಂತದ ಪಂದ್ಯದಲ್ಲಿ ಇಂಗ್ಲೆಂಡ್ ಪಾಕಿಸ್ತಾನದ ವಿರುದ್ಧ ಎರಡು ವಿಕೆಟ್‌ಗಳಿಂದ ಗೆಲುವು ಸಾಧಿಸಿದೆ. ಈ ಮೂಲಕ ಟೂರ್ನಿಯಲ್ಲಿ ಸೆಮಿಫೈನಲ್‌ಗೆ ಪ್ರವೇಶಿಸಿದ ಮೊದಲ ತಂಡವಾಗಿ ಹೊರಹೊಮ್ಮಿದೆ. ಇಂಗ್ಲೆಂಡ್‌ ಗೆಲುವಿಗೆ ಪ್ರಮುಖ ಕಾರಣವೇ ಹ್ಯಾರಿ ಬ್ರೂಕ್‌ ಸಿಡಿಸಿದ ಶತಕ.

ಟಾಸ್‌ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಪಾಕಿಸ್ತಾನ ನಿಗದಿತ 20 ಓವರ್‌ಗಳಲ್ಲಿ 9 ವಿಕೆಟ್‌ ನಷ್ಟಕ್ಕೆ 164 ರನ್‌ಗಳನ್ನು ಕಲೆಹಾಕಿತು. ಇಂಗ್ಲೆಂಡ್‌ ತಂಡ ಈ ಗುರಿ ಬೆನ್ನತ್ತುವಲ್ಲಿ ಯಶಸ್ವಿಯಾಗುವ ಮೂಲಕ ನೇರ ಸೆಮಿಫೈನಲ್‌ಗೆ ಪ್ರವೇಶ ಮಾಡಿತು.

ಪಾಕ್‌ ಬೌಲರ್‌ಗಳನ್ನು ಚೆಂಡಾಡಿದ ಬ್ರೂಕ್

ವಿಕೆಟ್‌ಗಳನ್ನು ಕಳೆದುಕೊಂಡು ತಂಡ ಸಂಕಷ್ಟಕ್ಕೆ ಸಿಲುಕಿದ ಸಂದರ್ಭದಲ್ಲಿ, ನಾಯಕ ಹ್ಯಾರಿ ಬ್ರೂಕ್‌ ಸ್ಫೋಟಕ ಬ್ಯಾಟಿಂಗ್ ಮೂಲಕ ಪಾಕಿಸ್ತಾನ ಬೌಲರ್‌ಗಳನ್ನು ಅಟ್ಟಾಡಿಸಿ ಹೊಡೆದು ಶತಕ ಸಿಡಿಸಿದರು. ಅವರು ಕೇವಲ 51 ಎಸೆತಗಳಲ್ಲಿ 10 ಬೌಂಡರಿ, 4 ಸಿಕ್ಸ್‌ಗಳೊಂದಿಗೆ 100 ರನ್‌ಗಳನ್ನ ಕಲೆಹಾಕಿ ತಂಡದ ಗೆಲುವಿಗೆ ಪ್ರಮುಖ ಪಾತ್ರವಹಿಸಿದರು.

ಇಂಗ್ಲೆಡ್ ಪರ ಯಾರು ಎಷ್ಟು ರನ್‌ ಬಾರಿಸಿದರು?

ಇಂಗ್ಲೆಂಡ್‌ ಪರ ಬ್ಯಾಟ್‌ ಬೀಸಿದ, ಹ್ಯಾರಿ ಬ್ರೂಕ್‌ 100(51), ಜಾಕೋಬ್ ಬೆಥೆಲ್ 8(10), ಸ್ಯಾಮ್ ಕರನ್ 16(15), ವಿಲ್‌ ಜಾಕ್ಸ್‌ 28(23), ಟಾಮ್ ಬ್ಯಾಂಟನ್ 2(6), ಜೋಶ್ ಬಟ್ಲರ್ 2(3), ಜೋಫ್ರಾ ಆರ್ಚರ್ ಅಜೇಯ 5 ರನ್‌ ಸಿಡಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಈ ರೋಚಕ ಗೆಲುವಿನೊಂದಿಗೆ ಇಂಗ್ಲೆಂಡ್ ಸೂಪರ್ 8 ಹಂತದಲ್ಲಿ ಸತತ ಎರಡನೇ ವಿಜಯವನ್ನು ದಾಖಲಿಸಿ ಇಂಗ್ಲೆಂಡ್‌ ಸೆಮಿಫೈನಲ್‌ ಪ್ರವೇಶಿಸಿದೆ. ಒತ್ತಡದ ಪರಿಸ್ಥಿತಿಯಲ್ಲೂ ಇಂಗ್ಲೆಂಡ್ ಬ್ಯಾಟರ್‌ಗಳು ಸಮತೋಲನ ಕಾಪಾಡಿಕೊಂಡು ಕೊನೆಯ ಓವರ್‌ನಲ್ಲಿ ಗುರಿ ತಲುಪಿದರು.

ಪಾಕಿಸ್ತಾನ ಪರ ಯಾರು ಎಷ್ಟು ರನ್‌ ಗಳಿಸಿದರು?

ಮೊದಲು ಬ್ಯಾಟ್‌ ಮಾಡಿದ ಪಾಕಿಸ್ತಾನ 164 ರನ್‌ಗಳನ್ನು ಕಲೆಹಾಕಿತು. ಪಾಕ್‌ ಪರ ಸಾಹಿಬ್‌ಜಾದಾ ಫರ್ಹಾನ್ 63 ಅರ್ಧಶತಕದೊಂದಿಗೆ ತಂಡಕ್ಕೆ ಉತ್ತಮ ಆರಂಭ ನೀಡಿದರು. ಬಾಬರ್ ಆಝಂ 25, ಫಖರ್ ಜಮಾನ್ 25 ರನ್‌ ಗಳಿಸಿದ್ದು ಬಿಟ್ಟರೆ, ಉಳಿದವರು ಒಂದಂಕಿ ಕೂಡ ದಾಟಲಿಲ್ಲ. ಇಂಗ್ಲೆಂಡ್ ಪರ ಬೌಲಿಂಗ್ ಮಾಡಿದ ಲಿಯಾಮ್ ಡಾಸನ್ 3 ವಿಕೆಟ್ ಕಬಳಿಸಿದರೆ, ಜೋಫ್ರಾ ಆರ್ಚರ್ ಹಾಗೂ ಜೇಮಿ ಓವರ್ಟನ್ ತಲಾ 2 ವಿಕೆಟ್ ಕಿತ್ತರು. ಇನ್ನೂ ಆದಿಲ್ ರಶೀದ್ ಒಂದು ವಿಕೆಟ್‌ ಪಡೆದರು.

ಟೂರ್ನಿಯಿಂದ ಹೊರಬಿತ್ತಾ ಪಾಕ್?

ಇನ್ನೂ ಈ ಸೋಲಿನೊಂದಿಗೆ ಪಾಕಿಸ್ತಾನ ತಂಡದ ಸೆಮಿಫೈನಲ್‌ನಿಂದ ಬಹುತೇಕ ಹೊರಬಿದ್ದಂತಾಗಿದೆ. ಅಂಕಪಟ್ಟಿಯಲ್ಲಿ ಹಿನ್ನಡೆಯಿಂದ ಟೂರ್ನಿಯಲ್ಲಿ ಮುಂದುವರಿಯಲು ಅಸಾಧ್ಯ ಪರಿಸ್ಥಿತಿ ಎದುರಾಗಿದೆ. ಆದ್ದರಿಂದ ಪಾಕಿಸ್ತಾನದ ವಿಶ್ವಕಪ್ ಅಭಿಯಾನ ಸೂಪರ್ 8 ಹಂತದಲ್ಲೇ ಅಂತ್ಯವಾಗುವ ಸೂಚನೆಗಳು ಎದ್ದುಕಾಣುತ್ತಿವೆ.

ಇಂಗ್ಲೆಂಡ್‌ ಪ್ಲೇಯಿಂಗ್ 11: ಫಿಲ್ ಸಾಲ್ಟ್‌, ಜೋಶ್ ಬಟ್ಲರ್ (ವಿಕೆಟ್‌ ಕೀಪರ್), ಜಾಕೋಬ್ ಬೆಥೆಲ್, ಹ್ಯಾರಿ ಬ್ರೂಕ್ (ನಾಯಕ), ಟಾಮ್ ಬ್ಯಾಂಟನ್, ಸ್ಯಾಮ್ ಕರನ್, ವಿಲ್ ಜಾಕ್ಸ್, ಜೇಮಿ ಓವರ್‌ಟನ್, ಲಿಯಾಮ್ ಡವ್ಸೊನ್, ಜೋಫ್ರಾ ಆರ್ಚರ್, ಆದಿಲ್ ರಶಿದ್.