ಬ್ರೇಕಿಂಗ್ ನ್ಯೂಸ್: ಕ್ರಿಕೆಟ್ ದಿಗ್ಗಜ ಆಸ್ಟ್ರೇಲಿಯಾದ ಶೇನ್ ವಾರ್ನ್ ಇನ್ನಿಲ್ಲ!

ಕಂಬನಿ ಮಿಡಿದ ಕ್ರಿಕೆಟಿಗರು

ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಶೇನ್ ವಾರ್ನ್ ದಿಡೀರ್ ನಿಧನದ ಸುದ್ದಿಯನ್ನು ಕೇಳಿದ ಶೇನ್ ವಾರ್ನ್ ಸಮಕಾಲೀನ ಕ್ರಿಕೆಟಿಗರು ಹಾಗೂ ಯುವ ಕ್ರಿಕೆಟಿಗರು ನಂಬಲಾಗುತ್ತಿಲ್ಲ ಎಂಬ ಪ್ರತಿಕ್ರಿಯೆಗಳನ್ನು ನೀಡುತ್ತಿದ್ದಾರೆ. ವಿರೇಂದ್ರ ಸೆಹ್ವಾಗ್, ಬಾಬರ್ ಅಜಮ್ ಸೇರಿದಂತೆ ಹಲವಾರು ಹಿರಿಯ ಹಾಗೂ ಯುವ ಕ್ರಿಕೆಟಿಗರು ದಿಗ್ಗಜನ ಸಾವಿನ ನೋವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದಾರೆ.

ಹೃದಯಾಘಾತದ ಅನುಮಾನ

ಇನ್ನು ಶೇನ್ ವಾರ್ನ್ ಸಾವಿಗೆ ನಿಖರವಾದ ಕಾರಣ ಏನೆಂಬುದು ಇನ್ನೂ ಬಹಿರಂಗವಾಗದೇ ಇದ್ದು, ಕುಟುಂಬಸ್ಥರು ಕೆಲ ಸಮಯದ ನಂತರ ಸಂಪೂರ್ಣ ಮಾಹಿತಿಯನ್ನು ಮಾಧ್ಯಮಕ್ಕೆ ತಿಳಿಸಲಿದ್ದಾರೆ ಎನ್ನಲಾಗುತ್ತಿದೆ. ಸದ್ಯ ತಮ್ಮ ಬಂಗಲೆಯಲ್ಲಿಯೇ ಕುಸಿದುಬಿದ್ದ ಶೇನ್ ವಾರ್ನ್ ಸಾವಿಗೆ ಹೃದಯಾಘಾತವೇ ಕಾರಣ ಎಂದು ಮೇಲ್ನೋಟಕ್ಕೆ ತಿಳಿದುಬಂದಿದ್ದು, ಅಸಲಿ ಕಾರಣವೇನೆಂಬುದು ಕೊಂಚ ಸಮಯದಲ್ಲಿಯೇ ಬಹಿರಂಗವಾಗಲಿದೆ.

ಅತಿ ಹೆಚ್ಚು ಟೆಸ್ಟ್ ವಿಕೆಟ್ ಗಳಿಸಿದ ಆಟಗಾರರಲ್ಲಿ ಶೇನ್ ವಾರ್ನ್ ದ್ವಿತೀಯ

ದಿಢೀರ್ ನಿಧನಕ್ಕೆ ಒಳಗಾಗಿರುವ ದಿಗ್ಗಜ ಕ್ರಿಕೆಟಿಗ ಶೇನ್ ವಾರ್ನ್ 145 ಟೆಸ್ಟ್ ಪಂದ್ಯಗಳನ್ನಾಡಿದ್ದು, 273 ಇನ್ನಿಂಗ್ಸ್‌ಗಳ ಪೈಕಿ 708 ವಿಕೆಟ್ ಗಳಿಸಿದ್ದು, ಟೆಸ್ಟ್ ಕ್ರಿಕೆಟ್‍ನಲ್ಲಿ ಅತಿ ಹೆಚ್ಚು ವಿಕೆಟ್ ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ದ್ವಿತೀಯ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ಹೀಗೆ ಸಾರ್ವಕಾಲಿಕ ದಾಖಲೆಯನ್ನು ತಮ್ಮ ಹೆಸರಿನಲ್ಲಿ ಹೊಂದಿರುವ ಶೇನ್ ವಾರ್ನ್ ಇನ್ನೂ ಹತ್ತು ಹಲವಾರು ದಾಖಲೆಗಳನ್ನು ನಿರ್ಮಿಸಿ ಕ್ರಿಕೆಟರ್ ಆಗಬೇಕು ಎಂದು ಕನಸನ್ನು ಹೊತ್ತಿಕೊಂಡಿರುವ ಹಲವಾರು ಯುವ ಪ್ರತಿಭೆಗಳಿಗೆ ರೋಲ್ ಮಾಡೆಲ್ ಆಗಿದ್ದಾರೆ.