ಐಪಿಎಲ್‌ಗೆ ಮತ್ತೊಂದು ಹೊಡೆತ: ಪ್ರಾಯೋಜಕತ್ವಕ್ಕೆ ಕಂಪನಿಯೊಂದು ನಕಾರ!

ಹಿಂದೆ ಸರಿದ ಫ್ಯೂಚರ್ ಗ್ರೂಪ್

ಪ್ರಾಯೋಜಕತ್ವದಿಂದ ಮೊಬೈಲ್ ಉತ್ಪಾದನಾ ಕಂಪನಿ ವಿವೋ ಹಿಂದೆ ಸರಿದ ಬಳಿಕ ಒಂದಿಷ್ಟು ಕಂಪನಿಗಳು 2020ರ ಐಪಿಎಲ್‌ಗೆ ಪ್ರಾಯೋಜಕತ್ವ ನೀಡಲು ಮುಂದೆ ಬಂದಿದ್ದವು. ಅವುಗಳಲ್ಲಿ ಒಂದು ದೊಡ್ಡ ಕಂಪನಿ ನಿರ್ಧಾರ ಬದಲಿಸಿದೆ. 'ಫ್ಯೂಚರ್ ಗ್ರೂಪ್' ಸಂಘಟಿತ ಸಂಸ್ಥೆ ಐಪಿಎಲ್ ಪ್ರಾಯೋಜಕತ್ವದಿಂದ ದೂರ ಉಳಿಯುವ ನಿರ್ಧಾರ ಪ್ರಕಟಿಸಿದೆ.

ಬಿಸಿಸಿಐನಿಂದ ಮಾಹಿತಿ

ಐಪಿಎಲ್ ಪ್ರಾಯೋಜಕತ್ವದಿಂದ ಫ್ಯೂಚರ್ ಗ್ರೂಪ್ ಹಿಂದೆ ಸರಿದಿರುವುದನ್ನು ಬಿಸಿಸಿಐ ಮೂಲ ತಿಳಿಸಿದೆ. 'ಹೌದು, ಫ್ಯೂಚರ್ ಗ್ರೂಪ್ ಐಪಿಎಲ್ ಪ್ರಾಯೋಜಕತ್ವದಿಂದ ಹಿಂದೆ ಸರಿದಿದೆ. ನಾವೀಗ ಬೇರೆ ಪ್ರಾಯೋಜಕರಿಗೆ ಎದುರು ನೋಡುತ್ತಿದ್ದೇವೆ ಎಂದು ಸದ್ಯ ದುಬೈನಲ್ಲಿರುವ ಬಿಸಿಸಿಐ ಮೂಲ ಮಾಹಿತಿ ನೀಡಿದೆ.

ದೊಡ್ಡ ಮಟ್ಟದ ಪ್ರಾಯೋಜತ್ವ ಕೊನೆ

ಕಳೆದ ಐದು ವರ್ಷಗಳಿಂದಲೂ ಫ್ಯೂಚರ್ ಗ್ರೂಪ್ ಕಂಪನಿ ಐಪಿಎಲ್ ಪ್ರಾಯೋಜಕತ್ವ ನೀಡುತ್ತಿತ್ತು. ಇದೀಗ ಐಪಿಎಲ್ ವೆಬ್‌ಸೈಟ್‌ನಿಂದ ಫ್ಯೂಚರ್ ಗ್ರೂಪ್ ಲೋಗೋ ತೆಗೆದು ಹಾಕಲಾಗಿದೆ. ಪ್ರತೀ ವರ್ಷವೂ ಫ್ಯೂಚರ್ ಗ್ರೂಪ್ ಐಪಿಎಲ್‌ಗಾಗಿ 28 ಕೋ.ರೂಗಳ ಪ್ರಾಯೋಜಕತ್ವ ನೀಡುತ್ತಿತ್ತು.

ನಾಲ್ವರು ಪ್ರಾಯೋಜಕರು

ಫ್ಯೂಚರ್ ಗ್ರೂಪ್ ಹಿಂದೆ ಸರಿದ ಬಳಿಕ ಈಗ ಐಪಿಎಲ್ ಪ್ರಾಯೋಜಕರಲ್ಲಿ ಡ್ರೀಮ್ 11 (ಶೀರ್ಷಿಕೆ ಪ್ರಾಯೋಜಕ), ಟಾಟಾ ಮೋಟಾರ್ಸ್ (ಅಧಿಕೃತ ಕಾರು ಪಾಲುದಾರ), ಪೇಟಿಎಂ (ಅಂಪೈರ್ ಪಾಲುದಾರ) ಮತ್ತು ಸಿಯೆಟ್ (ಅಧಿಕೃತ ಟೈಮ್‌ಔಟ್ ಪಾಲುದಾರ) ಮಾತ್ರ ಉಳಿದುಕೊಂಡಿದೆ.