ಶತಕ ಬಾರಿಸಿದರೂ ಅಪ್ಪನಿಗೆ ಪೂರ್ತಿ ಖುಷಿಯಾಗಿಲ್ಲ: ಆಸಕ್ತಿಕರ ವಿಚಾರ ಹಂಚಿಕೊಂಡ ಶುಭಮನ್ ಗಿಲ್

ಯಾವಾಗಲೂ ದೊಡ್ಡ ಮೊತ್ತ ಗಳಿಸಬೇಕು ಎನ್ನುತ್ತಾರೆ

ಸಂದರ್ಶನದ ವೇಳೆ ರಾಹುಲ್ ದ್ರಾವಿಡ್, "ಕಳೆದ ಎರಡು ತಿಂಗಳಿನಿಂದ ನೀವು ಅತ್ಯುತ್ತಮ ಫಾರ್ಮ್ ಹೊಂದಿದ್ದೀರಿ. ನಿಮ್ಮ ಪ್ರದರ್ಶನ ನೋಡಿ ನಿಮ್ಮ ತಂದೆ ಈಗ ನಿಮ್ಮ ಬಗ್ಗೆ ಹೆಮ್ಮೆ ಪಡಬೇಕು" ಎಂದು ಹೇಳಿದರು.

ಇದಕ್ಕೆ ಪ್ರತಿಕ್ರಿಯೆ ನೀಡಿದ ಅವರು, "ನಮ್ಮ ತಂದೆ ಸಂಪೂರ್ಣವಾಗಿ ಸಂತೋಷವಾಗಿರಲಿಲ್ಲ, ಏಕೆಂದರೆ ಪ್ರತಿ ಬಾರಿ ನಾನು ಉತ್ತಮ ಫಾರ್ಮ್‌ ಪ್ರದರ್ಶಿಸಿ, ದೊಡ್ಡ ಮೊತ್ತವನ್ನು ಗಳಿಸಬೇಕೆಂದು ಅವರು ಬಯಸುತ್ತಾರೆ. ಸರಣಿಯ ಕೊನೆಯ ಪಂದ್ಯದಲ್ಲಿ ಶತಕ ಗಳಿಸುತ್ತಿದ್ದಂತೆ ನಾನು ಔಟಾಗಿದ್ದರಿಂದ ನನ್ನ ತಂದೆ ಖುಷಿಯಾಗಿರುವುದಿಲ್ಲ." ಎಂದು ಹೇಳಿದ್ದಾರೆ.

ಇದಕ್ಕೆ ಪ್ರತಿಕ್ರಿಯೆ ನೀಡಿದ ರಾಹುಲ್ ದ್ರಾವಿಡ್, " ಹೆಚ್ಚಿನ ರನ್ ಗಳಿಸದಿದ್ದಾಗ ನಾವು ನಿಮ್ಮನ್ನು ಬಿಟ್ಟರೂ, ನಿಮ್ಮ ತಂದೆ ನಿಮ್ಮನ್ನು ಬಿಡುವುದಿಲ್ಲ. ಒಳ್ಳೆಯ ಅಪ್ಪನನ್ನು ಪಡೆದಿದ್ದೀರಾ" ಎಂದು ಹೇಳಿದರು.

ರೋಹಿತ್‌ ಶರ್ಮಾರಿಂದ ಸಾಕಷ್ಟು ಕಲಿಯುತ್ತಿದ್ದೇನೆ

ರೋಹಿತ್ ಶರ್ಮಾ ಜೊತೆ ಬ್ಯಾಟಿಂಗ್ ಮಾಡುವ ಬಗ್ಗೆ ಮಾತನಾಡಿರುವ ಶುಭಮನ್ ಗಿಲ್, "ರೋಹಿತ್ ಅವರೊಂದಿಗೆ ಬ್ಯಾಟಿಂಗ್ ಮಾಡಲು ಸಂತಸವಾಗುತ್ತದೆ. ಅವರು ನನ್ನ ನೆಚ್ಚಿನ ಬ್ಯಾಟರ್ ಗಳಲ್ಲಿ ಒಬ್ಬರು. 3ನೇ ಏಕದಿನ ಪಂದ್ಯದಲ್ಲಿ ರೋಹಿತ್ ಶರ್ಮಾ 70 ರನ್ ಗಳಿಸಿದ್ದಾಗ ಮಿಚೆಲ್ ಬೌಲಿಂಗ್ ಮಾಡಲು ಬಂದರು. ಆಗ ನನ್ನ ಬಳಿ ಬಂದ ರೋಹಿತ್ ಈತ ನನ್ನನ್ನು ಔಟ್ ಮಾಡುವಂತ ಬೌಲರ್ ಆಗಿದ್ದಾನೆ, ಆದರೂ ನಾನು ಅವನ ಬೌಲಿಂಗ್‌ನಲ್ಲಿ ಬೌಂಡರಿ ಹೊಡೆಯುತ್ತೇನೆ ಎಂದರು. ಈ ರೀತಿಯ ಹೋರಾಟ ಮನೋಭಾವ ಅವರಿಗಿದೆ, ನಾನು ಅವರಿಂದ ಸಾಕಷ್ಟು ಕಲಿಯುತ್ತಿದ್ದೇನೆ" ಎಂದು ಹೇಳಿದರು.

ಹಲವು ದಾಖಲೆ ಮಾಡಿದ ಶುಭಮನ್ ಗಿಲ್‌

23 ವರ್ಷದ ಬ್ಯಾಟರ್ ಶುಭಮನ್ ಗಿಲ್ ಈಗಾಗಲೇ 3 ಬಾರಿ ಸರಣಿ ಆಟಗಾರ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. 21 ಇನ್ನಿಂಗ್ಸ್ ಆಡಿರುವ ಶುಭಮನ್ ಗಿಲ್‌ ಈಗಾಗಲೇ 4 ಶತಕಗಳನ್ನು ಬಾರಿಸಿದ್ದಾರೆ. ಭಾರತದ ಪರವಾಗಿ ಕಡಿಮೆ ಇನ್ನಿಂಗ್ಸ್‌ನಲ್ಲಿ ಸಾವಿರ ರನ್ ಗಡಿ ದಾಟಿದ ಆಟಗಾರ ಎನಿಸಿಕೊಂಡಿದ್ದಾರೆ.

ಇದುವರೆಗೂ ಆಡಿರುವ 21 ಇನ್ನಿಂಗ್ಸ್‌ಗಳಲ್ಲಿ 73.76 ಸರಾಸರಿ ಮತ್ತು 109.81 ಸ್ಟ್ರೈಕ್‌ರೇಟ್‌ನಲ್ಲಿ 1254 ರನ್ ಗಳಿಸಿದ್ದಾರೆ. ಏಕದಿನ ವಿಶ್ವಕಪ್‌ ಇರುವುದರಿಂದ 2023ರಲ್ಲಿ ಭಾರತ ಹೆಚ್ಚಿನ ಏಕದಿನ ಪಂದ್ಯಗಳನ್ನಾಡಲಿದ್ದು, ಮತ್ತಷ್ಟು ದಾಖಲೆಗಳನ್ನು ಸೃಷ್ಟಿಸುವ ಉತ್ಸಾಹದಲ್ಲಿದ್ದಾರೆ ಯುವ ಆಟಗಾರ.