IND vs PAK: ವಿರಾಟ್ ಕೊಹ್ಲಿ ಔಟಾಗಿದ್ದಕ್ಕೆ ಬಿಕ್ಕಿ ಅತ್ತ ಅಮೆರಿಕನ್ ಯೂಟ್ಯೂಬರ್ ಸ್ಪೀಡ್; ವಿಡಿಯೋ ವೈರಲ್

ಭಾನುವಾರ, ಜೂನ್ 9ರಂದು ನ್ಯೂಯಾರ್ಕ್‌ನ ನಸ್ಸೌ ಕೌಂಟಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ 2024ರ ಟಿ20 ವಿಶ್ವಕಪ್‌ನ ಬಹು ನಿರೀಕ್ಷಿತ ಹಣಾಹಣಿಯಲ್ಲಿ ಪಾಕಿಸ್ತಾನ ವಿರುದ್ಧ ಭಾರತ 6 ರನ್‌ಗಳ ಭರ್ಜರಿ ಗೆಲುವು ಸಾಧಿಸಿತು.

ಇದೇ ವೇಳೆ ಸೋಷಿಯಲ್ ಮೀಡಿಯಾ ಸೆನ್ಸೇಷನ್ ಮತ್ತು ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಅವರ ಅಪ್ಪಟ ಅಭಿಮಾನಿ ಐಶೋಸ್ಪೀಡ್ ಕೂಡ ನ್ಯೂಯಾರ್ಕ್‌ನ ಸ್ಟ್ಯಾಂಡ್‌ನಲ್ಲಿ ಭಾಗವಹಿಸಿದ್ದರು.

ಅಮೆರಿಕನ್ ಯೂಟ್ಯೂಬರ್, ರಾಪರ್ ಮತ್ತು ಆನ್‌ಲೈನ್ ಗೇಮರ್ ಆಗಿರುವ ಸ್ಪೀಡ್, ನಸ್ಸೌ ಕೌಂಟಿಯ ತುಂಬಿದ ಕ್ರೀಡಾಂಗಣದಲ್ಲಿ ಉಪಸ್ಥಿತರಿದ್ದರು. ಅಲ್ಲಿ ಹೈ-ವೋಲ್ಟೇಜ್ ಪಂದ್ಯವನ್ನು ವೀಕ್ಷಿಸಲು ಸುಮಾರು 34,000 ಪ್ರೇಕ್ಷಕರು ಹಾಜರಿದ್ದರು.

ಶರ್ಟ್‌ನ ಹಿಂಭಾಗದಲ್ಲಿ ವಿರಾಟ್ ಕೊಹ್ಲಿ ಮತ್ತು 18ನೇ ನಂಬರ್ ಅಚ್ಚೊತ್ತಿದ ಭಾರತ ತಂಡದ ನೀಲಿ ಬಣ್ಣದ ಜೆರ್ಸಿ ಧರಿಸಿ, ಸ್ಪೀಡ್ ಅವರು ಟೀಮ್ ಇಂಡಿಯಾಗೆ ತಮ್ಮ ಬೆಂಬಲವನ್ನು ಪ್ರದರ್ಶಿಸಿದರು.

ಭಾರತದ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಔಟಾದ ಬಳಿಕ ಸ್ಪೀಡ್ ಬೇಸರಗೊಂಡಿದ್ದರು. ಕೊನೆಯಲ್ಲಿ ಭಾರತೀಯ ಅಭಿಮಾನಿಗಳೊಂದಿಗೆ ಭಾರತ ತಂಡದ ಗೆಲುವನ್ನು ಆಚರಿಸಿದಾಗ ಸ್ಪೀಡ್ ಅವರ ಪ್ರತಿಕ್ರಿಯೆಗಳು ವೈರಲ್ ಆಗಿವೆ.

ಕೊಹ್ಲಿ ಕೇವಲ 4 ರನ್‌ಗಳಿಗೆ ಔಟಾದರು ಮತ್ತು ಟಿ20 ಪಂದ್ಯಗಳಲ್ಲಿ ನೆರೆಯ ದೇಶದ ವಿರುದ್ಧ ತಮ್ಮ ಮೊದಲ ಏಕ ಅಂಕಿ ಸ್ಕೋರ್ ದಾಖಲಿಸಿದರು. ಒಂದು ವಿಡಿಯೋದಲ್ಲಿ, ವಿರಾಟ್ ಕೊಹ್ಲಿ ಪಾಕಿಸ್ತಾನ ತಂಡದ ವಿರುದ್ಧ ಅಪರೂಪದ ವೈಫಲ್ಯವನ್ನು ಅನುಭವಿಸಿದ ಬಳಿಕ, ಅಮೆರಿಕನ್ ಯೂಟ್ಯೂಬರ್ ಸ್ಪೀಡ್ ಕಣ್ಣೀರಿಟ್ಟು ಅತ್ತರು.

ಮೊದಲ ಇನ್ನಿಂಗ್ಸ್‌ನಲ್ಲಿ ಮಳೆ-ವಿರಾಮದ ನಂತರ, ಪಂದ್ಯ ಪುನರಾರಂಭಗೊಂಡ ಬಳಿಕ 2ನೇ ಓವರ್‌ನ 2ನೇ ಎಸೆತದಲ್ಲಿ ನಸೀಮ್ ಶಾ ಅವರ ಎಸೆತದಲ್ಲಿ ವಿರಾಟ್ ಕೊಹ್ಲಿ ಅಸಾಧಾರಣ ಶಾಟ್ ಆಡಿ ಬೌಂಡರಿ ಗಳಿಸಿದರು.

ಮುಂದಿನ ಎಸೆತದಲ್ಲಿ ವಿರಾಟ್ ಕೊಹ್ಲಿ ವೈಡ್ ಔಟ್-ಆಫ್ ಎಸೆತವನ್ನು ಪಾಯಿಂಟ್ ಓವರ್‌ಗೆ ಸ್ಲ್ಯಾಪ್ ಮಾಡಲು ಪ್ರಯತ್ನಿಸಿದಾಗ ಉಸ್ಮಾನ್ ಖಾನ್ ಅವರು ಉತ್ತಮ ಕ್ಯಾಚ್ ಪಡೆದರು. ಈ ಮೂಲಕ ವಿರಾಟ್ ಕೊಹ್ಲಿ ಅವರ ಬೃಹತ್ ವಿಕೆಟ್‌ನಿಂದ ಭಾರತಕ್ಕೆ ಆರಂಭಿಕ ಆಘಾತ ಎದುರಿಸಿತು.

ಈ ಇನ್ನಿಂಗ್ಸ್‌ಗೂ ಮುನ್ನ ವಿರಾಟ್ ಕೊಹ್ಲಿ ಟಿ20 ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ವಿರುದ್ಧ 308 ರನ್‌ ಗಳಿಸಿದ್ದರು. ಬೇಸರಗೊಂಡು ವಿರಾಟ್ ಕೊಹ್ಲಿ ಪೆವಿಲಿಯನ್‌ಗೆ ನಿರ್ಗಮಿಸುವುದನ್ನು ಸ್ಪೀಡ್‌ಗೆ ಜೀರ್ಣಿಸಿಕೊಳ್ಳಲು ಸಾಧ್ಯವಾಗಲಿಲ್ಲ ಮತ್ತು ಬಿಕ್ಕಿ ಅತ್ತರು. ಆದಾಗ್ಯೂ, ಸ್ಟ್ಯಾಂಡ್‌ನಲ್ಲಿರುವ ಭಾರತೀಯ ಬೆಂಬಲಿಗರೊಬ್ಬರು ಸ್ಪೀಡ್ ಅವರನ್ನು ಶಾಂತವಾಗಿರುವಂತೆ ಕೇಳಿಕೊಂಡರು.

ಅಂತಿಮವಾಗಿ ಪಾಕಿಸ್ತಾನ ವಿರುದ್ಧ ಭಾರತ 119 ರನ್‌ಗಳಿಗೆ ಆಲೌಟ್ ಆದ ನಂತರ, ಭಾರತೀಯ ಬೌಲರ್‌ಗಳು ಭಾರತಕ್ಕೆ ಒಂದು ಮಹಾಕಾವ್ಯದ ಕಥೆಯನ್ನು ಬರೆದರು. ಜಸ್ಪ್ರೀತ್ ಬುಮ್ರಾ ಅವರು ತಮ್ಮ 4 ಓವರ್‌ಗಳ ಕೋಟಾದಲ್ಲಿ 3 ನಿರ್ಣಾಯಕ ವಿಕೆಟ್‌ಗಳನ್ನು ಪಡೆದರು ಮತ್ತು ಕೇವಲ 14 ರನ್‌ಗಳನ್ನು ನೀಡಿ ಪಂದ್ಯಶ್ರೇಷ್ಠ ಆಟಗಾರ ಪ್ರಶಸ್ತಿಗೆ ಭಾಜನರಾದರು.

ಪಾಕಿಸ್ತಾನ 7 ವಿಕೆಟ್ ನಷ್ಟಕ್ಕೆ 113 ರನ್‌ಗಳಿಗೆ ಸೀಮಿತವಾಗಿದ್ದರಿಂದ, ಟಿ20 ವಿಶ್ವಕಪ್‌ನಲ್ಲಿ ಕಳೆದ 8 ಪಂದ್ಯಗಳಲ್ಲಿ ಭಾರತ 7ನೇ ಬಾರಿಗೆ ಗೆಲುವು ಸಾಧಿಸಿತು. ಗೆಲುವಿನ ನಂತರ ಸ್ಪೀಡ್ ಕೂಡ ಸಂಭ್ರಮಾಚರಣೆಯೊಂದಿಗೆ ಹೊರಬಂದರು. ಸ್ಪೀಡ್ ಭಾರತೀಯ ಅಭಿಮಾನಿಗಳೊಂದಿಗೆ ಸಂಭ್ರಮದ ವಾತಾವರಣವನ್ನು ಆನಂದಿಸಿದರು.

2023ರ ಏಕದಿನ ವಿಶ್ವಕಪ್ ಸಮಯದಲ್ಲಿ, ಭಾರತ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯವನ್ನು ವೀಕ್ಷಿಸಲು ಅಮೆರಿಕನ್ ಯೂಟ್ಯೂಬರ್ ಸ್ಪೀಡ್ ಅಕ್ಟೋಬರ್ 14ರಂದು ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಉಪಸ್ಥಿತರಿದ್ದರು.