'ನೀನಾ ನಿಜವಾದ ಮುಸ್ಲಿಮಾ?' ಶಮಿಗೆ ಪ್ರಶ್ನೆ

ಕೋಲ್ಕತಾ, ಜುಲೈ 20: ಟೀಂ ಇಂಡಿಯಾದ ವೇಗಿಗಳ ಟೈಮ್ ಯಾಕೋ ಸರಿಯಿಲ್ಲ ಎನಿಸುತ್ತದೆ. ಜೋಗಿಂದರ್ ಶರ್ಮ, ಉಮೇಶ್ ಯಾದವ್, ಮೊಹಮ್ಮದ್ ಶಮಿ, ಇರ್ಫಾನ್ ಪಠಾಣ್ ಸದ್ಯಕ್ಕೆ ಸುದ್ದಿಯಲ್ಲಿದ್ದಾರೆ.

ಮೊಹಮ್ಮದ್ ಶಮಿ ಅವರನ್ನು ಮತ್ತೊಮ್ಮೆ ಗೇಲಿ ಮಾಡಲಾಗಿದೆ. ನೀನು ನಿಜವಾದ ಮುಸ್ಲಿಮಾ? ಎಂದು ಪ್ರಶ್ನಿಸಲಾಗಿದೆ. ಪತ್ನಿ, ಪುತ್ರಿ ಜತೆಗಿನ ಹುಟ್ಟುಹಬ್ಬದ ಚಿತ್ರವೊಂದರನ್ನು ಶಮಿ ಹಂಚಿಕೊಂಡಿದ್ದು ಈಗ ಚರ್ಚೆಯ ವಿಷಯವಾಗಿದೆ.

ಇರ್ಫಾನ್ ಪಠಾಣ್ ಅವರ ಪತ್ನಿ ಸಫಾ ಅವರು ಉಗುರಿಗೆ ಬಣ್ಣ ಹಾಕಿದ್ದನ್ನು ಪ್ರಶ್ನಿಸಿದ್ದ ಮಂದಿ, ಈಗ ಮೊಹಮ್ಮದ್ ಶಮಿ ಅವರ ಪತ್ನಿ ಹಸಿನ್ ಜಹಾನ್ ಅವರ ಮೇಲೆ ಬಿದ್ದಿದೆ. ಶಮಿ ಅವರ ಪತ್ನಿ ಹಸಿನ್ ಅವರು ಹಿಜಾಬ್ (ಬುರ್ಖಾ) ಧರಿಸಿದೆ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಈ ಹಿಂದೆ ಕಿಸ್ಮಸ್ ಹಬ್ಬದ ಸಂದರ್ಭದಲ್ಲಿ ಹಸಿನ್ ಅವರು ಧರಿಸಿದ್ದ ಡ್ರೆಸ್ ಬಗ್ಗೆ ಆಕ್ಷೇಪ ವ್ಯಕ್ತವಾಗಿತ್ತು. ಇತ್ತೀಚೆಗೆ ಸೌಥ್ ಸಿಟಿ ಮಾಲ್ ಬಳಿಯ ಕಾಟ್ಜುನಗರ್ ನಲ್ಲಿ ಶಮಿ ಅವರ ಕಾರು ಚಾಲಕ ಹಾಗೂ ಯುವಕರ ಗುಂಪಿನ ನಡುವೆ ಕಿತ್ತಾಟ ನಡೆದಿತ್ತು. ಮೂವರು ಯುವಕರನ್ನು ಪೊಲೀಸರು ಬಂಧಿಸಿದ್ದರು.