ಭಾರತ vs ಆಸ್ಟ್ರೇಲಿಯಾ: 32 ವರ್ಷಗಳ ಹಿಂದಿನ ದಾಖಲೆ ಮುರಿದ ಧೋನಿ!

ಗವಾಸ್ಕರ್ ದಾಖಲೆ ಬದಿಗೆ

37 ವರ್ಷ 191 ದಿನ ಹರೆಯದವರಾಗಿದ್ದ ಗವಾಸ್ಕರ್ 1987ರಲ್ಲಿ ಶ್ರೀಲಂಕಾ ವಿರುದ್ಧದ ಸರಣಿಯಲ್ಲಿ ಸರಣಿ ಶ್ರೇಷ್ಠ ಪ್ರಶಸ್ತಿ ಜಯಿಸಿದ್ದರು. ಆದರೆ ಭಾರತ ಪರ ಸರಣಿ ಶ್ರೇಷ್ಠ ಪ್ರಶಸ್ತಿ ಜಯಿಸಿದ ಅತೀ ಹಿರಿಯ ಆಟಗಾರ ಎಂಬ ಅಪರೂಪದ ದಾಖಲೆಯೀಗ ಧೋನಿ ಹೆಸರಿನಲ್ಲಿದೆ.

7ನೇ ಸರಣಿ ಶ್ರೇಷ್ಠ ಪ್ರಶಸ್ತಿ

ಇದು ಧೋನಿಗೆ ಲಭಿಸುತ್ತಿರುವ 7ನೇ ಸರಣಿಶ್ರೇಷ್ಠ ಪ್ರಶಸ್ತಿಯೂ ಹೌದು. ಈ ಸಾಧನೆಗಾಗಿ ಧೋನಿ ಅವರು ವಿರಾಟ್ ಕೊಹ್ಲಿ, ಸೌರವ್ ಗಂಗೂಲಿ, ಯುವರಾಜ್ ಸಿಂಗ್, ಹಾಶಿಮ್ ಆಮ್ಲಾ (ದಕ್ಷಿಣ ಆಫ್ರಿಕಾ), ವಿವಿಯನ್ ರಿಚರ್ಡ್ಸ್ (ವೆಸ್ಟ್ ಇಂಡೀಸ್) ಮತ್ತು ಎಬಿಡಿವಿಲಿಯರ್ಸ್ (ದಕ್ಷಿಣ ಆಫ್ರಿಕಾ) ಜೊತೆ ಸಮಾನ ಸ್ಥಾನ ಹಂಚಿಕೊಂಡಿದ್ದಾರೆ.

8 ವರ್ಷಗಳ ಬಳಿಕ ಸರಣಿ ಶ್ರೇಷ್ಠ

ಧೋನಿ ಸರಣಿ ಶ್ರೇಷ್ಠನಾಗಿ ಗುರುತಿಸಿಕೊಂಡಿದ್ದು ಸುಮಾರು 8 ವರ್ಷಗಳ ಬಳಿಕ. ಕೊಂಚ ಕಾಲ ಫಾರ್ಮ್ ಕಳೆದುಕೊಂಡು ಕ್ರಿಕೆಟ್ ಅಭಿಮಾನಿಗಳಿಂದ ಟೀಕಿಸಲ್ಪಟ್ಟಿದ್ದ ಧೋನಿ ಮತ್ತೀಗ ಲಯಕ್ಕೆ ಮರಳುವ ಸೂಚನೆ ನೀಡುತ್ತಿದ್ದಾರೆ. ಅದ್ಹಾಂಗೆ ಧೋನಿಗೆ ಕಡೆಯಸಾರಿ ಮ್ಯಾನ್ ಆಫ್‌ ದ ಸೀರೀಸ್ ಲಭಿಸಿದ್ದು 2011ರಲ್ಲಿ!

ಮ್ಯಾಚ್ ಫಿನಿಷರ್

ಎಂಸಿಜಿಯಲ್ಲಿ ನಡೆದ ಭಾರತ-ಆಸೀಸ್ ಅಂತಿಮ ಏಕದಿನ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ಆಸ್ಟ್ರೇಲಿಯಾ 231 ರನ್ ಗುರಿ ನೀಡಿತ್ತು. ಭಾರತ 49.2 ಓವರ್‌ನಲ್ಲಿ 3 ವಿಕೆಟ್ ಕಳೆದು 234 ರನ್ ಪೇರಿಸಿ ಗೆಲುವನ್ನಾಚರಿಸಿತು. ಪಂದ್ಯದ ಕೊನೆಯವರೆಗೂ ಕ್ರೀಸ್‌ಗೆ ಅಂಟಿ ನಿಂತಿದ್ದ ಧೋನಿ ಮತ್ತೊಮ್ಮೆ ಮ್ಯಾಚ್ ಫಿನಿಷರ್ ಅನ್ನಿಸಿಕೊಂಡಿದ್ದರು.