ಔಟ್ ಇದ್ದರೂ ನಾಟ್ ಔಟ್: ಕಾಲಿನಿಂದ ಒದ್ದು ಆಕ್ರೋಶ ವ್ಯಕ್ತಪಡಿಸಿದ ಅಶ್ವಿನ್; ವಿಡಿಯೋ ವೈರಲ್

ಅಶ್ವಿನ್ ಎಸೆತದಲ್ಲಿ ಟಾಮ್ ಲಾಥಮ್ ಔಟ್ ಆಗಿದ್ದರು

ನ್ಯೂಜಿಲೆಂಡ್ ಮೊದಲನೇ ಇನಿಂಗ್ಸ್ ಬ್ಯಾಟಿಂಗ್ ಆರಂಭಿಸಿದಾಗ ಆರಂಭಿಕ ಆಟಗಾರರಾಗಿ ಕಣಕ್ಕಿಳಿದ ಟಾಮ್ ಲಾಥಮ್ ಮತ್ತು ವಿಲ್ ಯಂಗ್ ಉತ್ತಮ ಆರಂಭವನ್ನು ಮಾಡಿದರು. ಎರಡನೇ ದಿನದಾಟದಂತ್ಯಕ್ಕೆ 129 ರನ್ ಕಲೆಹಾಕಿದ ಈ ಜೋಡಿ ವಿಕೆಟ್ ಕಳೆದುಕೊಳ್ಳದೆ ಉತ್ತಮ ಪ್ರದರ್ಶನ ನೀಡಿತು. ನಂತರ ತೃತೀಯ ದಿನ ಆರಂಭವಾದಾಗ ರವಿಚಂದ್ರನ್ ಅಶ್ವಿನ್ ಅವರ ಎಸೆತದಲ್ಲಿ ಟಾಮ್ ಲಾಥಮ್ 66 ರನ್ ಗಳಿಸಿದ್ದಾಗ ಎಲ್ ಬಿ ಡಬ್ಲ್ಯೂ ಆಗಿದ್ದರು. ರವಿಚಂದ್ರನ್ ಎಸೆದ ಸ್ಪಷ್ಟವಾದ ಎಸೆತವನ್ನು ಎದುರಿಸಲಾಗದ ಟಾಮ್ ಲಾಥಮ್ ಚೆಂಡಿಗೆ ಬ್ಯಾಟ್ ತಾಗಿಸುವಲ್ಲಿ ವಿಫಲರಾಗಿದ್ದರು, ಹೀಗಾಗಿ ಚೆಂಡು ನೇರವಾಗಿ ಟಾಮ್ ಲಾಥಮ್ ಕಾಲಿಗೆ ಬಡಿದಿತ್ತು.

ರಿವ್ಯೂ ತೆಗೆದುಕೊಳ್ಳದ ಅಜಿಂಕ್ಯ ರಹಾನೆ

ಹೀಗೆ ರವಿಚಂದ್ರನ್ ಅಶ್ವಿನ್ ಎಸೆದ ಚೆಂಡು ಟಾಮ್ ಲಾಥಮ್ ಕಾಲಿಗೆ ತಾಗುತ್ತಿದ್ದಂತೆಯೇ ಟೀಮ್ ಇಂಡಿಯಾದ ಆಟಗಾರರು ಎಲ್ ಬಿ ಡಬ್ಲ್ಯು ಔಟ್ ಸಲುವಾಗಿ ಅಂಪೈರ್ ಬಳಿ ಮನವಿ ಮಾಡಿದ್ದರು. ಆದರೆ ಟೀಮ್ ಇಂಡಿಯಾದ ಪರ ತೀರ್ಪನ್ನು ನೀಡದ ಅಂಪೈರ್ ಅದನ್ನು ನಾಟ್ ಔಟ್ ಎಂದು ಪರಿಗಣಿಸಿದ್ದರು. ಈ ಸಂದರ್ಭದಲ್ಲಿ ಭಾರತ ತಂಡದ ನಾಯಕ ಅಜಿಂಕ್ಯ ರಹಾನೆ ಡಿಆರ್ ಎಸ್ ತೆಗೆದುಕೊಳ್ಳದೇ ಇದ್ದದ್ದು ಎಲ್ಲರಲ್ಲಿಯೂ ಆಶ್ಚರ್ಯವನ್ನು ಕೂಡಾ ಮೂಡಿಸಿತ್ತು. ಆದರೆ ನಂತರ ಮೈದಾನದ ಪರದೆಯ ಮೇಲೆ ಆ ಎಸೆತದ ದೃಶ್ಯವನ್ನು ಮರು ಪ್ರಸಾರ ಮಾಡಿದಾಗ ಟೀಮ್ ಇಂಡಿಯಾ ನಾಯಕ ಅಜಿಂಕ್ಯ ರಹಾನೆ ಡಿ ಆರ್ ಎಸ್ ತೆಗೆದುಕೊಳ್ಳಬೇಕಿತ್ತು ಎಂದು ಕೈ ಕೈ ಹಿಸುಕಿಕೊಂಡರು. ಇತ್ತ ಔಟ್ ಇದ್ದರೂ ಕೂಡ ವಿಕೆಟ್ ಸಿಗದ ಹತಾಶೆಯಲ್ಲಿ ರವಿಚಂದ್ರನ್ ಅಶ್ವಿನ್ ನೆಲಕ್ಕೆ ಕಾಲಿನಿಂದ ಒದೆಯುವ ಮೂಲಕ ಬೇಸರವನ್ನು ಹೊರಹಾಕಿದರು. ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು ಇಂತಹ ಎಸೆತಗಳಿಗೂ ಕೂಡ ಡಿ ಆರ್ ಎಸ್ ತೆಗೆದುಕೊಳ್ಳದೇ ಇರುವ ಅಜಿಂಕ್ಯ ರಹಾನೆ ಕುರಿತು ಟೀಕೆಗಳು ವ್ಯಕ್ತವಾಗುತ್ತಿವೆ.

ಮೊದಲನೇ ಇನ್ನಿಂಗ್ಸ್‌ನಲ್ಲಿ ನ್ಯೂಜಿಲೆಂಡ್‌ಗೆ ಹಿನ್ನಡೆ

66 ರನ್ ಗಳಿಸಿರುವಾಗಲೇ ಪೆವಿಲಿಯನ್ ಸೇರಬೇಕಿದ್ದ ಟಾಮ್ ಲಾಥಮ್ ತೀರ್ಪುಗಾರನ ತಪ್ಪಾದ ನಿರ್ಣಯದಿಂದ ಮೈದಾನದಲ್ಲಿ ಮತ್ತೊಂದಷ್ಟು ಸಮಯ ಬ್ಯಾಟ್ ಬೀಸುವ ಅವಕಾಶ ಪಡೆದರು. ಅಂತಿಮವಾಗಿ 95 ರನ್‌ಗಳಿಗೆ ತನ್ನ ಆಟವನ್ನು ಮುಗಿಸಿದೆ ಟಾಮ್ ಲಾಥಮ್ ಅಕ್ಷರ್ ಪಟೇಲ್ ಅವರಿಗೆ ವಿಕೆಟ್ ಒಪ್ಪಿಸಿದರು. ಇನ್ನು ನ್ಯೂಜಿಲೆಂಡ್ ಮೊದಲನೇ ಇನ್ನಿಂಗ್ಸ್ ಅಂತ್ಯಕ್ಕೆ 296 ರನ್‌ಗಳಿಗೆ ಆಲ್ ಔಟ್ ಆಗಿದ್ದು 49 ರನ್ ಹಿನ್ನಡೆ ಅನುಭವಿಸಿದೆ.