ಟಿ20 ವಿಶ್ವಕಪ್: ಪಾಕಿಸ್ತಾನದ ವಿರುದ್ಧ ಭಾರತ ದೊಡ್ಡ ತಪ್ಪನ್ನು ಮಾಡಿತು: ಬ್ರಾಡ್ ಹಾಜ್

ಬೌಲಿಂಗ್ ಮಾಡುವಂತಿದ್ದರೆ ಮಾತ್ರವೇ ಆತ ಆಡುವ ಬಳಗದಲ್ಲಿರಲು ಅರ್ಹ

ಆಸ್ಟ್ರೇಲಿಯಾದ ಮಾಜಿ ಸ್ಪಿನ್ನರ್ ಬ್ರಾಡ್ ಹಾಜ್ ಟೀಮ್ ಇಂಡಿಯಾದ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಬಗ್ಗೆ ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಹಾರ್ದಿಕ್ ಪಾಂಡ್ಯ ಬೌಲಿಂಗ್ ಮಾಡುವಂತಿದ್ದರೆ ಮಾತ್ರವೇ ಆತ ಆಡುವ ಬಳಗದಲ್ಲಿ ಸೇರ್ಪಡೆಯಾಗಲು ಅರ್ಹವಾದ ಆಟಗಾರ. ಬೌಲಿಂಗ್ ಮಾಡಲು ಅಸಮರ್ಥನಾಗಿದ್ದರೂ ಆಡುವ ಬಳಗದಲ್ಲಿ ಬ್ಯಾಟರ್ ಆಗಿ ಸೇರಿಸಿಕೊಳ್ಳುವ ಮೂಲಕ ಭಾರತ ಪಂದ್ಯದ ಆರಂಭಕ್ಕೂ ಮುನ್ನವೇ ದೊಡ್ಡ ತಪ್ಪೆಸಗಿತು ಎಂದಿದ್ದಾರೆ ಬ್ರಾಡ್ ಹಾಜ್.

ನೀರಸ ಪ್ರದರ್ಶನ ನೀಡಿದ ಪಾಂಡ್ಯ

ಇನ್ನು ಹಾರ್ದಿಕ್ ಪಾಂಡ್ಯ ಈ ಪಂದ್ಯದಲ್ಲಿ ಸ್ಪೆಶಲಿಸ್ಟ್ ಬ್ಯಾಟರ್ ಆಗಿ ಕಣಕ್ಕಿಳಿದು ವೈಫಲ್ಯ ಅನುಭವಿಸಿದರು. 8 ಎಸೆತ ಎದುರಿಸಿದ ಹಾರ್ದಿಕ್ ಪಾಂಡ್ಯ 11 ರನ್‌ಗಳಿಸಲಷ್ಟೇ ಶಕ್ತರಾದರು. ಬ್ಯಾಟಿಂಗ್ ವೇಳೆ ಚೆಂಡಿನ ಹೊಡೆ ತಿಂದ ಹಾರ್ದಿಕ್ ಪಾಂಡ್ಯ ನಂತರ ಫೀಲ್ಡಿಂಗ್‌ನಿಂದಲೂ ಹೊರಗುಳಿದಿದ್ದರು. ಹಾರ್ದಿಕ್ ಪಾಂಡ್ಯ ಸ್ಕ್ಯಾನಿಂಗ್‌ಗೆ ಒಳಗಾಗಿದ್ದಾರೆ ಎಂದು ಬಿಸಿಸಿಐ ನಂತರ ಖಚಿತಪಡಿಸಿದೆ.

ನನ್ನ ಪ್ರಕಾರ ಭಾರತ ಮಾಡಿದ್ದು ಅತಿ ದೊಡ್ಡ ತಪ್ಪು

"ನನ್ನ ಪ್ರಕಾರ ಹಾರ್ದಿಕ್ ಪಾಂಡ್ಯ ಅವರನ್ನು ಆಡುವ ಬಳಗದಲ್ಲಿ ಸೇರ್ಪಡೆಗೊಳಿಸುವ ಮೂಲಕ ಭಾರತ ಅತಿ ದೊಡ್ಡ ತಪ್ಪೆಸಗಿತು. ಇದಕ್ಕಾಗಿ ನನ್ನ ಬಳಿಯಿರುವ ಆಯ್ಕೆಯೆಂದರೆ ಶಾರ್ದೂಲ್ ಠಾಕೂರ್ ಅವರನ್ನು ಮೊಹಮ್ಮದ್ ಶಮಿ ಬದಲಿಗೆ ಹಾಗೂ ಹಾರ್ದಿಕ್ ಪಾಂಡ್ಯ ಬದಲಿಗೆ ಆರ್ ಅಶ್ವಿನ್ ಆಡುವ ಬಳಗಕ್ಕೆ ಸೇರ್ಒಡೆಗೊಳಿಸಬಹುದು. ಅಂಥಾ ಸಂದರ್ಭದಲ್ಲಿ ರವೀಂದ್ರ ಜಡೇಜಾ ಆರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದರೆ ಶಾರ್ದೂಲ್ 7 ಹಾಗೂ ಆರ್ ಅಶ್ವಿನ್ 8ನೇ ಕ್ರಮಾಂಕದಲ್ಲಿ ಕಣಕ್ಕಿಳಿಯುತ್ತಾರೆ. ಆತ ಆಡುವ ಬಳಗದಲ್ಲಿ ಸೇರಿಕೊಳ್ಳಬೇಕಾದರೆ ಬೌಲಿಂಗ್ ಮಾಡಲೇಬೇಕಿದೆ. ಆತನೋರ್ವ ಅದ್ಭುತ ಪ್ರತಿಭಾನ್ವಿತ ಆಟಗಾರ. ಆದರೆ ಆತ ಫ್ರಂಟ್‌ಲೈನ್ ಬ್ಯಾಟರ್ ಅಲ್ಲ" ಎಂದಿದ್ದಾರೆ ಬ್ರಾಡ್ ಹಾಜ್.

ಮುಂದಿನ ಪಂದ್ಯ ನ್ಯೂಜಿಲೆಂಡ್ ವಿರುದ್ಧ

ಮೊದಲ ಪಂದ್ಯದಲ್ಲಿ ಸೋಲು ಅನುಭವಿಸಿರುವ ಭಾರತ ತಂಡ ಎರಡನೇ ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡದ ವಿರುದ್ಧ ಸೆಣೆಸಾಡಲಿದೆ. ಈ ಪಂದ್ಯ ಮುಂದಿನ ಭಾನುವಾರ ನಡೆಯಲಿದ್ದು ಬಲಿಷ್ಠ ಕಿವೀಸ್ ಪಡೆಯ ಮುಂದೆ ಭಾರತ ಗೆಲ್ಲಬೇಕಿದೆ. ಈ ಮೂಲಕ ಭಾರತ ಕಮ್‌ಬ್ಯಾಕ್ ಮಾಡುವುದು ಅಗತ್ಯವಾಗಿದೆ.