ಭಾರತ vs ಶ್ರೀಲಂಕಾ: ಟಿ20 ಸಿರೀಸ್, ಯಾವಾಗ? ಎಲ್ಲಿ? ನೇರಪ್ರಸಾರದ ಮಾಹಿತಿ

ಭಾರತ ಹಾಗೂ ಶ್ರೀಲಂಕಾ ತಂಡಗಳ ನಡುವಿನ ಏಕದಿನ ಸರಣಿ ಸಂಪೂರ್ಣವಾಗಿದ್ದು ಈಗ ಎರಡು ತಂಡಗಳ ಚಿತ್ತ ಟಿ20 ಸರಣಿಯ ಮೇಲಿದೆ. ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಭಾರತ 2-1 ಅಂತರದಿಂದ ಗೆಲುವು ಸಾಧಿಸಿದೆ. ಈಗ ಮೂರು ಪಂದ್ಯಗಳ ಟಿ20 ಸರಣಿಗೆ ಎರಡು ತಂಡಗಳು ಕೂಡ ಸಿದ್ಧತೆ ನಡೆಸುತ್ತಿವೆ. ಭಾನುವಾರ ಈ ಸರಣಿಯ ಮೊದಲ ಪಂದ್ಯ ನಡೆಯಲಿದೆ.

ಭಾರತ ಹಾಗೂ ಶ್ರೀಲಂಕಾ ನಡುವಿನ ಏಕದಿನ ಸರಣಿ ಕೊಲಂಬೋದ ಪ್ರೇಮದಾಸ ಕ್ರೀಡಾಂಗಣದಲ್ಲಿ ನಡೆದಿತ್ತು. ಟಿ20 ಸರಣಿಯು ಕೂಡ ಇದೇ ಅಂಗಳದಲ್ಲಿ ನಡೆಯಲಿದೆ. ಕೊರೊನಾವೈರಸ್‌ನ ಕಾರಣದಿಂದಾಗಿ ಮುಂಜಾಗೃತಾ ಕ್ರಮವಾಗಿ ಒಂದೇ ಕ್ರೀಡಾಂಗಣದಲ್ಲಿ ಸಂಪೂರ್ಣ ಸರಣಿಯನ್ನು ಏರ್ಪಡಿಸಲಾಗಿದೆ.

ಏಕದಿನ ಸರಣಿಯಲ್ಲಿ ಭಾರತ ಬಹುತೇಕ ಎಲ್ಲಾ ವಿಭಾಗಗಳಲ್ಲಿಯೂ ಮೇಲುಗೈ ಸಾಧಿಸಿದೆ. ಶ್ರೀಲಂಕಾ ತನ್ನ ಪೂರ್ಣ ಸಾಮರ್ಥ್ಯದ ತಂಡವನ್ನು ಹೊಂದಿರುವ ಹೊರತಾಗಿಯೂ ಭಾರತದ ಯುವ ಆಟಗಾರರ ವಿರುದ್ಧ ಉತ್ತಮ ಪ್ರದರ್ಶನ ನೀಡಲು ಸಾಧ್ಯವಾಗದಿರುವುದು ಸಾಕಷ್ಟು ಟೀಕೆಗೆ ಕಾರಣವಾಗಿದೆ.

ಮತ್ತೊಂದೆಡೆ ಈ ಬಾರಿಯ ಟಿ20 ವಿಶ್ವಕಪ್‌ಗೆ ಇನ್ನು ಕೆಲವೇ ದಿನಗಳು ಬಾಕಿಯಿದೆ. ಮಹತ್ವದ ಟೂರ್ನಿಯಲ್ಲಿ ಭಾಗವಹಿಸುವ ಮುನ್ನ ಆತ್ಮವಿಶ್ವಾಸವನ್ನು ಗಳಿಸಬೇಕಾದರೆ ಶ್ರೀಲಂಕಾ ತಂಡಕ್ಕೆ ಚುಟುಕು ಸರಣಿಯಲ್ಲಾದರೂ ಗೆಲುವು ಅನಿವಾರ್ಯವಾಗಿದೆ. ಭಾರತದ ಯುವ ಆಟಗಾರರಿಗೆ ಐಪಿಎಲ್‌ನಲ್ಲಿ ಆಡಿದ ಅನುಭವವನ್ನು ಲಂಕಾ ಸರಣಿಯಲ್ಲಿ ಬಳಸಿಕೊಳ್ಳಲು ಉತ್ತಮ ಅವಕಾಶ ದೊರೆತಿದೆ.

ವೇಳಾಪಟ್ಟಿ:
1ನೇ ಟಿ20 ಪಂದ್ಯ - ಜುಲೈ 25, 8:00 PM, ಕೊಲಂಬೊ
2ನೇ ಟಿ 20 ಪಂದ್ಯ - ಜುಲೈ 27, 8:00 PM, ಕೊಲಂಬೊ
3ನೇ ಟಿ 20 ಪಂದ್ಯ - ಜುಲೈ 29, 8:00 PM, ಕೊಲಂಬೊ

ನೇರಪ್ರಸಾರ:

ಸೋನಿ ನೆಟ್‌ವರ್ಕ್
ಲೈವ್‌ಸ್ಟ್ರೀಮ್: ಸೋನಿ ಲಿವ್