ಭಾರತ-ವಿಂಡೀಸ್: ಟೆಸ್ಟ್‌ನಲ್ಲಿ ಇತ್ತಂಡಗಳ ಕುತೂಹಲಕಾರಿ ಅಂಕಿ-ಅಂಶಗಳು

ಭಾರತದ ಮೊದಲ ಗೆಲುವು

ವೆಸ್ಟ್ ಇಂಡೀಸ್ ನೆಲದಲ್ಲಿ ಭಾರತ ಕ್ರಿಕೆಟ್ ತಂಡ ಮೊದಲ ಟೆಸ್ಟ್ ಸರಣಿ ಗೆದ್ದಿದ್ದು 1970/71ರ ಪ್ರವಾಸದ ವೇಳೆ. ಐದು ಪಂದ್ಯಗಳ ಟೆಸ್ಟ್ ಸರಣಿಯನ್ನು ಭಾರತ 1-0ಯ ಅಂತರದಿಂದ ಗೆದ್ದಿತ್ತು. ಪೋರ್ಟ್ ಆಫ್ ಸ್ಟೇನ್‌ನಲ್ಲಿ ನಡೆದಿದ್ದ ಪಂದ್ಯವನ್ನು ಭಾರತ 7 ವಿಕೆಟ್‌ನಿಂದ ಜಯಿಸಿತ್ತು. ಈ ಟೆಸ್ಟ್ ಸರಣಿಯಲ್ಲಿ ಸುನಿಲ್ ಗವಾಸ್ಕರ್ ಪಾದಾರ್ಪಣೆ ಮಾಡಿದ್ದರು.

ಮತ್ತೆ ಭಾರತ ಜಯಭೇರಿ

ಆ ಬಳಿಕ 2006ರಲ್ಲಿ ಕನ್ನಡಿಗ ರಾಹುಲ್ ದ್ರಾವಿಡ್ ನಾಯಕತ್ವದಲ್ಲೂ ಭಾರತ, ಕೆರಿಬಿಯನ್ ನೆಲದಲ್ಲಿ 1-0ಯಿಂದ ಟೆಸ್ಟ್ ಸರಣಿ ಗೆದ್ದಿತ್ತು. ಅದಾಗಿ 2011ರಲ್ಲಿ ಎಂಎಸ್ ಧೋನಿ ನಾಯಕತ್ವದಲ್ಲಿ ವಿಂಡೀಸ್ ಪ್ರವಾಸ ಸರಣಿಯಲ್ಲಿ 1-0ಯ ಜಯಭೇರಿ, 2016ರಲ್ಲಿ ವಿರಾಟ್ ಕೊಹ್ಲಿ ನಾಯಕತ್ವದಲ್ಲಿ 2-0ಯಿಂದ ಸರಣಿ ಗೆದ್ದಿತ್ತು.

ಗವಾಸ್ಕರ್ ಹೆಸರಲ್ಲಿ ದಾಖಲೆ

ಭಾರತ-ವಿಂಡೀಸ್ ಟೆಸ್ಟ್ ಸರಣಿಗಳಲ್ಲಿ ಅತ್ಯಧಿಕ ರನ್ ದಾಖಲೆ ಮಾಜಿ ಕ್ರಿಕೆಟಿಗ ಸುನಿಲ್ ಗವಾಸ್ಕರ್ ಹೆಸರಿನಲ್ಲಿದೆ. ಗವಾಸ್ಕರ್ ವೆಸ್ಟ್ ಇಂಡೀಸ್ ವಿರುದ್ಧ 27 ಟೆಸ್ಟ್ ನಲ್ಲಿ 65.45 ಸರಾಸರಿಯಲ್ಲಿ 2749 ರನ್ ಗಳಿಸಿದ್ದಾರೆ. ಇದರಲ್ಲಿ 13 ಶತಕಗಳು ಮತ್ತು 7 ಅರ್ಧಶತಕಗಳೂ ಸೇರಿವೆ.

ದ್ರಾವಿಡ್‌ಗೆ ದ್ವಿತೀಯ ಸ್ಥಾನ

ಇತ್ತಂಡಗಳ ಟೆಸ್ಟ್‌ನಲ್ಲಿ ಅತ್ಯಧಿಕ ರನ್ ಬಾರಿಸಿದ ದ್ವಿತೀಯ ಭಾರತೀಯನಾಗಿ 'ಗ್ರೇಟ್‌ ವಾಲ್' ಖ್ಯಾತಿಯ ದ್ರಾವಿಡ್ ಗುರುತಿಸಿಕೊಂಡಿದ್ದಾರೆ. ದ್ರಾವಿಡ್ 23 ಪಂದ್ಯಗಳಲ್ಲಿ 1978 ರನ್ ಸಾಧನೆ ಹೊಂದಿದ್ದಾರೆ. ಇದರಲ್ಲಿ 5 ಶತಕ, 13 ಅರ್ಧಶತಕಗಳು ಸೇರಿವೆ. ಇತ್ತಂಡಗಳ ಟೆಸ್ಟ್‌ನಲ್ಲಿ ಅತ್ಯಧಿಕ ವಿಕೆಟ್ ದಾಖಲೆ ಮಾಜಿ ನಾಯಕ ಕಪಿಲ್ ದೇವ್ ಹೆಸರಿನಲ್ಲಿದೆ. ದೇವ್, 25 ಪಂದ್ಯಗಳಲ್ಲಿ 89 ವಿಕೆಟ್ ಪಡೆದಿದ್ದಾರೆ.