ಇನ್ಜಮಾಮ್ ಪ್ರಕಾರ ಕ್ರಿಕೆಟ್ ಆಟದ ದಿಕ್ಕನ್ನೇ ಬದಲಿಸಿದ ಮೂರು ಆಟಗಾರರು ಇವರಂತೆ !

ಮೂರು ವಿಭಿನ್ನ ಕಾಲದ ಆಟಗಾರರನ್ನು ಹೆಸರಿಸಿದ ಹಕ್

ಪಾಕಿಸ್ತಾನದ ಮಾಜಿ ನಾಯಕ ಇನ್ಜಮಾಮ್ ಉಲ್ ಹಕ್ ಕ್ರಿಕೆಟ್‌ ಆಟದ ಶೈಲಿಯನ್ನು ಮತ್ತು ರೀತಿಯನ್ನು ಬದಲಾಯಿಸಿದ ಆಟಗಾರರು ಇವರು ಎಂದು ಮೂವರು ಆಟಗಾರರ ಹೆಸರನ್ನು ಹೇಳಿದ್ದಾರೆ. ಅದಕ್ಕೆ ಇನ್ಜಿ ಕಾರಣವನ್ನೂ ಕೊಟ್ಟಿದ್ದಾರೆ. ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಈ ಮಾತನ್ನು ಹಕ್ ಹೇಳಿದ್ದಾರೆ.

ಯಾರು ಆ ಆಟಗಾರರು

ಇನ್ಜಮಾಮ್ ಉಲ್ ಹಕ್ ಹೆಸರಿಸಿದ ಮೊದಲ ಆಟಗಾರ ಬೇರೆ ಯಾರೂ ಅಲ್ಲ. ಅದು ವೆಸ್ಟ್ ಇಂಡೀಸ್‌ನ ಕ್ರಿಕೆಟ್ ದಿಗ್ಗಜ ವಿವಿಯನ್ ರಿಚರ್ಡ್ಸ್. ಈ ಹಿಂದೆ ಕ್ರಿಕೆಟ್‌ನಲ್ಲಿ ದೊಡ್ಡ ಬದಲಾವಣೆಯನ್ನು ತಂದ ಆಟಗಾರ ರಿಚರ್ಡ್ಸ್. ವೇಗದ ಬೌಲರ್‌ಗಳನ್ನೂ ಮುನ್ನುಗ್ಗಿ ಬಂದು ದೊಡ್ಡ ಹೊಡೆತಗಳನ್ನು ಬಾರಿಸಬಹುದು ಎಂದು ತೋರಿಸಿದ ಆಟಗಾರ ಎಂದು ವಿವಿಯನ್ ಬಗ್ಗೆ ಹೊಗಳಿಕೆಯ ಮಾತುಗಳನ್ನು ಆಡಿದ್ದಾರೆ.

ಶ್ರೀಲಂಕಾದ ಸ್ಪೋಟಕ ಆಟಗಾರ

ಶ್ರೀಲಂಕಾದ ಲೆಜೆಂಡರಿ ಆಟಗಾರ ಸನತ್ ಜಯಸೂರ್ಯ ಕ್ರಿಕೆಟ್‌ ಆಟದ ರೀತಿಯನ್ನು ಬದಲಾಯಿಸಿದ ಮತ್ತೋರ್ವ ಆಟಗಾರ ಎಂಬುದು ಇನ್ಜಮಾಮ್ ಉಲ್ ಹಕ್ ಅಭಿಮತ. ಆರಂಭದ 15 ಓವರ್‌ಗಳಲ್ಲಿ ವೇಗದ ಬೌರರ್‌ಗಳನ್ನು ಯಾವ ರೀತಿ ದಂಡಿಸಬೇಕೆಂದು ಸನತ್ ಜಯಸೂರ್ಯ ತೋರಿಸಿಕೊಟ್ಟರು. ಜಯಸೂರ್ಯ ಬರುವ ಮುನ್ನ ಗಾಳಿಯಲ್ಲಿ ಚೆಂಡನ್ನು ಬಾರಿಸುವುದು ಉತ್ತಮ ಬ್ಯಾಟ್ಸ್‌ಮನ್‌ನ ಲಕ್ಷಣ ಎಂದೆನಿಸುಕೊಳ್ಳುತ್ತಿರಲಿಲ್ಲ. ಆದರೆ ಈ ದೃಷ್ಟಿಕೋನವನ್ನು ಜಯಸೂರ್ಯ ಬದಲಾಯಿಸಿದರು ಎಂಬ ಅಭಿಪ್ರಾಯವನ್ನು ಹಕ್ ವ್ಯಕ್ತಪಡಿಸಿದ್ದಾರೆ.

ದಕ್ಷಿಣ ಆಫ್ರಿಕಾದ ಮಿಸ್ಟರ್ 360 ಡಿಗ್ರಿ

ಪಾಕಿಸ್ತಾನದ ಮಾಜಿ ನಾಯಕನ ಪ್ರಕಾರ ಕ್ರಿಕೆಟ್‌ ಆಟದ ರೀತಿಯನ್ನು ಬದಲಾಯಿಸಿದ ಮತ್ತೋರ್ವ ಆಟಗಾರ ಎಂದರೆ ಅದು ದಕ್ಷಿಣ ಆಫ್ರಿಕಾದ ಆಟಗಾರ ಎಬಿ ಡಿವಲಿಯರ್ಸ್. ಮೊದಲು ಆಟಗಾರರು ನೇರವಾಗಿ ಬ್ಯಾಟ್‌ಬೀಸುವುದು ಮಾತ್ರವೇ ಕರಗತ ಮಾಡಿಕೊಂಡಿದ್ದರು. ಆದರೆ ಎಬಿ ಡಿವಿಲಿಯರ್ಸ್ ಪೆಡ್ಲ್ ಸ್ವೀಪ್, ರಿವರ್ಸ್ ಸ್ವೀಪ್‌ಗಳನ್ನು ಪರಿಣಾಮಕಾರಿಯಾಗಿ ವೇಗದ ಬೌಲರ್‌ಗಳ ಮುಂದೆ ಬಾರಿಸಿ ಆಟದ ಶೈಲಿಯನ್ನು ಬದಲಾಯಿಸಿದರು.

ಭಾರತೀಯರನ್ನೇ ಗುರುತಿಸದ ಹಕ್

ಪಾಕಿಸ್ತಾನದ ಮಾಜಿ ಆಟಗಾರ ಇನ್ಜಮಾಮ್ ಉಲ್ ಹಕ್ ಕ್ರಿಕೆಟ್ ಆಟದ ರೀತಿಯನ್ನು ಬದಲಾಯಿಸಿದ ಆಟಗಾರರು ಎಂದು ಈ ಮೂವರು ಆಟಗಾರರನ್ನು ಹೆಸರಿಸಿದ್ದಾರೆ. ಆದರೆ ಇದರಲ್ಲಿ ಯಾವುದೇ ಭಾರತೀಯರ ಹೆಸರನ್ನು ಹಕ್ ಉಲ್ಲೇಖಿಸಿಲ್ಲ ಎಂಬುದು ಗಮನಾರ್ಹ ಸಂಗತಿ. ಸುನಿಲ್ ಗವಾಸ್ಕರ್, ಸಚಿನ್ ತೆಂಡೂಲ್ಕರ್, ವೀರೇಂದ್ರ ಸೆಹ್ವಾಗ್, ವಿರಾಟ್ ಕೊಹ್ಲಿ ರೋಹಿತ್ ಶರ್ಮಾರಂತಾ ಆಟಗಾರರನ್ನು ಹೊಂದಿದ್ದರೂ ಹಕ್ ಬೇಕೆಂದೇ ಭಾರತೀಯ ಆಟಗಾರರನ್ನು ನಿರ್ಲಕ್ಷ್ಯ ಮಾಡಿದರೆ ಎನ್ನುವುದನ್ನು ಕ್ರಿಕೆಟ್ ಅಬಿಮಾನಿಗಳು ಚರ್ಚಿಸುತ್ತಿದ್ದಾರೆ.