ಫೇಕ್ ಐಪಿಎಲ್ ವೇಳಾಪಟ್ಟಿ ವೈರಲ್: ಆರಂಭ, ಅಂತ್ಯದ ದಿನಾಂಕ ರೀಲಾ?!

ವೈರಲ್ ಆಗಿದ್ದ ದಿನಾಂಕಗಳು

'ಈ ಬಾರಿಯ ಐಪಿಎಲ್ ಸೆಪ್ಟೆಂಬರ್ 19ರಂದು (ಶನಿವಾರ) ಆರಂಭಗೊಳ್ಳೋದು ಬಹುತೇಕ ಪಕ್ಕಾ ಆಗಿದೆ. ಫೈನಲ್ ಪಂದ್ಯ ನವೆಂಬರ್ 8ರಂದು (ಭಾನುವಾರ) ನಡೆಯಲಿದೆ. ಒಟ್ಟು 51 ದಿನಗಳ ಕಾಲ ಟೂರ್ನಿ ನಡೆಯಲಿದ್ದು, ಇದು ಫ್ರಾಂಚೈಸಿಗಳಿಗೆ, ಪ್ರಸಾರಕರಿಗೆ ಮತ್ತು ಮಧ್ಯಸ್ಥಗಾರರಿಗೆ ಹೊಂದಿಕೆಯಾಗಿದೆ,' ಎಂದು ಬಿಸಿಸಿಐ ಮೂಲವೊಂದು ಹೇಳಿತ್ತು.

ಖಾತರಿ ಪಡಿಸಿದ್ದ ಬ್ರಿಜೇಶ್ ಪಟೇಲ್

ಬಿಸಿಸಿಐ ಮೂಲವೊಂದು ಐಪಿಎಲ್ ಆರಂಭ, ಅಂತ್ಯದ ದಿನಾಂಕ ತಿಳಿಸಿದ ಬೆನ್ನಲ್ಲೇ ಐಪಿಎಲ್ ಅಧ್ಯಕ್ಷ ಬ್ರಿಜೇಶ್ ಪಟೇಲ್ ಕೂಡ ಇದೇ ದಿನಾಂಕಗಳನ್ನು ಖಾತರಿಪಡಿಸಿದ್ದರು. 'ಈ ಬಾರಿಯ ಐಪಿಎಲ್ ಯುಎಇಯಲ್ಲಿ ಸೆಪ್ಟೆಂಬರ್ 19ರಿಂದ ನವೆಂಬರ್ 8ರ ವರೆಗೆ ನಡೆಯಲಿದೆ. 51 ದಿನಗಳ ಪಂದ್ಯ ಇದಾಗಿರಲಿದೆ,' ಎಂದು ಬ್ರಿಜೇಶ್ ಹೇಳಿದ್ದರು.

ಫೇಕ್ ಪಿಡಿಎಫ್ ವೈರಲ್?

ಅಬುಧಾಬಿ, ದುಬೈ ಮತ್ತು ಶಾರ್ಜಾ ತಾಣದಲ್ಲಿ ಐಪಿಎಲ್ ಪಂದ್ಯಗಳು ನಡೆಯಲಿವೆ. ಪಂದ್ಯಗಳು ವೀಕ್ಷಕರಿಲ್ಲದ ಮೈದಾನದಲ್ಲಿ ನಡೆಯಲಿವೆ. ಪಂದ್ಯಗಳು ಭಾರತೀಯ ಕಾಲಮಾನ 3:30 ಮತ್ತು 7:30 pmರಂತೆ ಆರಂಭವಾಗಲಿವೆ ಎಂದು ಮೂಲವೊಂದು ಹೇಳಿತ್ತು. ಆದರೆ ವಾಟ್ಸ್‌ಆ್ಯಪ್‌ನಲ್ಲಿ ವೈರಲ್ ಆಗಿದ್ದ ಫೇಕ್ ಪಿಡಿಎಫ್‌ ವೇಳಾಪಟ್ಟಿಯಲ್ಲಿ ಪಂದ್ಯಗಳು 4 pm ಮತ್ತು 8 pmಗೆ ಆರಂಭವಾಗಲಿದೆ ಎಂದು ತಿಳಿಸಲಾಗಿತ್ತು. ಹೀಗಾಗಿ ಐಪಿಎಲ್ ವೇಳಾಪಟ್ಟಿ ಬಗ್ಗೆ ಅನುಮಾನ ಶುರುವಾಗಿದೆ.

ಅಧಿಕೃತ ಘೋಷಣೆ ಆಗಬೇಕಷ್ಟೇ

'ಐಪಿಎಲ್ 2020' ವೇಳಾಪಟ್ಟಿ ಈಗ ವೈರಲ್ ಆಗಿರುವ ರೀತಿಯಲ್ಲೇ ಇರಬಹುದು. ಅಥವಾ ಬದಲಾಗಿಯೂ ಇರಬಹುದು. ಆದರೆ ಸದ್ಯಕ್ಕಂತೂ ಐಪಿಎಲ್‌ ಬಗ್ಗೆ ನಿಖರ ಮಾಹಿತಿ ನೀಡುವ ಬಿಸಿಸಿಐ ಈ ಬಗ್ಗೆ ಅಧಿಕೃತ ಘೋಷಣೆ ಮಾಡಿಲ್ಲ. ಹೀಗಾಗಿ ಕ್ರಿಕೆಟ್ ಪ್ರೇಮಿಗಳು ಬಿಸಿಸಿಐನಿಂದ ಐಪಿಎಲ್‌ ಬಗ್ಗೆ ಅಧಿಕೃತ ಘೋಷಣೆ ಬರುವವರೆಗೂ ತಾಳ್ಮೆಯಿಂದ ಕಾಯಬೇಕಾಗಿದೆ.