ಕೆಕೆಆರ್‌ ನಾಯಕತ್ವ ಮಾರ್ಗನ್‌ಗೆ ನೀಡಬಾರದೇಕೆ?: ಹಾಗ್ ವಿವರಣೆ

ದುಬೈ: ಈ ಬಾರಿಯ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ನಾಯಕ ದಿನೇಶ್ ಕಾರ್ತಿಕ್ ಈವರೆಗೆ ಉತ್ತಮ ಪ್ರದರ್ಶನವನ್ನೇ ನೀಡಿಲ್ಲ. ಆಡಿರುವ ಐದು ಪಂದ್ಯಗಳಲ್ಲಿ ಕ್ರಮವಾಗಿ 30, ೦, 1, 6 ರನ್ ಗಳಿಸಿದ್ದಾರೆ. ಕಾರ್ತಿಕ್ ಗಿಂತ ಇಂಗ್ಲೆಂಡ್ ನಾಯಕ ಇಯಾನ್ ಮಾರ್ಗನ್ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ.

ಕೋಲ್ಕತ್ತಾ ನೈಟ್ ರೈಡರ್ಸ್ ಈವರೆಗೆ ಆಡಿರುವ ನಾಲ್ಕು ಪಂದ್ಯಗಳಲ್ಲಿ 2ರಲ್ಲಿ ಗೆದ್ದು 2ರಲ್ಲಿ ಸೋತಿದೆ. ಇತ್ತ ದಿನೇಶ್ ಕಾರ್ತಿಕ್‌ಗಿಂತ ಇಯಾನ್ ಮಾರ್ಗನ್ ಉತ್ತಮ ಪ್ರದರ್ಶನ ಬೇರೆ ನೀಡುತ್ತಿದ್ದಾರೆ. ಹೀಗಾಗಿ ಕೆಕೆಆರ್ ನಾಯಕತ್ವದಿಂದ ಕಾರ್ತಿಕ್ ಕೆಳಗಿಳಿಸಿ ಮಾರ್ಗನ್‌ಗೆ ನಾಯಕತ್ವ ನೀಡುವಂತೆ ಮಾತುಗಳು ಕೇಳಿ ಬಂದಿದ್ದವು.

ಆದರೆ ದಿನೇಶ್ ಕಾರ್ತಿಕ್ ಅವರನ್ನು ನಾಯಕತ್ವದಿಂದ ಕೆಳಗಿಳಿಸಬಾರದು ಎಂದು ಆಸ್ಟ್ರೇಲಿಯಾ ಮಾಜಿ ಆಟಗಾರ, ಕೆಕೆಆರ್ ಮಾಜಿ ಸ್ಪಿನ್ನರ್ ಬ್ರಾಡ್‌ ಹಾಗ್ ಹೇಳಿದ್ದಾರೆ. 'ನೋಡಿ, ನನಗೂ ಇಯಾನ್ ಮಾರ್ಗನ್ ಅವರನ್ನು ನಾಯಕರನ್ನಾಗಿ ಮಾಡೋದು ಖುಷಿಯಿದೆ. ಯಾಕೆಂದರೆ ಮಾರ್ಗನ್ ಒಳ್ಳೆಯ ನಾಯಕ. ಆದರೆ ದಿನೇಶ್ ಕಾರ್ತಿಕ್ ಕೂಡ ಒಳ್ಳೆಯ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ,' ಎಂದಿದ್ದಾರೆ.

ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ ಹಾಗ್, 'ಐಪಿಎಲ್ ಟೀಮಿನಲ್ಲಿ ಕೇವಲ 4 ವಿದೇಶಿ ಆಟಗಾರರ ಮಾತ್ರ ಇರಬೇಕು ಎನ್ನುವ ವಿಚಾರ ನಿಮಗೆ ಗೊತ್ತಿರಬಹುದು. ಒಂದು ವೇಳೆ ಮಾರ್ಗನ್ ದುರದೃಷ್ಟವಶಾತ್ ಫಾರ್ಮ್ ಕಳೆದುಕೊಂಡರೆ ತಂಡಕ್ಕೆ ಟಾಮ್ ಬ್ಯಾಂಟನ್ ಅವರನ್ನು ಕರೆತರಬೇಕಾಗುತ್ತದೆ,' ಎಂದರು.

ಹೀಗಾದಾಗ ನಾಯಕನಾಗಿರುವ ಮಾರ್ಗನ್ ಅವರನ್ನು ತಂಡದಿಂದ ಕೈ ಬಿಡೋದು ಕಷ್ಟವಾಗುತ್ತದೆ. ಆದ್ದರಿಂದ ನಾನು ದಿನೇಶ್ ಕಾರ್ತಿಕ್ ನಾಯಕನಾಗಿರೋದೆ ಸರಿ ಎನ್ನುತ್ತೇನೆ. ಹಾಗಂತ ಮಾರ್ಗನ್ ಅವರ ಅನುಭವವನ್ನು ಕೆಕೆಅರ್ ತಂಡದ ಪ್ರದರ್ಶನಕ್ಕೆ ಬಳಸಿಕೊಳ್ಳಬಹುದು,' ಎಂದು ವಿವರಿಸಿದರು.