ಮಹೇಂದ್ರ ಸಿಂಗ್ ಧೋನಿ ಹಾಗೂ ಕೆಎಲ್ ರಾಹುಲ್ ನೇತೃತ್ವದ ತಂಡಗಳು ಇಂದು ಮುಂಬೈನ ವಾಂಖೆಡೆ ಕ್ರೀಡಾಂಗಣದಲ್ಲಿ ಮುಖಾಮುಖಿಯಾಗುತ್ತಿದೆ. ಅನುಭವಿ ಹಾಗೂ ಪ್ರತಿಭಾವಂತ ಆಟಗಾರರನ್ನು ಹೊಂದಿರುವ ಎರಡು ತಂಡಗಳ ನಡುವಿನ ಸೆಣೆಸಾಟ ಸಾಕಷ್ಟು ಕುತೂಹಲ ಮೂಡಿಸಿದೆ. ಈ ಪಂದ್ಯದಲ್ಲಿ ಮೂರು ಪ್ರಮುಖ ದಾಖಲೆಗಳು ಮುರಿಯುವ ಅವಕಾಶವಿದೆ.
500ನೇ ಬೌಂಡರಿಗೆ ರೈನಾ ಹತ್ತಿರ: ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅನುಭವಿ ಆಟಗಾರ ಸುರೇಶ್ ರೈನಾ ಈ ಪಂದ್ಯದಲ್ಲಿ ಮಹತ್ವದ ಮೈಲಿಗಲ್ಲು ನೆಡುವ ಸಾಧ್ಯತೆಯಿದೆ. ಐಪಿಎಲ್ನಲ್ಲಿ 500ನೇ ಬೌಂಡರಿ ದಾಖಲಿಸುವ ಅವಕಾಶ ರೈನಾ ಮುಂದಿದೆ. ಇದಕ್ಕಾಗಿ ರೈನಾ ಕೇವಲ ನಾಲ್ಕು ಬೌಂಡರಿಗಳಷ್ಟೇ ಹಿಂದಿದ್ದಾರೆ.
ಐಪಿಎಲ್ 2021: ಪಂಜಾಬ್ vs ಚೆನ್ನೈ, ಮುಖಾಮುಖಿಯ ಅಂಕಿಅಂಶ
50 ವಿಕೆಟ್ ಸಾಧನೆ: ಐಪಿಎಲ್ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಇಬ್ಬರು 50 ವಿಕೆಟ್ ಪಡೆದ ಸಾಧನೆ ಮಾಡುವ ಅವಕಾಶವನ್ನು ಹೊಂದಿದ್ದಾರೆ. ಶಾರ್ದೂಲ್ ಠಾಕೂರ್ ಈ ಸಾಧನೆಗೆ ಕೇವಲ ಎರಡು ವಿಕೆಟ್ ಮಾತ್ರವೇ ಹಿಂದಿದ್ದಾರೆ. ಇನ್ನೋರ್ವ ಚೆನ್ನೈ ವೇಗಿ ದೀಪಕ್ ಚಾಹರ್ ಕೂಡ ಈ ಸಾಧನೆಗೆ ಹತ್ತಿರದಲ್ಲಿದ್ದಾರೆ. ಆದರೆ ಅದಕ್ಕಾಗಿ ಅವರು ಐದು ವಿಕೆಟ್ ಪಡೆಯಬೇಕಿದೆ.
ಮೋಯ್ಸಿಸ್ ಹೆನ್ರಿಕ್ಯೂಸ್: ಪಂಜಾಬ್ ಕಿಂಗ್ಸ್ ತಂಡದ ಆಲ್ರೌಂಡರ್ ಮೋಯ್ಸಿಸ್ ಹೆನ್ರಿಕ್ಯೂಸ್ ಐಪಿಎಲ್ನಲ್ಲಿ 1000 ರನ್ಗಳಿಸುವ ಸಮೀಪದಲ್ಲಿದ್ದಾರೆ. ಬ್ಯಾಟ್ ಹಾಗೂ ಬೌಲಿಂಗ್ನಲ್ಲಿ ಸಮಾನವಾಗಿ ಅಬ್ಬರಿಸಬಲ್ಲ ಸಾಮರ್ಥ್ಯವನ್ನು ಹೊಂದಿರುವ ಈ ಆಲ್ರೌಂಡರ್ ಇಂದಿನ ಪಂದ್ಯದಲ್ಲಿ ಆಡುವ ಸಾಧ್ಯತೆಯಿದೆ. ಅವಕಾಶ ದೊರೆತರೆ ಈ ಮಹತ್ವದ ಮೈಲಿಗಲ್ಲು ದಾಟುವ ಸಾಧ್ಯತೆಯಿದೆ.