IPL 2022: 10ರಿಂದ 15ಕೋಟಿ ಪಡೆದ ಆಟಗಾರರು ಫ್ಲಾಪ್; ಕೋಟಿ ಕೋಟಿ ಪಡೆದು ಮಕಾಡೆ ಮಲಗಿದವರ ಪಟ್ಟಿ ಇಲ್ಲಿದೆ

11ಕ್ಕೂ ಹೆಚ್ಚು ಕೋಟಿ ಪಡೆದವರು ಮತ್ತು ಅವರ ಪ್ರದರ್ಶನ

ಈ ಬಾರಿಯ ಐಪಿಎಲ್ ಹರಾಜಿನಲ್ಲಿ 15.25 ಕೋಟಿ ಪಡೆದ ಇಶಾನ್ ಕಿಶನ್ 14 ಪಂದ್ಯಗಳನ್ನಾಡಿ 418 ರನ್ ಗಳಿಸಿದರು. 3 ಅರ್ಧಶತಕಗಳನ್ನು ಬಾರಿಸಿದ ಇಶಾನ್ ಕಿಶನ್ ಸಾಧಾರಣ ಮೊತ್ತ ಕಲೆ ಹಾಕಿದ್ದಾರೆಯೇ ಹೊರತು ತಂಡಕ್ಕೆ ತಿರುವು ನೀಡಿ ಪಂದ್ಯ ಗೆಲ್ಲಿಸಿಕೊಡುವ ರೀತಿಯ ಪ್ರದರ್ಶನವನ್ನು ನೀಡುವಲ್ಲಿ ವಿಫಲರಾಗಿ ಮಕಾಡೆ ಮಲಗಿದರು. ಇಶಾನ್ ಕಿಶನ್ ಸ್ಟ್ರೈಕ್ ರೇಟ್ 120.11.

14 ಕೋಟಿ ಪಡೆದು ಚೆನ್ನೈ ಸೂಪರ್ ಕಿಂಗ್ಸ್ ಪಾಲಾಗಿದ್ದ ದೀಪಕ್ ಚಹರ್ ಟೂರ್ನಿಯಲ್ಲಿ ಪಂದ್ಯವನ್ನಾಡದೇ ಹೊರಬಿದ್ದು ನಿರಾಸೆ ಮೂಡಿಸಿದರು.

12.25 ಕೋಟಿಗೆ ಕೋಲ್ಕತ್ತ ನೈಟ್ ರೈಡರ್ಸ್ ಪಾಲಾಗಿ ನಾಯಕತ್ವವನ್ನು ಸ್ವೀಕರಿಸಿದ್ದ ಶ್ರೇಯಸ್ ಅಯ್ಯರ್ ಬ್ಯಾಟಿಂಗ್ ಮತ್ತು ನಾಯಕತ್ವ ಎರಡರಲ್ಲಿಯೂ ವಿಫಲರಾದರು ಎನ್ನಬಹುದು. 14 ಪಂದ್ಯಗಳನ್ನಾಡಿದ ಶ್ರೇಯಸ್ ಅಯ್ಯರ್ 3 ಅರ್ಧಶತಕ ಸಹಿತ 401 ರನ್ ಕಲೆಹಾಕುವಲ್ಲಿ ಮಾತ್ರ ಯಶಸ್ವಿಯಾದರು. ನಾಯಕನಾಗಿ 14 ಪಂದ್ಯಗಳಲ್ಲಿ ಕೋಲ್ಕತ್ತ ನೈಟ್ ರೈಡರ್ಸ್ ತಂಡವನ್ನು ಮುನ್ನಡೆಸಿದ ಶ್ರೇಯಸ್ ಅಯ್ಯರ್ 6 ಪಂದ್ಯಗಳಲ್ಲಿ ಜಯ ಮತ್ತು 8 ಪಂದ್ಯಗಳಲ್ಲಿ ಸೋಲನ್ನು ಅನುಭವಿಸಿದರು. ಹೀಗೆ ತಾವು ಪಡೆದುಕೊಂಡ ಹಣಕ್ಕೆ ತಕ್ಕುದಾದ ಪ್ರದರ್ಶನ ನೀಡುವಲ್ಲಿ ಶ್ರೇಯಸ್ ಅಯ್ಯರ್ ವಿಫಲರಾದರು. ಶ್ರೇಯಸ್ ಅಯ್ಯರ್ ಸ್ಟ್ರೈಕ್ ರೇಟ್ 134.56

ಈ ಬಾರಿಯ ಮೆಗಾ ಹರಾಜಿನಲ್ಲಿ 11.5 ಕೋಟಿಗೆ ಪಂಜಾಬ್ ಕಿಂಗ್ಸ್ ಪಾಲಾದ ಲಿಯಾಮ್ ಲಿವಿಂಗ್ ಸ್ಟನ್ ತಾವು ಪಡೆದ ಹಣಕ್ಕೆ ಸರಿಯಾದ ನ್ಯಾಯ ಒದಗಿಸಿದರು ಎನ್ನಬಹುದು. 14 ಪಂದ್ಯಗಳನ್ನಾಡಿದ ಅವರು 4 ಅರ್ಧಶತಕ ಸಹಿತ 439 ರನ್ ಕಲೆಹಾಕಿದ್ದು, ಬರೋಬ್ಬರಿ 182.08 ಸ್ಟ್ರೈಕ್ ರೇಟ್ ನೊಂದಿಗೆ ಬ್ಯಾಟ್ ಬೀಸಿದ್ದಾರೆ. ಇವರ ಈ ಸ್ಟ್ರೈಕ್ ರೇಟ್ ಟೂರ್ನಿಯಲ್ಲಿ ಕಣಕ್ಕಿಳಿದಿದ್ದ ಹಲವಾರು ಸ್ಫೋಟಕ ಆಟಗಾರರಿಗಿಂತ ಹೆಚ್ಚಿದೆ. ಇನ್ನು 12 ಇನ್ನಿಂಗ್ಸ್‌ನಲ್ಲಿ ಬೌಲಿಂಗ್ ಮಾಡಿದ ಲಿಯಾಮ್ ಲಿವಿಂಗ್ ಸ್ಟನ್ 6 ವಿಕೆಟ್‍ಗಳನ್ನೂ ಸಹ ಪಡೆದಿದ್ದಾರೆ.

10.75 ಕೋಟಿ ಪಡೆದ ನಾಲ್ವರ ಪ್ರದರ್ಶನ

ವನಿಂದು ಹಸರಂಗ ಈ ಬಾರಿ 10.75 ಕೋಟಿ ಪಡೆದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಪಾಲಾದರು. ಟೂರ್ನಿಯಲ್ಲಿ ಒಟ್ಟು 26 ವಿಕೆಟ್ ಪಡೆದ ವನಿಂದು ಹಸರಂಗ 7.54ರ ಎಕಾನಮಿಯಲ್ಲಿ ಬೌಲಿಂಗ್ ಮಾಡಿ ತಾವು ಪಡೆದ ಹಣಕ್ಕೆ ನ್ಯಾಯ ಒದಗಿಸಿದ್ದಾರೆ. ವನಿಂದು ಹಸರಂಗ ಈ ಬಾರಿಯ ಟೂರ್ನಿಯಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ ಎರಡನೇ ಬೌಲರ್ ಎನಿಸಿಕೊಂಡಿದ್ದಾರೆ.

ಶಾರ್ದೂಲ್ ಠಾಕೂರ್ ಕೂಡ ಈ ಬಾರಿ 10.75 ಕೋಟಿ ಪಡೆದು ಡೆಲ್ಲಿ ಕ್ಯಾಪಿಟಲ್ಸ್ ಪಾಲಾದರು. ಟೂರ್ನಿಯಲ್ಲಿ ಕೇವಲ 15 ವಿಕೆಟ್ ಪಡೆದ ಶಾರ್ದೂಲ್ ಠಾಕೂರ್ 9.78 ಎಕಾನಮಿಯಲ್ಲಿ ಬೌಲಿಂಗ್ ಮಾಡಿ ದುಬಾರಿಯಾದರು.

ಕಳೆದ ಬಾರಿಯ ಟೂರ್ನಿಯಲ್ಲಿ ಅಬ್ಬರಿಸಿದ್ದ ಹರ್ಷಲ್ ಪಟೇಲ್ 10.75 ಕೋಟಿ ಪಡೆದು ಮತ್ತೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಸೇರಿದರು. ಈ ಬಾರಿ ಕೆಲ ವೈಯಕ್ತಿಕ ಸಮಸ್ಯೆಗಳಿಂದ ಟೂರ್ನಿಯಲ್ಲಿ ಮಂಕಾದ ಹರ್ಷಲ್ ಪಟೇಲ್ ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ಯಶಸ್ವಿಯಾಗಲಿಲ್ಲ. ಒಟ್ಟು 19 ವಿಕೆಟ್ ಪಡೆದ ಹರ್ಷಲ್ ಪಟೇಲ್ 7.66ರ ಎಕಾನಮಿ ದರದಲ್ಲಿ ಬೌಲಿಂಗ್ ಮಾಡಿದರು. ಆದರೆ ಹರ್ಷಲ್ ಪಟೇಲ್ ಮಹತ್ವದ ಪಂದ್ಯಗಳಲ್ಲಿ ಅದರಲ್ಲಿಯೂ ಡೆತ್ ಓವರ್‌ಗಳಲ್ಲಿ ನೀಡಿದ ಪ್ರದರ್ಶನ ತಂಡಕ್ಕೆ ಅತ್ಯಮೂಲ್ಯವಾಗಿತ್ತು.

ಕಳೆದ ಬಾರಿಯ ಐಪಿಎಲ್ ಆವೃತ್ತಿಯ ಫ್ಲಾಪ್ ಆಟಗಾರ ನಿಕೋಲಸ್ ಪೂರನ್ ಈ ಬಾರಿ 10.75 ಕೋಟಿಗೆ ಸನ್ ರೈಸರ್ಸ್ ಹೈದರಬಾದ್ ಪಾಲಾದರು. ಇಷ್ಟು ಮೊತ್ತಕ್ಕೆ ಈತನನ್ನು ಖರೀದಿಸಿದ್ದಕ್ಕೆ ಕ್ರಿಕೆಟ್ ಅಭಿಮಾನಿಗಳು ಬಾಯಿಯ ಮೇಲೆ ಬೆರಳಿಟ್ಟುಕೊಂಡಿದ್ದರು. ಆದರೆ ಟೂರ್ನಿಯ ಆರಂಭದಲ್ಲಿ ಉತ್ತಮ ಪ್ರದರ್ಶನ ನೀಡುವ ಭರವಸೆಯನ್ನು ಹುಟ್ಟು ಹಾಕಿದ್ದ ಪೂರನ್ ಟೂರ್ನಿಯುದ್ದಕ್ಕೂ ಮಿಂಚುವಲ್ಲಿ ಯಶಸ್ವಿಯಾಗಲಿಲ್ಲ. ಪಡೆದ ಮೊತ್ತಕ್ಕೆ ತಕ್ಕನಾದ ಆಟ ಆಡುವಲ್ಲಿ ಪೂರನ್ ವಿಫಲರಾದರು. ಪೂರನ್ ಟೂರ್ನಿಯಲ್ಲಿ ಕೇವಲ 306 ರನ್ ಬಾರಿಸಿದರು.

IPL 2022ನಲ್ಲಿ ಅತಿ ಹೆಚ್ಚು ಬಾರಿ Duck out ಆದವರು | #Cricket | OneIndia Kannada

10 ಕೋಟಿ ಪಡೆದವರ ಪ್ರದರ್ಶನ

ಗುಜರಾತ್ ಟೈಟನ್ಸ್ ಚಾಂಪಿಯನ್ ಆಗಿ ಹೊರಹೊಮ್ಮಿದರೂ ತಂಡದ ಬೌಲರ್ ಲಾಕಿ ಫರ್ಗ್ಯುಸನ್ ಸಾಧಾರಣ ಪ್ರದರ್ಶನವನ್ನೇ ನೀಡಿದರು. ಹರಾಜಿನಲ್ಲಿ 10 ಕೋಟಿ ಪಡೆದಿದ್ದ ಲಾಕಿ ಫರ್ಗ್ಯುಸನ್ 8.95 ಎಕಾನಮಿ ದರದಲ್ಲಿ 12 ವಿಕೆಟ್ ಪಡೆದರು.

10 ಕೋಟಿ ಪಡೆದ ಮತ್ತೋರ್ವ ಬೌಲರ್ ಆವೇಶ್ ಖಾನ್ ಈ ಬಾರಿ ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಪರ ಕಣಕ್ಕಿಳಿದರು. 8.72 ಎಕಾನಮಿ ದರದಲ್ಲಿ ಬೌಲಿಂಗ್ ಮಾಡಿದ ಅವೇಶ್ ಖಾನ್ 18 ವಿಕೆಟ್ ಪಡೆದರು.

ಕನ್ನಡಿಗ ಪ್ರಸಿದ್ಧ್ ಕೃಷ್ಣ 10 ಕೋಟಿ ಪಡೆಯುವುದರ ಮೂಲಕ ರಾಜಸ್ಥಾನ್ ರಾಯಲ್ಸ್ ತಂಡದ ಪಾಲಾದರು. 8.28 ಎಕಾನಮಿ ದರದಲ್ಲಿ ಬೌಲಿಂಗ್ ಮಾಡಿದ ಪ್ರಸಿದ್ಧ ಕೃಷ್ಣ 19 ವಿಕೆಟ್ ಪಡೆದರು. ತಂಡದ ನಿರ್ಣಾಯಕ ಪಂದ್ಯಗಳಲ್ಲಿ ಕೆಲವೊಮ್ಮೆ ಉತ್ತಮ ಪ್ರದರ್ಶನ ನೀಡಿದರೆ ಮತ್ತೊಮ್ಮೆ ಹೆಚ್ಚು ರನ್ ನೀಡಿ ಕಳಪೆ ಪ್ರದರ್ಶನವನ್ನು ಕೂಡ ಪ್ರಸಿದ್ಧ್ ಕೃಷ್ಣ ನೀಡಿದ್ದಾರೆ.