IPL 2024: ಸಿಎಸ್‌ಕೆ ವಿರುದ್ಧ ಉದ್ಘಾಟನಾ ಹಣಾಹಣಿಗೆ ಉತ್ಸಾಹ ಹೊರಹಾಕಿದ ಆರ್‌ಸಿಬಿ ಕ್ಯಾಪ್ಟನ್

2024ರ ಇಂಡಿಯನ್ ಪ್ರೀಮಿಯರ್ ಲೀಗ್‌ನ (ಐಪಿಎಲ್) 17ನೇ ಋತುವಿನ ಆರಂಭಕ್ಕೆ ದಿನಗಣನೆ ಶುರುವಾಗಿದ್ದು, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಮೊದಲ ಹಂತದ ವೇಳಾಪಟ್ಟಿಯನ್ನು ಗುರುವಾರ, ಫೆಬ್ರವರಿ 22ರಂದು ಪ್ರಕಟಿಸಿದೆ. ಈ ಮೂಲಕ ಭಾರತದಲ್ಲಿ ಕ್ರಿಕೆಟ್ ಜ್ವರ ನಿಧಾನಗತಿಯಲ್ಲಿ ಏರತೊಡಗಿದೆ.

ನಿರೀಕ್ಷೆಗೆ ಪೂರಕವಾಗಿ, ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ಈ ಋತುವಿನ ಉದ್ಘಾಟನಾ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡವನ್ನು ಎದುರಿಸಲಿದೆ. ಇದು ರೆಡ್ ಆರ್ಮಿ ಕ್ಯಾಪ್ಟನ್ ಫಾಫ್ ಡು ಪ್ಲೆಸಿಸ್ ಅವರನ್ನು ಹೆಚ್ಚಿನ ಉತ್ಸುಕರನ್ನಾಗಿ ಮಾಡಿದೆ.

ಐಪಿಎಲ್‌ನ 17ನೇ ಆವೃತ್ತಿ ಇದೀಗ ಅಧಿಕೃತವಾಗಿ ಮಾರ್ಚ್ 22ರಂದು ಪ್ರಾರಂಭವಾಗಲಿದೆ. ಕ್ರಿಕೆಟ್ ಪ್ರೇಮಿಗಳು ಮತ್ತೊಮ್ಮೆ ಎರಡು ತಿಂಗಳ ಕಾಲ ನಡೆಯುವ ಟಿ20 ಫ್ರಾಂಚೈಸಿ ಲೀಗ್‌ನ ಆರಂಭಕ್ಕೆ ಕಾತರರಾಗಿದ್ದಾರೆ.

ಶುಕ್ರವಾರ, ಮಾರ್ಚ್ 22ರಂದು ಚೆನ್ನೈನ ಚೆಪಾಕ್ ಸ್ಟೇಡಿಯಂನಲ್ಲಿ ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡಗಳು ಉದ್ಘಾಟನಾ ಪಂದ್ಯದಲ್ಲಿ ಸೆಣಸಾಡುವ ಮೂಲಕ ಪಂದ್ಯಾವಳಿಗೆ ಚಾಲನೆ ಸಿಗಲಿದೆ.

ಸಿಎಸ್‌ಕೆ ಮತ್ತು ಆರ್‌ಸಿಬಿ ನಡುವಿನ ಈ ಹಣಾಹಣಿಯು ಯಾವಾಗಲೂ ಪಂದ್ಯಾವಳಿಯ ಅತ್ಯಂತ ರೋಚಕ ಪಂದ್ಯಗಳಲ್ಲಿ ಒಂದಾಗಿದೆ. ಏಕೆಂದರೆ ಈ ಎರಡೂ ತಂಡಗಳಲ್ಲಿ ದೊಡ್ಡ ಆಟಗಾರರು ಇದ್ದಾರೆ ಮತ್ತು ಉಭಯ ತಂಡಗಳಿಗೆ ಭಾರೀ ಸಂಖ್ಯೆಯ ಅಭಿಮಾನಿಗಳಿದ್ದಾರೆ.

ಎಂಎಸ್ ಧೋನಿ 2024ರ ಐಪಿಎಲ್‌ಗೆ ಹಿಂತಿರುಗುವುದು ಬಹು ನಿರೀಕ್ಷಿತ ಘಟನೆಯಾಗಿದೆ. ಆದರೆ ಎಲ್ಲರ ಗಮನವು ಸಂಪೂರ್ಣವಾಗಿ 5 ಬಾರಿಯ ಚಾಂಪಿಯನ್ ತಂಡದತ್ತ ಇರುವುದಿಲ್ಲ.

ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ತಮ್ಮ ಎರಡನೇ ಮಗು ಅಕಾಯ್ ಜನನದಿಂದಾಗಿ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯನ್ನು ತಪ್ಪಿಸಿಕೊಂಡ ಬಳಿಕ ಐಪಿಎಲ್‌ನಲ್ಲಿ ಸ್ಪರ್ಧಾತ್ಮಕ ಕ್ರಿಕೆಟ್‌ಗೆ ಮರಳಲಿದ್ದಾರೆ.

ಉಭಯ ತಂಡಗಳ ನಡುವಿನ ತೀವ್ರವಾದ ಘರ್ಷಣೆಯು ಈಗಾಗಲೇ ಅನೇಕ ಪಂಡಿತರು ಮತ್ತು ಮಾಜಿ ಕ್ರಿಕೆಟ್ ದಿಗ್ಗಜರ ಟಾಕಿಂಗ್ ಪಾಯಿಂಟ್ ಆಗಿದೆ. ಇದೇ ವೇಳೆ ಆರ್‌ಸಿಬಿ ನಾಯಕ ಫಾಫ್ ಡು ಪ್ಲೆಸಿಸ್ ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ 2024ರ ಐಪಿಎಲ್‌ನ ಉದ್ಘಾಟನಾ ಪಂದ್ಯದ ನಿರೀಕ್ಷೆಯನ್ನು ಎತ್ತಿ ತೋರಿಸಿದ್ದಾರೆ.

ದಕ್ಷಿಣ ಆಫ್ರಿಕಾದ ಬ್ಯಾಟರ್ ರೋಚಕ ಪಂದ್ಯದ ಬಗ್ಗೆ ತನ್ನ ಉತ್ಸಾಹವನ್ನು ತಡೆದುಕೊಳ್ಳಲು ಸಾಧ್ಯವಾಗಲಿಲ್ಲ ಮತ್ತು ಪಂದ್ಯಾವಳಿಯಲ್ಲಿ ಕೊನೆಯ ಬಾರಿಗೆ ತನ್ನ ಮಾಜಿ ಸಹ ಆಟಗಾರ ಎಂಎಸ್ ಧೋನಿ ಜೊತೆಗಿನ ಚಿತ್ರವನ್ನು ಪೋಸ್ಟ್ ಮಾಡಿದ್ದಾರೆ. "ಇದು ಎಂತಹ ಮೊದಲ ಪಂದ್ಯ, ವಾವ್..." ಎಂದು ಫಾಫ್ ಡು ಪ್ಲೆಸಿಸ್ ಸ್ಟೋರಿಯಲ್ಲಿ ಬರೆದುಕೊಂಡಿದ್ದಾರೆ.

ವಿರಾಟ್ ಕೊಹ್ಲಿ 2022ರಲ್ಲಿ ಕೆಳಗಿಳಿಯಲು ನಿರ್ಧರಿಸಿದ ನಂತರ ಮತ್ತು ಸಿಎಸ್‌ಕೆ ತಂಡದಿಂದ ಆರ್‌ಸಿಬಿಗೆ ಬಂದ ಬಳಿಕ ಫಾಫ್ ಡು ಪ್ಲೆಸಿಸ್ ತಂಡದ ನಾಯಕತ್ವ ಜವಾಬ್ದಾರಿಗೆ ಹೆಜ್ಜೆ ಹಾಕಿದರು.

ಫಾಫ್ ಡು ಪ್ಲೆಸಿಸ್ ಆರ್‌ಸಿಬಿ ನಾಯಕನಾಗಿ ತನ್ನ ಮೊದಲ ಋತುವಿನಲ್ಲಿ ತಂಡವನ್ನು ಪ್ಲೇಆಫ್‌ಗೆ ಮುನ್ನಡೆಸಿದರು. ಆದಾಗ್ಯೂ, 2023ರ ಋತುವಿನಲ್ಲಿ ತಂಡವು 6ನೇ ಸ್ಥಾನವನ್ನು ಗಳಿಸಿತು.

ಈ ವರ್ಷ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹೊಸ ಭರವಸೆಯೊಂದಿಗೆ ತಮ್ಮ ಆವೃತ್ತಿಯನ್ನು ಪ್ರಾರಂಭಿಸುತ್ತದೆ. ಇದು ಕ್ಯಾಮೆರಾನ್ ಗ್ರೀನ್, ಅಲ್ಜಾರಿ ಜೋಸೆಫ್, ಲಾಕಿ ಫರ್ಗ್ಯೂಸನ್ ಮತ್ತು ಯಶ್ ದಯಾಳ್ ಸೇರಿದಂತೆ ಆಕರ್ಷಕ ಹೊಸ ಪ್ರತಿಭೆಗಳನ್ನು ಸೆಳೆದುಕೊಂಡಿದೆ.

ಪಂದ್ಯಾವಳಿಯ ಉಳಿದ ಭಾಗದ ಟೋನ್ ಮುಖ್ಯವಾಗಿ ಆರ್‌ಸಿಬಿಯ ಮೊದಲ ಪಂದ್ಯದ ಮೇಲೆ ಅವಲಂಬಿತವಾಗಿದೆ. ಪ್ರಬಲ ತಂಡಗಳಲ್ಲಿ ಒಂದಾಗಿರುವ ಸಿಎಸ್‌ಕೆ ತಂಡವನ್ನು ಸೋಲಿಸುವ ಮೂಲಕ ಪಂದ್ಯಾವಳಿಯಲ್ಲಿ ಆವೇಗವನ್ನು ಪಡೆಯಲು ಆರ್‌ಸಿಬಿ ಆಟಗಾರರು ಬಯಸಿದ್ದಾರೆ.