ಹತ್ರ ಬಂದ್ರೆ ಅಲರಾಮ್: ಯುಎಇ ಐಪಿಎಲ್‌ನ ಕುತೂಹಲಕಾರಿ ಸಂಗತಿಗಳಿವು!

ದೂರ ದೂರ ಇರುವ ಶಿಕ್ಷೆ

ಕ್ರೀಡಾಪಟುಗಳು ಹೆಚ್ಚಾಗಿ ಸ್ನೇಹಿತರೊಂದಿಗಿರಲು ಬಯಸುತ್ತಾರೆ. ಆದರೆ ಐಪಿಎಲ್ ಟೂರ್ನಿಯ ವೇಳೆ ಜೈವಿಕ ಸುರಕ್ಷಾ ಪರದೆಯೊಳಗಿದ್ದರೂ ಆಟಗಾರರು ತಮ್ಮ ಸ್ನೇಹಿತರಿಂದ ದೂರ ದೂರವೇ ಇರಬೇಕಾಗಿದೆ. ಈ ನಿಯಮ ಬರೀ ಕ್ವಾರಂಟೈನ್ ವೇಳೆಯಷ್ಟೇ ಅಲ್ಲ, ಟೂರ್ನಿ ಆರಂಭದಿಂದ ಅಂತ್ಯವಾಗುವವರೆಗೂ ಒಬ್ಬ ಆಟಗಾರ ಮತ್ತೊಬ್ಬನ ರೂಮಿಗೆ ಹೋಗುವಂತಿಲ್ಲ.

ಸಾಮಾಜಿಕ ಅಂತರ ಕಟ್ಟುನಿಟ್ಟು

ಯುಎಇಯಲ್ಲಿ ಈ ಬಾರಿ ನಡೆಯುವ ಐಪಿಎಲ್‌ ವೇಳೆ ಆಟಗಾರರು ಮತ್ತೊಬ್ಬರ ರೂಮಿಗೆ ಹೋಗುವಂತಿಲ್ಲ. ಆದರೆ ಇಬ್ಬರೂ ತಮ್ಮ ಕೋಣೆಯ ಬಾಗಿಲುಗಳ ಹತ್ತಿರ ಸಾಮಾಜಿಕ ಅಂತರದೊಂದಿಗೆ ಒಬ್ಬರನ್ನೊಬ್ಬರು ಭೇಟಿಯಾಗಬಹುದು. ಇಲ್ಲವೆ ಭೇಟಿಗೆ ನಿಗದಿ ಪಡಿಸಿದ ಜಾಗದಲ್ಲಿ ಭೇಟಿಯಾಗಬಹುದು. ಆದರೆ ಭೇಟಿಯ ವೇಳೆ ಇಬ್ಬರೂ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುವ ನಿಯಮಕ್ಕೆ ಬದ್ಧರಾಗಿರಬೇಕು.

ಹತ್ರ ಬಂದ್ರೆ ಅಲರಾಮು!

ಐಪಿಎಲ್‌ಗಾಗಿ ಯುಎಇಯಲ್ಲಿ ಬಯೋ ಬಬಲ್ ಒಳಗಿರುವ ಆಟಗಾರರು ಕೈಗೆ ವಿಶೇಷ ಬ್ಲೂಟೂಟ್ ರಿಸ್ಟ್ ಬ್ಯಾಂಡ್ ಕಟ್ಟಿಕೊಳ್ಳಬೇಕು. ಆಟಗಾರರು ಒಂದು ವೇಳೆ ಎರಡು ಮೀಟರ್ ದೂರ ಸಾಮಾಜಿಕ ಅಂತರ ನಿಯಮವನ್ನು ಮೀರಿದರೆ ಈ ಬ್ಯಾಂಡ್ ಬಡಿದುಕೊಳ್ಳುತ್ತದೆ. ಆಟಗಾರರು ಮಲಗುವಾಗ ಹೊರತುಪಡಿಸಿ ಬೇರೆಲ್ಲಾ ಸಮಯದಲ್ಲಿ ಬ್ಯಾಂಡ್ ಧರಿಸಿರಬೇಕು (ಆಟಗಾರರ ಜೊತೆಗೆ ಉಳಿದುಕೊಳ್ಳುವ ಕುಟುಂಬದ ಸದಸ್ಯರೂ ಬ್ಯಾಂಡ್ ಧರಿಸಬೇಕೆ ಎನ್ನುವುದು ಇನ್ನೂ ಸ್ಪಷ್ಟಗೊಂಡಿಲ್ಲ).

ರೂಮೊಳಗೇ ಹೇರ್ ಸ್ಟೈಲಿಶ್

ಐಪಿಎಲ್ ಹಾಲಿ ಚಾಂಪಿಯನ್ಸ್ ಮುಂಬೈ ಇಂಡಿಯನ್ಸ್ ತಂಡ ಯುಎಇಗೆ ಹೋಗುವಾಗ ಭಾರತದಿಂದ ಹೇರ್ ಸ್ಟೈಲಿಶ್ ಒಬ್ಬರನ್ನು ಕರೆದೊಯ್ದಿದೆ. ರಾಜಸ್ಥಾನ್ ರಾಯಲ್ಸ್ ಕೂಡ ಅಲ್ಲೇ ಬೀಚೊಂದರ ಪಕ್ಕ ಬರೀ ತಮ್ಮ ತಂಡದವರಿಗೋಸ್ಕರ ಮಾತ್ರ ಹೇರ್ ಸ್ಟೈಲ್‌ಗೆ ವ್ಯವಸ್ಥೆ ಮಾಡಿಕೊಂಡಿದೆ. ಅಂತೂ ಎಲ್ಲಾ ತಂಡಗಳಿಗೂ ಈ ಬಾರಿಯ ಐಪಿಎಲ್ ವಿಭಿನ್ನ ಅನುಭವ ನೀಡಲಿದೆ.