ತನ್ನನ್ನು ಬೆಂಬಲಿಸಿದ ಬಾಬರ್ ಅಜಮ್‌ಗೆ ಧನ್ಯವಾದ ತಿಳಿಸಿ ಶುಭಕೋರಿದ ವಿರಾಟ್ ಕೊಹ್ಲಿ

ಬಲವಾಗಿ ಇರಿ ಎಂದಿದ್ದ ಬಾಬರ್ ಅಜಮ್

ವಿರಾಟ್ ಕೊಹ್ಲಿ ಲಾರ್ಡ್ಸ್ ಮೈದಾನದಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ದ್ವಿತೀಯ ಏಕದಿನ ಪಂದ್ಯದಲ್ಲಿ ಔಟ್ ಆದ ಬಳಿಕ ತಮ್ಮ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಟ್ವೀಟ್ ಮಾಡಿದ ಬಾಬರ್ ಅಜಮ್ ತಾನು ಮತ್ತು ವಿರಾಟ್ ಕೊಹ್ಲಿ ಜತೆಗಿರುವ ಚಿತ್ರವನ್ನು ಹಂಚಿಕೊಳ್ಳುವುದರ ಮೂಲಕ 'ಇದೂ ಕೂಡ ಹಾದುಹೋಗುತ್ತದೆ, ಬಲವಾಗಿ ಇರಿ' ಎಂದು ಬರೆದುಕೊಂಡಿದ್ದರು. ಈ ಮೂಲಕ ಕಳಪೆ ಫಾರ್ಮ್ ಎಂಬುದು ಕೂಡ ಹಾದುಹೋಗಲಿದೆ ದೃಢವಾಗಿ ಇರಿ ಎಂಬರ್ಥದಲ್ಲಿ ಬಾಬರ್ ಅಜಮ್ ವಿರಾಟ್ ಕೊಹ್ಲಿಯ ಬೆಂಬಲಕ್ಕೆ ನಿಂತಿದ್ದರು.

ಧನ್ಯವಾದ ತಿಳಿಸಿ ಶುಭಕೋರಿದ ಕೊಹ್ಲಿ

ಬಾಬರ್ ಅಜಮ್ ನೀಡಿದ್ದ ಈ ಬೆಂಬಲಕ್ಕೆ ಇದೀಗ ತಮ್ಮ ಅಧಿಕೃತ ಟ್ವಿಟರ್ ಖಾತೆಯ ಮೂಲಕ ಪ್ರತಿಕ್ರಿಯಿಸಿರುವ ವಿರಾಟ್ ಕೊಹ್ಲಿ 'ಧನ್ಯವಾದಗಳು. ಹೀಗೆ ಮಿಂಚುತ್ತಿರಿ ಹಾಗೂ ಬೆಳೆಯುತ್ತಿರಿ. ನಿಮಗೆ ಶುಭ ಕೋರುತ್ತೇನೆ' ಎಂದು ಬರೆದುಕೊಂಡಿದ್ದಾರೆ. ಹೀಗೆ ವಿರಾಟ್ ಕೊಹ್ಲಿ ಬಾಬರ್ ಅಜಮ್ ಅವರ ಟ್ವೀಟ್ ಕುರಿತು ಪ್ರತಿಕ್ರಿಯಿಸಿದ ಬೆನ್ನಲ್ಲೇ ನೆಟ್ಟಿಗರು ಈ ಇಬ್ಬರ ನಡುವಿನ ಸ್ನೇಹ ಸಂಬಂಧಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ವಿರಾಟ್ ಕೊಹ್ಲಿಗೆ ವ್ಯಕ್ತವಾಗುತ್ತಿದೆ ಹಲವರ ಬೆಂಬಲ

ಪದೇ ಪದೇ ಕಳಪೆ ಬ್ಯಾಟಿಂಗ್ ನಡೆಸಿ ವಿರಾಟ್ ಕೊಹ್ಲಿ ಕೆಟ್ಟ ಫಾರ್ಮ್ ಎದುರಿಸುತ್ತಿರುವ ಕಾರಣ ಹಿರಿಯ ಕ್ರಿಕೆಟಿಗ ಕಪಿಲ್ ದೇವ್ ಸೇರಿದಂತೆ ಹಲವಾರು ಮಂದಿ ಕೊಹ್ಲಿಯನ್ನು ತಂಡದಿಂದ ಕೈಬಿಟ್ಟು ಯುವ ಆಟಗಾರರಿಗೆ ಅವಕಾಶ ನೀಡಬೇಕೆಂದು ಹೇಳಿಕೆಗಳನ್ನು ನೀಡಿದ್ದಾರೆ. ಆದರೆ ಇದಕ್ಕಿಂತ ದೊಡ್ಡ ಮಟ್ಟದಲ್ಲಿ ಹಲವಾರು ಹಿರಿಯ ಕ್ರಿಕೆಟಿಗರು ಹಾಗೂ ವಿದೇಶಿ ಆಟಗಾರರು ವಿರಾಟ್ ಕೊಹ್ಲಿಯನ್ನು ಬೆಂಬಲಿಸಿದ್ದಾರೆ. ಕೆಟ್ಟ ಫಾರ್ಮ್ ಎಂಬುದು ಪ್ರತಿಯೊಬ್ಬ ಆಟಗಾರನಿಗೂ ಬಂದೇ ಬರುತ್ತದೆ, ವಿರಾಟ್ ಕೊಹ್ಲಿ ಕೂಡ ಈಗ ಅದೇ ಪರಿಸ್ಥಿತಿಯಲ್ಲಿದ್ದಾರೆ ಆದರೆ ಮುಂದಿನ ಪಂದ್ಯಗಳಲ್ಲಿ ಅವರು ಕಮ್ ಬ್ಯಾಕ್ ಮಾಡುವುದು ಖಚಿತ ಎಂದು ಹಲವು ಕ್ರಿಕೆಟಿಗರು ತಮ್ಮ ಬೆಂಬಲ ವ್ಯಕ್ತಪಡಿಸಿದ್ದಾರೆ.