ಟೀಮ್ ಇಂಡಿಯಾವನ್ನು ನೋಡಿ 'ಆ ವಿಚಾರವನ್ನು' ಪಾಕಿಸ್ತಾನ ಕಲಿಯಲಿ: ಪಾಕ್ ಮಾಜಿ ದಿಗ್ಗಜ ಬ್ಯಾಟ್ಸ್‌ಮನ್

ಭಾರತವನ್ನು ನೋಡಿ ಕಲಿಯಲಿ

'ಇತ್ತೀಚೆಗೆ ಭಾರತೀಯ ಬ್ಯಾಟ್ಸ್‌ಮನ್‌ಗಳು ಹೇಗೆ ಬ್ಯಾಟಿಂಗ್ ನಡೆಸುತ್ತಾರೆ ಎಂಬುದನ್ನು ಗಮನಿಸಿ. ತಂಡ ಯಾವಾಗ ಸಂಕಷ್ಟಕ್ಕೆ ಸಿಲುಕು ತ್ತದೋ ಆಗ ಯಾರಾದರೂ ಬ್ಯಾಟ್ಸ್‌ಮನ್ ಬಂದು ರನ್ ಗಳಿಸುತ್ತಾನೆ. ಇದನ್ನು ನಾನು ಪಾಕಿಸ್ತಾನ ತಂಡದಲ್ಲಿ ಬಯಸುತ್ತೇನೆ' ಎಂದು ಜಹೀರ್ ಅಬ್ಬಾಸ್ ಹೇಳಿದ್ದಾರೆ.

ಎದುರಾಳಿಗಳಿಂದ ಪಾಕ್ ತಂಡ ಕಲಿಯಲಿ

ಏಷ್ಯಾದ ಬ್ರಾಡ್ಮನ್ ಎಂದೇ ಖ್ಯಾತರಾದ ಜಹೀರ್ ಅಬ್ಬಾಸ್ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ 108 ಶತಕವನ್ನು ಗಳಿಸಿದ ಸಾಧನೆ ಮಾಡಿದ್ದಾರೆ. ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡುತ್ತಾ ಪಾಕಿಸ್ತಾನ ಕ್ರಿಕೆಟ್ ತಂಡ ಎದುರಾಳಿಗಳಿಂದ ಪಾಠ ಕಲಿಯಬೇಕು ಎಂದು ಹೇಳಿದ್ದಾರೆ.

ಗವಾಸ್ಕರ್ ಮಾತು ನೆನಪಿಸಿದ ಅಬ್ಬಾಸ್

'ಅವರು(ಭಾರತ) ಇದನ್ನು ಕಲಿತಿದ್ದು ನಮ್ಮಿಂದ. ಎಲ್ಲರಿಗೂ ನಾವು ಕಲಿಸಿದ್ದನ್ನು ಚೆನ್ನಾಗಿ ಕಲಿತುಕೊಂಡು ಅಳವಡಿಸಿಕೊಂಡಿದ್ದಾರೆ. ಆದರೆ ಈಗಿನ ಸಂದರ್ಭ ನಾವು ಇತರರಿಂದ ಕಲಿಯಬೇಕಿದೆ. ಗವಾಸ್ಕರ್ ಯಾವಾಗಲೂ "ನೀವು ಯಾವಾಗಲೂ ಎದುರಾಳಿಗಳಿಂದಲೂ ಕಲಿಯಬೇಕು" ಎಂದು ಹೇಳುತ್ತಿದ್ದರು ಎಂಬುದನ್ನು ಜಹೀರ್ ಅಬ್ಬಾಸ್ ನೆನಪಿಸಿಕೊಂಡಿದ್ದಾರೆ.

ನೋಡಿ ಕಲಿತುಕೊಳ್ಳಬೇಕು

78 ಅಂತಾರಾಷ್ಟ್ರೀಯ ಟೆಸ್ಟ್ ಕ್ರಿಕೆಟ್‌ನಲ್ಲಿ 44.79ರ ಸರಾಸರಿಯಲ್ಲಿ 5062 ರನ್ ಬಾರಿಸಿರುವ ಅಬ್ಬಾಸ್ ಟೀಮ್ ಇಂಡಿಯಾದ ಉಪನಾಯಕ ರೋಹಿತ್ ಶರ್ಮಾರ ಉದಾಹರಣೆಯನ್ನು ನೀಡಿದರು. 'ರೋಹಿತ್ ಶರ್ಮಾ ಉತ್ತಮ ಬ್ಯಾಟ್ಸ್‌ಮನ್ ಎಂದು ನೀವು ಹೇಳುವಿರಾದರೆ ನೀವು ಆತನಿಂದ ಖಂಡಿತಾ ಕಲಿಯಬೇಕು. ಆತನ ಆಟವನ್ನು ಗಮನಿಸಿ, ಯಾವ ರೀತಿಯಲ್ಲಿ ಬ್ಯಾಟಿಂಗ್ ನಡೆಸುತ್ತಾರೆ, ತಂತ್ರಗಳನ್ನು ಬಳಸುತ್ತಾರೆ ಎಂದು ತಿಳಿದುಕೊಳ್ಳಬೇಕು. ನಾನು ಕೂಡ ಹನೀಫ್ ಮೊಹಮ್ಮದ್ ಹಾಗೂ ರೋಹನ್ ಕನ್ಹಾಯ್ ಅವರಿಂದ ಕಲಿತಿದ್ದೇನೆ. ಅವರಿಂದ ತರಬೇತಿಯನ್ನು ಪಡೆದುಕೊಂಡಿಲ್ಲ. ಆದರೆ ಅವರ ಆಟವನ್ನು ನೋಡು ಕಲಿತಿದ್ದೇನೆ' ಎಂದು ಅಬ್ಬಾಸ್ ಹೇಳಿದ್ದಾರೆ.