ಈತ ಭಾರತೀಯ ಕ್ರಿಕೆಟ್‌ನ ಸಾರ್ವಕಾಲಿಕ ಶ್ರೇಷ್ಠ; ಮಾಜಿ ನಾಯಕನನ್ನು ಶ್ಲಾಘಿಸಿದ ಸೌರವ್ ಗಂಗೂಲಿ

ಇತ್ತೀಚಿಗಷ್ಟೆ ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕರಾದ ಮಹೇಂದ್ರ ಸಿಂಗ್ ಧೋನಿ ಮತ್ತು ಸೌರವ್ ಗಂಗೂಲಿ ಭೇಟಿಯಾಗಿದ್ದರು. ಇದು ಸಮಾಜಿಕ ಜಾಲತಾಣದಲ್ಲಿ ಭಾರೀ ಸುದ್ದಿಯಾಗಿತ್ತು. ರಾಜನು ಸೂಪರ್ ಕಿಂಗ್‌ನನ್ನು ಭೇಟಿಯಾದಾಗ ಎಂದು ಚೆನ್ನೈ ಸೂಪರ್ ಕಿಂಗ್ಸ್ ಶೀರ್ಷಿಕೆ ನೀಡಿತ್ತು.

ಇದೀಗ ಎಂಎಸ್ ಧೋನಿ ಅವರು ಯುವ ಪೀಳಿಗೆಯ ಕ್ರಿಕೆಟಿಗರ ಮೇಲೆ ಸಾಕಷ್ಟು ಪ್ರಭಾವ ಬೀರಿದ್ದಾರೆ ಎಂದು ಭಾರತದ ಮಾಜಿ ನಾಯಕ ಸೌರವ್ ಗಂಗೂಲಿ ಶ್ಲಾಘಿಸಿದ್ದಾರೆ.

ಕೋಲ್ಕತ್ತಾದಲ್ಲಿ ನಡೆದ ಸ್ಪೋರ್ಟ್‌ಸ್ಟಾರ್ ಈಸ್ಟ್ ಸ್ಪೋರ್ಟ್ಸ್ ಕಾನ್‌ಕ್ಲೇವ್‌ನಲ್ಲಿ ಮಾತನಾಡಿದ ಸೌರವ್ ಗಂಗೂಲಿ, ಎಂಎಸ್ ಧೋನಿ ಅವರು ಆಡಿದ ಪಂದ್ಯಗಳಲ್ಲಿ ಮಾತ್ರವಲ್ಲದೆ, ಅವರು ಹೇಗೆ ಒಂದು ಪೀಳಿಗೆಯ ಆಟಗಾರರಿಗೆ ಸ್ಫೂರ್ತಿಯಾಗಿ ಸೇವೆ ಸಲ್ಲಿಸಿದರು ಎಂಬುದನ್ನು ಅಳೆಯಲಾಗುತ್ತದೆ ಎಂದು ಬಿಸಿಸಿಐ ಮಾಜಿ ಅಧ್ಯಕ್ಷ ಅಭಿಪ್ರಾಯಪಟ್ಟರು.

"ನಾನು ಎಂಎಸ್ ಧೋನಿಯನ್ನು ಶೂಟಿಂಗ್ ಕಾರಣದಿಂದ ಮುಂಬೈನಲ್ಲಿ ಒಂದೆರಡು ದಿನಗಳ ಹಿಂದೆ ಭೇಟಿಯಾದೆ. ಎಂಎಸ್ ಧೋನಿ ಪೂರ್ಣ ಚಾಂಪಿಯನ್ ಮತ್ತು ಭಾರತೀಯ ಕ್ರಿಕೆಟ್‌ನ ಸಾರ್ವಕಾಲಿಕ ಶ್ರೇಷ್ಠರಲ್ಲಿ ಒಬ್ಬರು. ಭಾರತಕ್ಕೆ ವಿಶ್ವಕಪ್‌ಗಳನ್ನು ಗೆದ್ದು ಕೊಟ್ಟ ನಾಯಕ, ಕಡಿಮೆ ಆಟಗಾರರನ್ನು ನೀಡಿದ ಜಾರ್ಖಂಡ್ ರಾಜ್ಯದಿಂದ ಬಂದವರು," ಎಂದು ಫೆಬ್ರವರಿ 6ರ ಸೋಮವಾರ ಕೋಲ್ಕತ್ತಾದಲ್ಲಿ ನಡೆದ ಕಾನ್‌ಕ್ಲೇವ್‌ನಲ್ಲಿ ಸೌರವ್ ಗಂಗೂಲಿ ತಿಳಿಸಿದರು.

ಭಾರತದ ಪೂರ್ವ ಭಾಗದಲ್ಲಿ ಕ್ರಿಕೆಟ್ ಉತ್ತಮವಾಗಿಲ್ಲ ಎಂದು ಭಾವಿಸಿದ ಅನೇಕರಿಗೆ ನಾನು ಮತ್ತು ಎಂಎಸ್ ಧೋನಿ ತಪ್ಪು ಎಂದು ಸಾಬೀತುಪಡಿಸಿದ್ದೇವೆ ಎಂದು ಸೌರವ್ ಗಂಗೂಲಿ ಹೇಳಿದರು.

"ಭಾರತದ ಇಬ್ಬರು ಯಶಸ್ವಿ ನಾಯಕರು ಕ್ರಿಕೆಟ್ ಉತ್ತಮವಾಗಿಲ್ಲ ಎಂದು ಜನರು ಭಾವಿಸಿದ ದೇಶದ ಭಾಗದಿಂದ ಬಂದಿದ್ದೇವೆ. ನಾನು ಹೆಮ್ಮೆಪಡುತ್ತೇನೆ, ಆದರೆ ನಾನು ಎಂದು ಹೇಳಲು ಸಾಧ್ಯವಿಲ್ಲ. ಅಲ್ಲಿ ಎಂಎಸ್ ಧೋನಿ ಇರುತ್ತಾರೆ. ವಾಸ್ತವವಾಗಿ ಅವರು ಒಂದು ಪೀಳಿಗೆಯನ್ನು ಬದಲಾಯಿಸಿದ್ದಾರೆ".

"ಇಲ್ಲಿಂದ ನಾನು ಯಶಸ್ವಿಯಾಗಬಲ್ಲೆ ಎಂದು ತಮ್ಮ ಸುತ್ತಲಿನ ಆಟಗಾರರು ನಂಬುವಂತೆ ಮಾಡಿದ್ದಾರೆ. ಎಂಎಸ್ ಧೋನಿಯನ್ನು ನೋಡಿ ಇಶಾನ್ ಕಿಶನ್ ಅವರಂತಹ ಆಟಗಾರ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡುತ್ತಿದ್ದಾರೆ," ಎಂದು ಬಿಸಿಸಿಐ ಮಾಜಿ ಅಧ್ಯಕ್ಷ ಸೌರವ್ ಗಂಗೂಲಿ ತಿಳಿಸಿದರು.

ಭಾರತದ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯುತ್ತಮ ನಾಯಕರಲ್ಲಿ ಒಬ್ಬರೆಂದು ಪರಿಗಣಿಸಲ್ಪಟ್ಟಿರುವ ಸೌರವ್ ಗಂಗೂಲಿ, ಎಂಎಸ್ ಧೋನಿ ನಾಯಕತ್ವದ ನಂತರ ಸಕ್ರಿಯ ಆಟದಿಂದ ಹಿಂದೆ ಸರಿದರು. ಎಂಎಸ್ ಧೋನಿ ನಾಯಕತ್ವದಲ್ಲಿ ಭಾರತ ಟಿ20 ವಿಶ್ವಕಪ್, ಏಕದಿನ ವಿಶ್ವಕಪ್ ಮತ್ತು ಚಾಂಪಿಯನ್ಸ್ ಟ್ರೋಫಿ ಗೆದ್ದಿದೆ.

ವಾಸ್ತವವಾಗಿ ಭಾರತ ಗೆದ್ದಿದ್ದ ಕೊನೆಯ ಐಸಿಸಿ ಪ್ರಶಸ್ತಿಯೆಂದರೆ, ಅದು ಎಂಎಸ್ ಧೋನಿ ನಾಯಕತ್ವದಲ್ಲಿ 2013ರ ಚಾಂಪಿಯನ್ಸ್ ಟ್ರೋಫಿ. ಭಾರತದ ದಿಗ್ಗಜ ವಿಕೆಟ್-ಕೀಪರ್ ಬ್ಯಾಟರ್ ಎಂಎಸ್ ಧೋನಿ 2020ರ ಆಗಸ್ಟ್ 15ರಂದು ಎಲ್ಲಾ ಮಾದರಿಯ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ನಿವೃತ್ತಿ ಹೊಂದಿದರು. ಇದೀಗ 2023ರಲ್ಲಿ ತಮ್ಮ ಕೊನೆಯ ಇಂಡಿಯನ್ ಪ್ರೀಮಿಯರ್ ಲೀಗ್ ಪಂದ್ಯಾವಳಿಯನ್ನು ಆಡಲಿದ್ದಾರೆ.