ಭಾರತದ ಅತೀ ಹಿರಿಯ ಪ್ರಥಮದರ್ಜೆ ಕ್ರಿಕೆಟರ್ ವಸಂತ್ ರಾಯ್ಜಿ ನಿಧನ

ಮುಂಬೈ, ಜೂನ್ 13: ಭಾರತದ ಅತೀ ಹಿರಿಯ ಪ್ರಥಮದರ್ಜೆ ಕ್ರಿಕೆಟರ್ ವಸಂತ್ ರಾಯ್ಜಿ ನಿಧನರಾಗಿದ್ದಾರೆ. ಭರ್ತಿ 100 ವಯಸ್ಸಾಗಿದ್ದ ರಾಯ್ಜಿ, ತನ್ನ ಪತ್ನಿ ಮತ್ತು ಇಬ್ಬರು ಪುತ್ರಿಯರನ್ನು ಅಗಲಿದ್ದಾರೆ. ಶನಿವಾರ (ಜೂನ್ 13) ಮುಂಜಾನೆ ರಾಯ್ಜಿ ಕೊನೆಯುಸಿರೆಳೆದಿರುವುದಾಗಿ ಅವರ ಕುಟುಂಬಸ್ಥರು ಮಾಹಿತಿ ನೀಡಿದ್ದಾರೆ.

'ದಕ್ಷಿಣ ಮುಂಬೈಯಲ್ಲಿರುವ ವಾಲ್ಕೇಶ್ವರ್‌ನಲ್ಲಿನ ತಮ್ಮ ನಿವಾಸದಲ್ಲಿ ಮಲಗಿದ್ದ ವಸಂತ್ ರಾಯ್ಜಿ, ವಯೋ ಸಹಜವಾಗಿ ಶನಿವಾರ ಮುಂಜಾನೆ 2.20 am ವೇಳೆಗೆ ಅಲ್ಲೇ ಸಾವನ್ನಪ್ಪಿದ್ದಾರೆ,' ಎಂದು ರಾಯ್ಜಿಯ ಅಳಿಯ ಸುದರ್ಶನ ನಾನಾವತಿ ಮಾಹಿತಿ ನೀಡಿದ್ದಾರೆ.

ಬಲಗೈ ಬ್ಯಾಟ್ಸ್‌ಮನ್ ಆಗಿದ್ದ ರಾಯ್ಜಿ, 1940ರ ದಶಕದಲ್ಲಿ ಒಟ್ಟು 9 ಪ್ರಥಮರ್ಜೆ ಕ್ರಿಕೆಟ್ ಪಂದ್ಯಗಳನ್ನು ಆಡಿದ್ದರು. 277 ಒಟ್ಟಾರೆ ರನ್ ಗಳಿಸಿದ್ದ ರಾಯ್ಜಿಯದ್ದು 68 ವೈಯಕ್ತಿಯ ಅತ್ಯಧಿಕ ರನ್ ಆಗಿತ್ತು.

1939ರಲ್ಲಿ ವಸಂತ್ ರಾಯ್ಜಿ ಮುಂಬೈಯಲ್ಲಿರುವ ಕ್ರಿಕೆಟ್ ಕ್ಲಬ್ ಆಫ್ ಇಂಡಿಯಾ ಟೀಮ್ ಪರ ಪಾದಾರ್ಪಣೆ ಮಾಡಿದ್ದರು. 1941ರಲ್ಲಿ ಮುಂಬೈ ಪರ ಪಾದಾರ್ಪಣೆ ಮಾಡಿದ್ದರು. ಈ ತಂಡದ ಪರ ವಿಜಯ್ ಮರ್ಚೆಂಟ್ ನಾಯಕತ್ವದಲ್ಲಿ ಪಶ್ಚಿಮ ಭಾರತದಲ್ಲಿ ಆಡಿದ್ದರು.