ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪಾಕ್‌ ಆಲ್ ರೌಂಡರ್ ಸನಾ ಮಿರ್ ನಿವೃತ್ತಿ

ಕರಾಚಿ, ಏಪ್ರಿಲ್ 25: ಪಾಕಿಸ್ತಾನ ಮಹಿಳಾ ಕ್ರಿಕೆಟ್ ತಂಡದ ಆಲ್ ರೌಂಡರ್ ಸನಾ ಮಿರ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ. ಇದರೊಂದಿಗೆ ಸನಾ ಅವರ 15 ವರ್ಷಗಳ ಕ್ರಿಕೆಟ್ ವೃತ್ತಿ ಬದುಕು ಅಂತ್ಯಗೊಂಡಿದೆ. ಸನಾ ಅವರಿಗೀಗ 35ರ ಹರೆಯ.

2005ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡಿದ್ದ ಸನಾ ಮಿರ್, 120 ಏಕದಿನ ಪಂದ್ಯಗಳಲ್ಲಿ 24.27ರ ಸರಾಸರಿಯಲ್ಲಿ 151 ವಿಕೆಟ್, 106 ಟಿ20ಐ ಪಂದ್ಯಗಳಲ್ಲಿ 23.42ರ ಸರಾಸರಿಯಲ್ಲಿ 89 ವಿಕೆಟ್ ಪಡೆದಿದ್ದಾರೆ. ಅಲ್ಲದೆ ಏಕದಿನದಲ್ಲಿ 17.91ರ ಸರಾಸರಿಯಲ್ಲಿ 1630 ರನ್, ಟಿ20ಐನಲ್ಲಿ 14.07ರ ಸರಾಸರಿಯಂತೆ 802 ರನ್ ಗಳಿಸಿದ್ದಾರೆ.

ಕಳೆದ ನವೆಂಬರ್‌ನಲ್ಲಿ ಸನಾ ಮಿರ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ಬ್ರೇಕ್ ಪಡೆದುಕೊಂಡಿದ್ದರು. ಹೀಗಾಗಿ ಪಾಕಿಸ್ತಾನ ತಂಡದ ಇಂಗ್ಲೆಂಡ್‌ ಪ್ರವಾಸವನ್ನು ಸನಾ ತಪ್ಪಿಸಿಕೊಂಡಿದ್ದರು. ಅಲ್ಲದೆ ಕಳಪೆ ಫಾರ್ಮ್‌ನ ಕಾರಣ ಆಸ್ಟ್ರೇಲಿಯಾದಲ್ಲಿ ಈ ಬಾರಿ ನಡೆದಿದ್ದ ಟಿ20 ವಿಶ್ವಕಪ್‌ ವೇಳೆ ಪಾಕಿಸ್ತಾನ ತಂಡದಲ್ಲಿ ಸ್ಥಾನ ಇವರು ಗಿಟ್ಟಿಸಿಕೊಂಡಿರಲಿಲ್ಲ.

'ಕಳೆದ ಕೆಲ ತಿಂಗಳುಗಳು ನನಗೆ ನಿವೃತ್ತಿಯತ್ತ ಯೋಚಿಸಲು ಅವಕಾಶ ಒದಗಿಸಿದವು. ಮುನ್ನಡೆಯಲು ಇದೇ ಸರಿಯಾದ ಸಮಯ ಅಂತ ನನಗನ್ನಿಸುತ್ತಿದೆ. ನನ್ನ ಸಾಮರ್ಥ್ಯಕ್ಕೆ ತಕ್ಕಂತೆ ನನ್ನ ಅತ್ಯತ್ತಮ ಕೊಡುಗೆಯನ್ನು ನನ್ನ ದೇಶಕ್ಕೆ ನೀಡಿದ್ದೇನೆ,' ಎಂದು ಸನಾ ನಿವೃತ್ತಿ ಘೋಷಿಸಿದ ಬಳಿಕ ಹೇಳಿದ್ದಾರೆ.