ಪ್ರವಾಸ ಸರಣಿ: ಇಂಗ್ಲೆಂಡ್ ತಲುಪಿದ ಪಾಕಿಸ್ತಾನ ಕ್ರಿಕೆಟ್ ತಂಡ

ಮ್ಯಾನ್ಚೆಸ್ಟರ್, ಜೂನ್ 29: ಪ್ರವಾಸ ಸರಣಿಗಾಗಿ 31 ಮಂದಿಯನ್ನೊಳಗೊಂಡ ಪಾಕಿಸ್ತಾನ ಕ್ರಿಕೆಟ್ ತಂಡ ಭಾನುವಾರ (ಜೂನ್ 28) ಇಂಗ್ಲೆಂಡ್‌ಗೆ ತಲುಪಿದೆ. ಇಂಗ್ಲೆಂಡ್‌-ಪಾಕಿಸ್ತಾನ ಸರಣಿಯು ಅಸಲಿಗೆ 3 ಟೆಸ್ಟ್ ಪಂದ್ಯಗಳು ಮತ್ತು 3 ಟಿ20ಐ ಪಂದ್ಯಗಳನ್ನು ಒಳಗೊಂಡಿತ್ತು. ಆದರೆ ಕೊರೊನಾ ವೈರಸ್ ಭೀತಿಯಿಂದಾಗಿ ಸದ್ಯಕ್ಕೆ ಟಿ20ಐ ಸರಣಿಯ ವೇಳಾಪಟ್ಟಿ ಮಾತ್ರ ಪ್ರಕಟಗೊಂಡಿದೆ.

ಇಂಗ್ಲೆಂಡ್ ಪ್ರವಾಸಕ್ಕೂ ಮುನ್ನ ಕೊರೊನಾವೈರಸ್ ಪರೀಕ್ಷೆಯ ವೇಳೆ ಪಾಸಿಟಿವ್ ಎಂದು ಕಂಡು ಬಂದಿದ್ದ 10 ಆಟಗಾರರಲ್ಲಿ 6 ಮಂದಿಯ ಫಲಿತಾಂಶ ಎರಡನೇ ಬಾರಿಯ ಪರೀಕ್ಷೆಯ ವೇಳೆ ನೆಗೆಟಿವ್ ಬಂದಿತ್ತು. ಆದರೂ ಈ 10 ಆಟಗಾರರನ್ನು ಮೊದಲ ಬ್ಯಾಚ್‌ನಲ್ಲಿ ಕಳುಹಿಸಲಾಗಿಲ್ಲ. ಎರಡನೇ ಬಾರಿ ನೆಗೆಟಿವ್ ಎಂದು ಬಂದಿರುವ ಉಳಿದ ಎಲ್ಲಾ ಆಟಗಾರರು ಎರಡನೇ ಬ್ಯಾಚ್‌ ಮೂಲಕ ಇಂಗ್ಲೆಂಡ್‌ಗೆ ಹೋಗಲಿದ್ದಾರೆ.

ಲಾಹೋರ್‌ನಿಂದ ಇಂಗ್ಲೆಂಡ್‌ಗೆ ಪ್ರವಾಸ ಬೆಳೆಸಿದ್ದ ಈ ತಂಡದಲ್ಲಿ 11 ಮಂದಿ ಸಿಬ್ಬಂದಿಯಿದ್ದರು. ಇಂಗ್ಲೆಂಡ್ ತಲುಪಿರುವ ಪಾಕ್‌ ತಂಡ ವೋರ್ಸೆಸ್ಟರ್‌ನಲ್ಲಿ 14 ದಿನಗಳ ಕಡ್ಡಾಯ ಕ್ವಾರಂಟೈನ್ ಪಾಲಿಸಲಿದೆ. ಆ ಬಳಿಕ ಆಟಗಾರರನ್ನು ವೋರ್ಸೆಸ್ಟರ್ಶೈರ್ ಮೈದಾನಕ್ಕೆ ರವಾನಿಸಲಾಗುತ್ತದೆ.

ಇಂಗ್ಲೆಂಡ್‌ನಲ್ಲಿ ಬಂದಿಳಿಯುವಾಗ ಪಾಕಿಸ್ತಾನ ಆಟಗಾರರು ಮಾಸ್ಕ್ ಧರಿಸಿದ್ದು, ಒಬ್ಬರಿಂದ ಒಬ್ಬರು ಅಂತರ ಕಾಯ್ದುಕೊಂಡಿದ್ದು ಕಾಣಸಿಕ್ಕಿತು. ಮೂರು ಪಂದ್ಯಗಳ ಟಿ20ಐ ಸರಣಿ ಆಗಸ್ಟ್ 29ರಿಂದ ಆರಂಭಗೊಳ್ಳಲಿದೆ. ಮೊದಲ ಪಂದ್ಯ ಲೀಡ್ಸ್‌ನ ಹೆಡಿಂಗ್ಲಿಯಲ್ಲಿ ನಡೆಯಲಿದೆ.