ರಣಜಿ ಟ್ರೋಫಿ 2022-23: ಸಿ ಗುಂಪಿನ ಪಂದ್ಯದಲ್ಲಿ ಗೋವಾ ತಂಡವನ್ನು ಎದುರಿಸಲಿದೆ ಕರ್ನಾಟಕ

ಮಂಗಳವಾರ (ಡಿಸೆಂಬರ್ 27) ಗೋವಾ ಕ್ರಿಕೆಟ್ ಅಸೋಸಿಯೇಷನ್ ಅಕಾಡೆಮಿ ಮೈದಾನದಲ್ಲಿ ಆರಂಭವಾಗಲಿರುವ ರಣಜಿ ಟ್ರೋಫಿ ಎಲೈಟ್ "ಸಿ' ಗುಂಪಿನ ಮುಖಾಮುಖಿಯಲ್ಲಿ ಗೋವಾ ವಿರುದ್ಧ ಗರಿಷ್ಠ ಅಂಕ ಗಳಿಸಲು ಕರ್ನಾಟಕ ಆತ್ಮವಿಶ್ವಾಸದಲ್ಲಿದೆ.

ಬೆಂಗಳೂರಿನಲ್ಲಿ ಪಾಂಡಿಚೇರಿ ವಿರುದ್ಧ ಇನಿಂಗ್ಸ್ ಜಯ ಸಾಧಿಸಿದ ಬೆನ್ನಲ್ಲೇ ಕರ್ನಾಟಕ ಈ ಪಂದ್ಯವನ್ನು ಆಡುತ್ತಿದೆ. ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಮೂರು ದಿನಗಳೊಳಗೆ ಪ್ರಬಲ ಕರ್ನಾಟಕ ತಂಡ ಪಂದ್ಯವನ್ನು ತನ್ನದಾಗಿಸಿಕೊಂಡಿತು.

ಮತ್ತೊಂದೆಡೆ ಗೋವಾ ತನ್ನ ಕೊನೆಯ ಎರಡು ಪಂದ್ಯಗಳಲ್ಲಿ ಡ್ರಾನಲ್ಲಿ ಮುಗಿಸಿದೆ. ಕೆಲವು ದಿನಗಳ ಹಿಂದೆ ಜೆಮ್‌ಶೆಡ್‌ಪುರದಲ್ಲಿ ಗೋವಾ ತಂಡವು ಜಾರ್ಖಂಡ್ ವಿರುದ್ಧ ಮೊದಲ ಇನ್ನಿಂಗ್ಸ್ ಮುನ್ನಡೆ ಪಡೆಯುವಲ್ಲಿ ಸ್ವಲ್ಪದರಲ್ಲೇ ತಪ್ಪಿಸಿಕೊಂಡಿತ್ತು.

ನಾಯಕ ದರ್ಶನ್ ಮಿಸಾಲ್ ಮತ್ತು ವಿಕೆಟ್‌ಕೀಪರ್-ಬ್ಯಾಟರ್ ಏಕನಾಥ್ ಕೇರ್ಕರ್ ತಲಾ ಅರ್ಧಶತಕ ಗಳಿಸಿ ತಂಡವನ್ನು ಜಾರ್ಖಂಡ್‌ನ 386 ರನ್‌ಗೆ ಹತ್ತಿರ ಕೊಂಡೊಯ್ದಿದ್ದರು. ಆದರೆ ಅಂತಿಮವಾಗಿ 24 ರನ್‌ಗಳ ಅಂತರದಲ್ಲಿ ಹಿನ್ನಡೆ ಅನುಭವಿಸಿತು.

ಜಾರ್ಖಂಡ್ ನಂತರ ಸಂಪೂರ್ಣ ಗೆಲುವು ಪಡೆದುಕೊಳ್ಳಲು ಬೇಗ ಡಿಕ್ಲೇರ್ ಮಾಡಿಕೊಂಡಿತು. ಗೋವಾ ತಂಡ ಡ್ರಾ ಮಾಡಿಕೊಳ್ಳುವಲ್ಲಿ ಯಶಸ್ವಿಯಾಯಿತು.

ಇನ್ನು ಪಾಂಡಿಚೇರಿ ತಂಡವನ್ನು ಸೋಲಿಸುವಲ್ಲಿ ಕರ್ನಾಟಕ ಯಾವುದೇ ತೊಂದರೆ ಅನುಭವಿಸಲಿಲ್ಲ. ವೇಗಿಗಳಾದ ವಿದ್ವತ್ ಕಾವೇರಪ್ಪ, ವೈಶಾಕ್ ವಿಜಯ್‌ಕುಮಾರ್ ಮತ್ತು ರೋನಿತ್ ಮೋರೆ ಪಾಂಡಿಚೇರಿ ಬ್ಯಾಟಿಂಗ್ ಲೈನ್-ಅಪ್ ಮುರಿದು ಹಾಕಿದರು. ಹೀಗಾಗಿ ಆತಿಥೇಯ ತಂಡವು ಎದುರಾಳಿಗಳನ್ನು 170 ಮತ್ತು 127 ರನ್‌ಗಳಿಗೆ ಆಲೌಟ್ ಮಾಡಲು ಯಶಸ್ವಿಯಾಯಿತು.

ಆರಂಭಿಕ ಬ್ಯಾಟರ್ ಆರ್. ಸಮರ್ಥ್ 137 ರನ್ ಗಳಿಸಿದ್ದರಿಂದ ಕರ್ನಾಟಕ ಕೇವಲ ಒಂದು ಇನ್ನಿಂಗ್ಸ್ ಬ್ಯಾಟಿಂಗ್ ಮಾಡಲು ಸಾಧ್ಯವಾಯಿತು. ಇದರಿಂದ ಕರ್ನಾಟಕ ಇನ್ನಿಂಗ್ಸ್ ಮತ್ತು 7 ರನ್‌ಗಳಿಂದ ಜಯಭೇರಿ ಬಾರಿಸಿತು.

ಕರ್ನಾಟಕದ ವಿಶಾಲ್ ಒನಾಟ್ ಎರಡು ಪ್ರಥಮ ದರ್ಜೆ ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಕ್ರಮವಾಗಿ 33, 14 ಮತ್ತು 4 ಸ್ಕೋರ್‌ಗಳನ್ನು ದಾಖಲಿಸಿದ್ದಾರೆ. ಅನುಭವಿ ಮನೀಶ್ ಪಾಂಡೆ ಪಾಂಡಿಚೇರಿ ವಿರುದ್ಧ 78 ಎಸೆತಗಳಲ್ಲಿ 45 ರನ್ ಗಳಿಸುವ ಮೂಲಕ ಬ್ಯಾಟಿಂಗ್ ಫಾರ್ಮ್‌ನ ಲಕ್ಷಣಗಳನ್ನು ತೋರಿಸಿದರು.

ಪಾಂಡಿಚೆರಿ ವಿರುದ್ಧದ ಪಂದ್ಯದಲ್ಲಿ ಆಲ್‌ರೌಂಡರ್ ಶ್ರೇಯಸ್ ಗೋಪಾಲ್ ಕೇವಲ ಎರಡು ಓವರ್‌ಗಳನ್ನು ಬೌಲ್ ಮಾಡಿದರು. ಪಂದ್ಯವು ನಾಲ್ಕನೇ ದಿನಕ್ಕೆ ತಿರುಗಿದರೆ ಶ್ರೇಯಸ್ ಗೋಪಾಲ್ ಅವರನ್ನು ಬೌಲಿಂಗ್‌ಗೆ ಇಳಿಸಲು ನಿರ್ಧರಿಸಲಾಗಿತ್ತು ಎಂದು ಕೋಚ್ ಪಿ.ವಿ ಶಶಿಕಾಂತ್ ವಿವರಿಸಿದರು.