ಕೊನೆಗೂ ಟೆಸ್ಟ್ ಕ್ರಿಕೆಟ್ ನಿವೃತ್ತಿ ಕುರಿತು ತುಟಿ ಬಿಚ್ಚಿದ ರವೀಂದ್ರ ಜಡೇಜಾ

ನಿಜವಾದ ಸ್ನೇಹಿತರು ವದಂತಿಗಳಿಗೆ ಕಿವಿ ಕೊಡುವುದಿಲ್ಲ ಎಂದು ಬರೆದುಕೊಂಡ ಜಡೇಜಾ

ಟೆಸ್ಟ್ ಕ್ರಿಕೆಟ್ ಮಾದರಿಗೆ ನಿವೃತ್ತಿ ಘೋಷಿಸಲಿದ್ದಾರೆ ಎಂದು ಯಥೇಚ್ಚವಾಗಿ ಹರಿದಾಡುತ್ತಿರುವ ಸುದ್ದಿಯ ಕುರಿತು ಸ್ವತಃ ರವೀಂದ್ರ ಜಡೇಜಾ ಅವರೇ ತಮ್ಮ ಅಧಿಕೃತ ಟ್ವಿಟರ್ ಖಾತೆಯ ಮೂಲಕ ಪ್ರತಿಕ್ರಿಯಿಸಿದ್ದು "ನಕಲಿ ಸ್ನೇಹಿತರು ವದಂತಿಗಳಲ್ಲಿ ನಂಬಿಕೆ ಇಡುತ್ತಾರೆ ಆದರೆ ನಿಜವಾದ ಸ್ನೇಹಿತರು ನಿಮ್ಮಲ್ಲಿ ನಂಬಿಕೆಯನ್ನು ಇಡುತ್ತಾರೆ" ಎಂಬ ಫೋಟೋವನ್ನು ಟ್ವೀಟ್ ಮಾಡಿದ್ದಾರೆ. ಈ ಮೂಲಕ ವದಂತಿಗಳಿಗೆ ತಲೆಕೆಡಿಸಿಕೊಳ್ಳದೇ ಸತ್ಯಾಂಶವನ್ನು ತಿಳಿಯಿರಿ ಎಂಬರ್ಥದಲ್ಲಿ ರವೀಂದ್ರ ಜಡೇಜಾ ಟ್ವೀಟ್ ಮಾಡಿದ್ದಾರೆ.

ಇನ್ನೂ ತುಂಬಾ ಸಮಯವಿದೆ ಎಂದ ರವೀಂದ್ರ ಜಡೇಜಾ

ನಿಜವಾದ ಸ್ನೇಹಿತರಾರು ವದಂತಿಗಳಿಗೆ ಕಿವಿಗೊಡುವುದಿಲ್ಲ ಎಂದು ಬರೆದುಕೊಂಡಿರುವ ರವೀಂದ್ರ ಜಡೇಜಾ ತಾವು ಟೆಸ್ಟ್ ಜೆರ್ಸಿ ತೊಟ್ಟಿರುವ ಫೋಟೋವೊಂದನ್ನು ನಂತರದ ಟ್ವೀಟ್‌ನಲ್ಲಿ ಹಂಚಿಕೊಂಡಿದ್ದು ಇನ್ನೂ ದೊಡ್ಡ ಅಂತರದ ಹಾದಿ ಮುಂದಿದೆ ಎಂದು ಬರೆದುಕೊಂಡಿದ್ದಾರೆ. ಈ ಮೂಲಕ ತಾನು ಟೆಸ್ಟ್ ಕ್ರಿಕೆಟ್ ಮಾದರಿಯಲ್ಲಿ ಇನ್ನೂ ಹೆಚ್ಚಿನ ಸಮಯದವರೆಗೆ ಕಣಕ್ಕಿಳಿಯಲಿದ್ದೇನೆ ಎಂಬುದನ್ನು ರವೀಂದ್ರ ಜಡೇಜಾ ಪರೋಕ್ಷವಾಗಿ ತಮ್ಮ ಅಭಿಮಾನಿಗಳಿಗೆ ತಿಳಿಸಿದ್ದಾರೆ. ಈ ಮೂಲಕ ಜಡೇಜಾ ಟೆಸ್ಟ್ ಕ್ರಿಕೆಟ್ ಮಾದರಿಗೆ ನಿವೃತ್ತಿ ಘೋಷಿಸಲಿದ್ದಾರೆ ಎಂಬ ಎಲ್ಲಾ ವದಂತಿಗಳಗೆ ರವೀಂದ್ರ ಜಡೇಜಾ ಅಂತ್ಯ ಹಾಡಿದ್ದಾರೆ.

ಟೆಸ್ಟ್ ಕ್ರಿಕೆಟ್ ಮಾದರಿಯಲ್ಲಿ ರವೀಂದ್ರ ಜಡೇಜಾ ಅಂಕಿ ಅಂಶ

ರವೀಂದ್ರ ಜಡೇಜಾ 3 ಮಾದರಿಯಲ್ಲಿಯೂ ಭಾರತ ತಂಡದ ಪರ ಆಲ್ ರೌಂಡರ್ ಆಟಗಾರನಾಗಿ ಸದಾ ಉತ್ತಮ ಪ್ರದರ್ಶನವನ್ನು ನೀಡುವಂತಹ ಸಾಮರ್ಥ್ಯವನ್ನು ಹೊಂದಿರುವ ಆಟಗಾರ. ಹೀಗಾಗಿಯೇ ಯಾವುದೇ ಸರಣಿಗೆ ಭಾರತ ತಂಡ ಪ್ರಕಟವಾದಾಗ ಅಲ್ಲಿ ರವೀಂದ್ರ ಜಡೇಜಾ ಹೆಸರು ಸಾಮಾನ್ಯವಾಗಿ ಇದ್ದೇ ಇರುತ್ತದೆ. ಟೀಮ್ ಇಂಡಿಯಾಗೆ ಯಾವುದೇ ಹೊಸ ಪ್ರತಿಭಾವಂತ ಆಲ್ ರೌಂಡರ್ ಆಟಗಾರ ಬಂದರೂ ರವೀಂದ್ರ ಜಡೇಜಾ ಗಾಯದ ಸಮಸ್ಯೆಗೆ ಒಳಗಾಗಿ ವಿಶ್ರಾಂತಿ ಪಡೆಯಲೆಂದು ಹೊರ ಹೋದರೆ ಮಾತ್ರ ಆ ಆಟಗಾರನಿಗೆ ತಂಡದಲ್ಲಿ ಸ್ಥಾನ ಸಿಗುತ್ತದೆಯೇ ಹೊರತು ರವೀಂದ್ರ ಜಡೇಜಾ ಇದ್ದಾಗ ಆ ಮತ್ತೋರ್ವ ಆಟಗಾರನಿಗೆ ಸ್ಥಾನ ಸಿಗುವುದು ಸುಲಭದ ಮಾತಲ್ಲ. ಹೀಗೆ ಭಾರತ ತಂಡದಲ್ಲಿ ಖಾಯಂ ಸದಸ್ಯನಾಗಿರುವ ರವೀಂದ್ರ ಜಡೇಜಾ ಇದುವರೆಗೂ ಟೀಮ್ ಇಂಡಿಯಾ ಪರ 57 ಟೆಸ್ಟ್ ಪಂದ್ಯಗಳನ್ನಾಡಿದ್ದು 2195 ರನ್ ಗಳಿಸಿದ್ದಾರೆ ಮತ್ತು 232 ವಿಕೆಟ್‍ಗಳನ್ನು ಕಬಳಿಸಿದ್ದಾರೆ.