ಅವರ ಇನ್‌ಸ್ವಿಂಗರ್‌ಗಳು ನನಗೆ ತುಂಬಾ ತೊಂದರೆ ಕೊಡುತ್ತಿದ್ದವು ಎಂದ ರೋಹಿತ್ ಶರ್ಮಾ

ಜೂಲನ್ ಗೋಸ್ವಾಮಿ ಹಾಡಿ ಹೊಗಳಿದ ರೋಹಿತ್

ಜೂಲನ್ ಗೋಸ್ವಾಮಿ ವಿದಾಯ ಹೇಳುತ್ತಿರುವ ಸಂದರ್ಭದಲ್ಲಿ ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಅವರನ್ನು ಹೊಗಳಿದ್ದಾರೆ. ಅವರ ಜೊತೆ ತಮ್ಮ ಕ್ರಿಕೆಟ್‌ ನಂಟನ್ನು ಬಹಿರಂಗಪಡಿಸಿದ್ದಾರೆ. ನೆಟ್ಸ್‌ನಲ್ಲಿ ಜೂಲನ್ ಗೋಸ್ವಾಮಿ ರೋಹಿತ್ ಶರ್ಮಾಗೆ ಬೌಲಿಂಗ್ ಮಾಡಿದ್ದರ ಬಗ್ಗೆ ಹೇಳಿಕೊಂಡಿದ್ದಾರೆ.

"ಜೂಲಾನ್ ಗೋಸ್ವಾಮಿ ಒಬ್ಬ ದಂತಕಥೆ, ಅವರು ದೇಶದ ಬಗ್ಗೆ ಸಾಕಷ್ಟು ಉತ್ಸಾಹವನ್ನು ತೋರಿಸಿದ್ದಾರೆ, ಇದು ದೇಶದ ಎಲ್ಲಾ ಯುವಕರಿಗೆ ಸ್ಫೂರ್ತಿಯಾಗಿದ್ದಾರೆ. ತಮ್ಮ ಇನ್‌ಸ್ವಿಂಗರ್‌ಗಳ ಮೂಲಕ ಎನ್‌ಸಿಎಯಲ್ಲಿ ನನಗೆ ಸವಾಲು ಹಾಕಿದ್ದರು" ಎಂದು ರೋಹಿತ್ ಶರ್ಮಾ ಆಸ್ಟ್ರೇಲಿಯಾ ವಿರುದ್ಧದ ಮೊದಲ ಪಂದ್ಯಕ್ಕಾಗಿ ಮೊಹಾಲಿಯಲ್ಲಿ ಅಭ್ಯಾಸದ ವೇಳೆ ನಡೆದ ಪೂರ್ವ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.

ಚೇತೇಶ್ವರ ಪೂಜಾರ 2.0: ತನ್ನ ವೇಗದ ಬ್ಯಾಟಿಂಗ್‌ಗೆ CSK ಕಾರಣ ಎಂದ ಪೂಜಾರ

ಆಕೆಯ ವಿದಾಯ ಸ್ಮರಣಿಯವಾಗಿಸುತ್ತೇವೆ

ಜೂಲನ್ ಅಂತರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳುವುದರೊಂದಿಗೆ, ಭಾರತೀಯ ಮಹಿಳಾ ತಂಡದ ನಾಯಕಿ ಹರ್ಮನ್‌ಪ್ರೀತ್ ಕೌರ್ ಅವರು ವೇಗದ ಅನುಭವಿ ಸ್ಮರಣೀಯ ವಿದಾಯವನ್ನು ನೀಡಲು ಬಯಸುವುದಾಗಿ ಹೇಳಿದ್ದಾರೆ.

"ನಾನು ಪದಾರ್ಪಣೆ ಮಾಡಿದಾಗ, ಅವರು ನಾಯಕಿಯಾಗಿದ್ದರು ಮತ್ತು ಅವರು ಆಡುವ ಕೊನೆಯ ಏಕದಿನ ಪಂದ್ಯವನ್ನು ಮುನ್ನಡೆಸಲು ನನಗೆ ಉತ್ತಮ ಅವಕಾಶವಾಗಿದೆ. ನಾವು ಅವರಿಗೆ ಕೆಲವು ಉತ್ತಮ ಕ್ಷಣಗಳನ್ನು ಸೃಷ್ಟಿಸಲು ಪ್ರಯತ್ನಿಸುತ್ತೇವೆ ಇದರಿಂದ ಅವರು ಉತ್ತಮ ನೆನಪುಗಳನ್ನು ಹೊಂದಬಹುದು" ಎಂದು ಕೌರ್ ಹೇಳಿದರು.

ಅವರ ಸ್ಥಾನ ತುಂಬುವುದು ಕಷ್ಟ

ಗೋಸ್ವಾಮಿ ಸ್ಥಾನವನ್ನು ಯಾರಿಂದಲೂ ತುಂಬಲು ಸಾಧ್ಯವಿಲ್ಲ ಎಂದ ಹರ್ಮನ್‌ಪ್ರೀತ್, ಅವರು ಹೇಗೆ ಕಠಿಣ ಅಭ್ಯಾಸ ನಡೆಸುತ್ತಿದ್ದರು ಎಂಬುದನ್ನು ನೆನಪಿಸಿಕೊಂಡರು. ಎಷ್ಟು ಆಟಗಾರರು ತನ್ನನ್ನು ನೋಡುತ್ತಾ ಕ್ರೀಡೆಯನ್ನು ಕೈಗೆತ್ತಿಕೊಂಡರು ಎಂಬುದನ್ನು ಅವರು ಪ್ರಸ್ತಾಪಿಸಿದರು, ತಂಡವು ತನಗೆ ವಿಶೇಷ ಸಂದರ್ಭವನ್ನಾಗಿ ಮಾಡಲು ಅತ್ಯುತ್ತಮವಾಗಿ ಪ್ರಯತ್ನಿಸುತ್ತದೆ ಎಂದು ಹೇಳಿದರು.

"ಅವರು ಎರಡು-ಮೂರು ಗಂಟೆಗಳ ಕಾಲ ಬೌಲ್ ಮಾಡುತ್ತಾರೆ, ಅದನ್ನು ಕೆಲವೇ ಕೆಲವರು ಮಾಡುತ್ತಾರೆ. ಅವರು ನಮಗೆಲ್ಲರಿಗೂ ಉತ್ತಮ ಉದಾಹರಣೆ. ಅವರನ್ನು ನೋಡುವ ಮೂಲಕ ಆಟವಾಡಲು ಪ್ರಾರಂಭಿಸಿದ ಅನೇಕರು ಇದ್ದಾರೆ. ಅವರಿಂದ ಸಾಕಷ್ಟು ಕಲಿತುಕೊಂಡಿದ್ದೇನೆ. ಅವರನ್ನು ನೋಡಿದ, ಹತ್ತಿರದಿಂದ ಕೆಲಸ ಮಾಡಿದ ಮತ್ತು ಅವರೊಂದಿಗೆ ಸಮಯ ಕಳೆದಿದ್ದಕ್ಕೆ ನಾನು ಅದೃಷ್ಟಶಾಲಿ ಎಂದು ಕೌರ್ ಹೇಳಿದರು.

20 ವರ್ಷಗಳ ಕ್ರಿಕೆಟ್ ಬದುಕು

2002 ರಲ್ಲಿ ತನ್ನ ಅಂತರಾಷ್ಟ್ರೀಯ ಚೊಚ್ಚಲ ಪಂದ್ಯವನ್ನು ಆಡಿದ ಜೂಲನ್ 2018 ರಲ್ಲಿ ಟಿ20 ಮಾದರಿ ಕ್ರಿಕೆಟ್‌ನಿಂದ ನಿವೃತ್ತರಾದರು. ಅಕ್ಟೋಬರ್ 2021 ರಲ್ಲಿ ತನ್ನ ಕೊನೆಯ ಟೆಸ್ಟ್ ಅನ್ನು ಆಡಿದರು. ಈಗ ಏಕದಿನ ಮಾದರಿ ಕ್ರಿಕೆಟ್‌ಗೂ ವಿದಾಯ ಹೇಳಲಿದ್ದು, ಅದಕ್ಕೂ ಮುನ್ನ ಇಂಗ್ಲೆಂಡ್‌ನಲ್ಲಿ ಮೂರು ಪಂದ್ಯಗಳ ಸರಣಿಯಲ್ಲಿ ಆಡಲಿದ್ದಾರೆ.

ಈ ವರ್ಷದ ಮಾರ್ಚ್‌ನಲ್ಲಿ ನ್ಯೂಜಿಲೆಂಡ್‌ನಲ್ಲಿ ನಡೆದ ಏಕದಿನ ವಿಶ್ವಕಪ್‌ನಲ್ಲಿ ಭಾರತಕ್ಕಾಗಿ ಕೊನೆಯ ಬಾರಿಗೆ ಆಡಿದ್ದರು. ಒಟ್ಟಾರೆಯಾಗಿ, ಅವರು ಆರು ವಿಶ್ವಕಪ್ ಪಂದ್ಯಗಳು ಸೇರಿದಂತೆ 12 ಟೆಸ್ಟ್, 68 ಟಿ20 ಮತ್ತು 201 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ.