ಕ್ರಿಕೆಟ್ ಇತಿಹಾಸದಲ್ಲಿ ಇದೇ ಮೊದಲು: ವಿಶಿಷ್ಟ ಸಾಧನೆ ಮಾಡಿದ ರಾಸ್ ಟೇಯ್ಲರ್

ನೂರನೇ ಪಂದ್ಯದಲ್ಲಿ ರಾಸ್‌ ಟೇಯ್ಲರ್

ಟೀಮ್ ಇಂಡಿಯಾ ವಿರುದ್ಧ ವೆಲ್ಲಿಂಗ್ಟನ್‌ನ ಬಾಸಿನ್ ರಿವರ್ಸ್ ಕ್ರೀಡಾಂಗಣದಲ್ಲಿ ರಾಸ್ ಟೇಯ್ಲರ್ ಅವರು ಇಂದು ನೂರನೇ ಟೆಸ್ಟ್ ಪಂದ್ಯದಲ್ಲಿ ಕಣಕ್ಕಿಳಿದಿದ್ದಾರೆ. ಈ ಪಂದ್ಯದ ಮೂಲಕ ಕ್ರಿಕೆಟ್‌ನ ಮೂರೂ ಮಾದರಿಯಲ್ಲಿ ರಾಸ್ ಟೇಯ್ಲರ್ ನೂರು ಪಂದ್ಯಗಳಲ್ಲಿ ಪ್ರತಿನಿಧಿಸಿದ ಆಟಗಾರನಾಗಿದ್ದಾರೆ.

ಯಾರೂ ಮಾಡಿಲ್ಲ ಈ ಸಾಧನೆ:

ಒಬ್ಬನೇ ಆಟಗಾರ ಟಿ20, ಏಕದಿನ ಮತ್ತು ಟೆಸ್ಟ್ ಮೂರೂ ಮಾದರಿಯಲ್ಲಿ ನೂರು ಪಂದ್ಯಗಳಲ್ಲಿ ಪ್ರತಿನಿಧಿಸಿದ ದೃಷ್ಟಾಂತ ಇದು ಮೊದಲನೇ ಬಾರಿಯಾಗಿದೆ. ಹೀಗಾಗಿ ಇದೊಂದು ವಿಶಿಷ್ಟ ಮೈಲಿಗಲ್ಲಾಗಿ ಕ್ರಿಕೆಟ್ ಇತಿಹಾಸದಲ್ಲಿ ದಾಖಲಾಗಿದೆ. ರಾಸ್ ಟೇಯ್ಲರ್ ಈ ಮೈಲಿಗಲ್ಲನ್ನು ತಮ್ಮ ಹೆಸರಿನಲ್ಲಿ ಬರೆದುಕೊಂಡಿದ್ದಾರೆ.

ಇತ್ತೀಚೆಗಷ್ಟೇ ಟಿ20ಯಲ್ಲಿ 100ನೇ ಪಂದ್ಯ

ರಾಸ್ ಟೇಯ್ಲರ್ ಇತ್ತೀಚೆಗಷ್ಟೇ ಟಿ20 ಕ್ರಿಕೆಟ್‌ನಲ್ಲಿ ನೂರನೇ ಪಂದ್ಯವನ್ನು ಆಡಿದ ಸಾಧನೆ ಮಾಡಿದ್ದಾರೆ. ಈ ಮೂಲಕ ನೂರು ಅಂತಾರಾಷ್ಟ್ರೀಯ ಟಿ20 ಪಂದ್ಯ ಆಡಿದ ಮೊದಲ ನ್ಯೂಜಿಲೆಂಡ್ ಆಟಗಾರ ಎಂಬ ಸಾಧನೆಯನ್ನು ಮಾಡಿದ್ದರು. ಟೀಮ್ ಇಂಡಿಯಾ ವಿರುದ್ಧದ ಅಂತಿಮ ಟಿ20ಯಲ್ಲಿ ಈ ಸಾಧನೆ ಮಾಡಿದ್ದಾರೆ ರಾಸ್‌ ಟೇಯ್ಲರ್ .

ನ್ಯೂಜಿಲೆಂಡ್ ಪರವಾಗಿ ದಾಖಲೆ

ರಾಸ್‌ ಟೇಯ್ಲರ್ 2006ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದು 100 ಟೆಸ್ಟ್, 231 ಏಕದಿನ ಮತ್ತು 100 ಟಿ20 ಪಂದ್ಯಗಳಲ್ಲಿ ಕಣಕ್ಕಿಕಳಿದಿದ್ದಾರೆ. ನ್ಯೂಜಿಲೆಂಡ್ ತಂಡವನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ಪಂದ್ಯಗಳಲ್ಲಿ ಪ್ರತಿನಿಧಿಸಿ ಕೀರ್ತಿಯೂ ರಾಸ್ ಟೇಯ್ಲರ್ ಹೆಸರಿನಲ್ಲಿದೆ.

19 ಶತಕ 33 ಅರ್ಧ ಶತಕ

ಟೆಸ್ಟ್‌ ಕ್ರಿಕೆಟ್‌ನಲ್ಲಿ ರಾಸ್‌ ಟೇಯ್ಲೆರ್ 100 ಪಂದ್ಯಗಳಲ್ಲಿ 19 ಶತಕವನ್ನು ಮತ್ತು 33 ಅರ್ಧ ಶತಕಗಳನ್ನು ದಾಖಲಿಸಿದ ಸಾಧನೆಯನ್ನು ಮಾಡಿದ್ದಾರೆ. ಏಕದಿನದಲ್ಲಿ 21 ಶತಕ ದಾಖಲಿಸಿದ್ದು ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ನ್ಯೂಜಿಲೆಂಡ್ ಪರವಾಗಿ ಅತಿ ಹೆಚ್ಚು ಶತಕವನ್ನು ದಾಖಲಿಸಿದ ಕೀರ್ತಿಯೂ ಟೇಯ್ಲರ್ ಹೆಸರಿನಲ್ಲಿದೆ.