ಗೇಲ್ ಅಬ್ಬರ ವ್ಯರ್ಥಗೊಳಿಸಿದ ರಾಯ್-ರೂಟ್, ಇಂಗ್ಲೆಂಡ್‌ಗೆ ದಾಖಲೆ ಜಯ!

ಗೇಲ್ ಭರ್ಜರಿ ಬ್ಯಾಟಿಂಗ್

ಇನ್ನಿಂಗ್ಸ್ ಆರಂಭಿಸಿದ ವೆಸ್ಟ್ ಇಂಡೀಸ್ ಪರ ಗೇಲ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು. 129 ಎಸೆತಗಳನ್ನು ಎದುರಿಸಿದ ಕ್ರಿಸ್ ಗೇಲ್ 135 ರನ್‌ಗಳನ್ನು ತಂಡದ ಖಾತೆಗೆ ತುಂಬಿದರು. ಶೈ ಹೋಪ್ 64, ಡ್ಯಾರೆನ್ ಬ್ರಾವೋ 40 ರನ್ ಬೆಂಬಲ ದೊರೆತಿದ್ದರಿಂದ ವಿಂಡೀಸ್ 50 ಓವರ್‌ಗೆ 8 ವಿಕೆಟ್ ಕಳೆದು ಭರ್ತಿ 360 ರನ್ ಗಳಿಸಿತು.

ಇಂಗ್ಲೆಂಡ್ ರನ್ ಚೇಸಿಂಗ್ ದಾಖಲೆ

ಏಕದಿನದಲ್ಲಿ 361 ರನ್ ಗುರಿ ತಲುಪೋದು ಸುಲಭವಿಲ್ಲ. ಆದರೆ ಇಂಗ್ಲೆಂಡ್‌ ಪರ ಆರಂಭಿಕ ಆಟಗಾರ ಜೇಸನ್ ರಾಯ್ 85 ಎಸೆತಗಳಿಗೆ 123 ಚಚ್ಚಿದರು. ಜೊತೆಗೆ ಜೋ ರೂಟ್ 102, ಇಯಾನ್ ಮಾರ್ಗನ್ 65 ರನ್ ಸೇರಿಸಿ ತಂಡಕ್ಕೆ ಬಲ ತುಂಬಿದರು. ಇಂಗ್ಲೆಂಡ್ 48.4 ಓವರ್‌ಗೆ 4 ವಿಕೆಟ್ ನಷ್ಟಕ್ಕೆ 364 ರನ್ ಬಾರಿಸಿ ಗೆಲುವನ್ನಾಚರಿಸಿತು.

ಸ್ಟೋಕ್ಸ್, ರಶೀದ್ ಉತ್ತಮ ಬೌಲಿಂಗ್

ಏಕದಿನ ಆರಂಭಿಕ ಸರಣಿಯಲ್ಲಿ ಇಂಗ್ಲೆಂಡ್‌ಗೆ ಗೆಲುವು ತಂದೀಯುವಲ್ಲಿ ಬೌಲರ್‌ಗಳಾದ ಬೆನ್ ಸ್ಟೋಕ್ಸ್ ಮತ್ತು ಆದಿಲ್ ರಶೀದ್ ಪ್ರಮುಖರೆನಿಸಿದರು. ಇಬ್ಬರೂ ತಲಾ 3 ವಿಕೆಟ್ ಪಡೆದರು. ವಿಂಡೀಸ್ ದೈತ್ಯ ಗೇಲ್, ಶೈ ಹೋಪ್ ವಿಕೆಟ್ ಸ್ಟೋಕ್ಸ್ ಪಡೆದರೆ, ಬ್ರಾವೋ ವಿಕೆಟನ್ನು ರಶೀದ್ ಮುರಿದು ವಿಂಡೀಸ್ ರನ್ ಕದಿಯುವಿಕೆಗೆ ಬ್ರೇಕ್ ಒಡ್ಡಿದ್ದರು.

ರಾಯ್ ಪಂದ್ಯಶ್ರೇಷ್ಠ

ಇಂಗ್ಲೆಂಡ್‌ಗೆ ಶತಕದ ನೆರವು ನೀಡಿದ ಆರಂಭಿಕ ಆಟಗಾರ ಜೇಸನ್ ರಾಯ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದುಕೊಂಡರು. ಮೂರು ಪಂದ್ಯಗಳ ಟೆಸ್ಟ್ ಸರಣಿಯನ್ನು ವಿಂಡೀಸ್ 2-1ರಿಂದ ಜಯಿಸಿದೆ. ಐದು ಪಂದ್ಯಗಳ ಏಕದಿನದಲ್ಲಿ ಇಂಗ್ಲೆಂಡ್ 1-0ಯ ಮುನ್ನಡೆಯಲ್ಲಿದೆ. ದ್ವಿತೀಯ ಏಕದಿನ ಪಂದ್ಯ ಫೆಬ್ರವರಿ 22ರಂದು ನಡೆಯಲಿದೆ.