SA20: ಟಿ20 ವಿಶ್ವಕಪ್‌ನಲ್ಲಿ ಕೊಹ್ಲಿ ಹೊಡೆದ ರೀತಿ ಸಿಕ್ಸ್ ಬಾರಿಸಿದ ಆರ್​ಸಿಬಿ ಬ್ಯಾಟರ್ ವಿಲ್ ಜ್ಯಾಕ್ಸ್!

ಸವಾಲಿನ ಮೊತ್ತ ಗಳಿಸಿದ ಕ್ಯಾಪಿಟಲ್ಸ್

ಮೊದಲು ಬ್ಯಾಟಿಂಗ್ ಮಾಡಿದ ಪ್ರಿಟೋರಿಯಾ ಕ್ಯಾಪಿಟಲ್ಸ್ ವಿಲ್‌ ಜ್ಯಾಕ್ಸ್ ಸ್ಫೋಟಕ ಇನ್ನಿಂಗ್ಸ್ ನೆರವಿನಿಂದ 20 ಓವರ್ ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 182 ರನ್ ಕಲೆಹಾಕಿತು. ಕುಶಾಲ್ ಮೆಂಡಿಸ್ 29, ಬ್ರುಯ್ನೆ 36, ಜೇಮ್ಸ್ ನೀಶಮ್ 22 ರನ್ ಗಳಿಸಿದರು.

ಎಂಐ ಕೇಪ್‌ಟೌನ್ ಪರವಾಗಿ ರಶೀದ್ ಖಾನ್ ಮತ್ತು ಜೋಫ್ರಾ ಆರ್ಚರ್ ತಲಾ 3 ವಿಕೆಟ್ ಪಡೆದರೆ, ಒಡಿಯನ್ ಸ್ಮಿತ್ 2 ವಿಕೆಟ್ ಪಡೆದು, ಪ್ರಿಟೋರಿಯಾ ಕ್ಯಾಪಿಟಲ್ಸ್‌ಗೆ ಕಡಿವಾಣ ಹಾಕಿದರು.

ಗೆದ್ದು ಬೀಗಿದ ಪ್ರಿಟೋರಿಯಾ ಕ್ಯಾಪಿಟಲ್ಸ್

ಸವಾಲಿನ ಮೊತ್ತವನ್ನು ಬೆನ್ನತ್ತಿದ ಎಂಐ ಕೇಪ್‌ಟೌನ್ ಪ್ರಿಟೋರಿಯಾ ಕ್ಯಾಪಿಟಲ್ಸ್ ದಾಳಿಗೆ ಸಿಕ್ಕಿ ನಲುಗಿತು. 18.1 ಓವರ್ ಗಳಲ್ಲಿ 130 ರನ್‌ಗಳಿಗೆ ಆಲೌಟ್ ಆಗುವ ಮೂಲಕ 52 ರನ್‌ಗಳಿಂದ ಸೋಲೊಪ್ಪಿಕೊಂಡಿತು.

ವೇಯ್ನ್ ಪಾರ್ನೆಲ್ ಮತ್ತು ಅನ್ರಿಚ್ ನೋಕಿಯಾ ತಲಾ 3 ವಿಕೆಟ್ ಪಡೆದು ಎಂಐ ಕೇಪ್‌ಟೌನ್‌ಗೆ ಆಘಾತ ನೀಡಿದರು. ಆದಿಲ್ ರಶೀದ್ 2 ವಿಕೆಟ್ ಪಡೆದರೆ, ಬ್ಯಾಟಿಂಗ್‌ನಲ್ಲಿ ಮಿಂಚಿದ ವಿಲ್‌ ಜ್ಯಾಕ್ಸ್ ಕೂಡ ಒಂದು ವಿಕೆಟ್ ಪಡೆದರು. ಅತ್ಯುತ್ತಮ ಪ್ರದರ್ಶನ ನೀಡಿದ ವಿಲ್‌ ಜ್ಯಾಕ್ಸ್ ಪಂದ್ಯದ ಆಟಗಾರ ಪ್ರಶಸ್ತಿಯನ್ನು ಪಡೆದುಕೊಂಡರು.

ಹೆಚ್ಚು ರನ್ ಗಳಿಸಿದವರಲ್ಲಿ ಅಗ್ರಸ್ಥಾನ

ವಿಲ್ ಜ್ಯಾಕ್ಸ್ ಎಸ್‌ಎ20 ಟೂರ್ನಿ ಆರಂಭವಾದಾಗಿನಿಂದಲೂ ಅತ್ಯುತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಬ್ಯಾಟಿಂಗ್, ಫೀಲ್ಡಿಂಗ್, ಬೌಲಿಂಗ್ ವಿಭಾಗಗಳಲ್ಲಿ ಅವರ ಪ್ರದರ್ಶನ ಅದ್ಭುತವಾಗಿದೆ. ಇದುವರೆಗೂ 7 ಪಂದ್ಯಗಳನ್ನಾಡಿರುವ ಅವರು 38.57 ಸರಾಸರಿ 201.49 ಅತ್ಯುತ್ತಮ ಸ್ಟ್ರೈಕ್‌ರೇಟ್‌ನಲ್ಲಿ 270 ರನ್ ಗಳಿಸಿದ್ದಾರೆ. ಮೂರು ಅರ್ಧಶತಕಗಳನ್ನು ಗಳಿಸಿರುವ ವಿಲ್‌ ಜ್ಯಾಕ್ಸ್ ಎಸ್‌ಎ 20 ಟೂರ್ನಿಯಕಲ್ಲಿ ಹೆಚ್ಚು ರನ್‌ ಗಳಿಸಿದವರ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ.

ಇಂಗ್ಲೆಂಡ್‌ನ ಸ್ಫೋಟಕ ಆಲ್‌ರೌಂಡರ್ ವಿಲ್‌ ಜ್ಯಾಕ್ಸ್‌ರನ್ನು ಆರ್​ಸಿಬಿ 2023ರ ಐಪಿಲ್ ಮಿನಿ ಹರಾಜಿನಲ್ಲಿ 3.2 ಕೋಟಿ ರುಪಾಯಿ ನೀಡಿ ಖರೀದಿ ಮಾಡಿದೆ. ಸದ್ಯ ವಿಲ್‌ ಜ್ಯಾಕ್ಸ್‌ರ ಅಬ್ಬರವನ್ನು ಕಂಡಿರುವ ಅಭಿಮಾನಿಗಳು ಸಖತ್ ಖುಷಿಯಾಗಿದ್ದಾರೆ. ಈಗ ನೀಡುತ್ತಿರುವ ಪ್ರದರ್ಶನವನ್ನೇ ಐಪಿಎಲ್‌ನಲ್ಲಿ ಮುಂದುವರೆಸಿದರೆ ಆರ್​ಸಿಬಿ ಬ್ಯಾಟಿಂಗ್‌ ಮಾರಕವಾಗಲಿದೆ ಎನ್ನುತ್ತಿದ್ದಾರೆ.