ಸಚಿನ್ ಸ್ಥಾಪಿಸಲಿದ್ದಾರೆ 'ತೆಂಡೂಲ್ಕರ್ ಮಿಡ್ಲ್​ಸೆಕ್ಸ್ ಗ್ಲೋಬಲ್ ಅಕಾಡೆಮಿ'

ಮುಂಬೈ, ಜುಲೈ 20: ಕ್ರಿಕೆಟ್ ವೃತ್ತಿ ಜೀವನಕ್ಕೆ ವಿದಾಯ ಹೇಳುವ 5 ವರ್ಷಕ್ಕೂ ಮೊದಲೇ ಸಚಿನ್ ತನ್ನದೊಂದು ಕ್ರಿಕೆಟ್ ಅಕಾಡೆಮಿ ಸ್ಥಾಪಿಸುವ ಕನಸು ಕಂಡಿದ್ದರು. ಅದರೆ ಸಚಿನ್ ಕನಸು ಈಗ ಈಡೇರುವುದರಲ್ಲಿದೆ. 'ತೆಂಡೂಲ್ಕರ್ ಮಿಡ್ಲ್​ಸೆಕ್ಸ್ ಗ್ಲೋಬಲ್ ಅಕಾಡೆಮಿ' (ಟಿಎಂಜಿಎ) ಹೆಸರಿನ ಒಂದು ಕ್ರಿಕೆಟ್ ಅಕಾಡೆಮಿಯನ್ನು ಸ್ಥಾಪಿಸುವುದಾಗಿ ಸಚಿನ್ ತಿಳಿಸಿದ್ದಾರೆ.

ಇಂಗ್ಲೆಂಡ್​ನ ಮಿಡ್ಲ್​ಸೆಕ್ಸ್ ಕೌಂಟಿ ಟೀಮ್ ಜತೆಸೇರಿ ಸಚಿನ್, ಟಿಎಂಜಿಎ ಆರಂಭಿಸುವುದರಲ್ಲಿದ್ದು, 9 ರಿಂದ 14ರ ಹರೆಯದ ಬಾಲಕ-ಬಾಲಕಿಯರಿಗೆ ಅಕಾಡೆಮಿಯಲ್ಲಿ ಸ್ವತಃ ತೆಂಡುಲ್ಕರ್ ಮಾರ್ಗದರ್ಶನ ನೀಡಲಿದ್ದಾರೆ. ಇದಕ್ಕೆ ಇಂಗ್ಲೆಂಡ್ ನ ಮಿಡ್ಲ್​ಸೆಕ್ಸ್ ಕ್ರಿಕೆಟ್ ಕ್ಲಬ್ ಕೈಜೋಡಿಸಲಿದೆ.

ಲಂಡನ್ ನ ನಾರ್ತ್ ವುಡ್ ನಲ್ಲಿರುವ ಮರ್ಚೆಂಟ್ ಟೇಲರ್ ಶಾಲೆಯಲ್ಲಿ ತೆಂಡೂಲ್ಕರ್ ಮಿಡ್ಲ್ ಸೆಕ್ಸ್ ಗ್ಲೋಬಲ್ ಅಕಾಡೆಮಿಯ ಮೊದಲ ಕ್ಯಾಂಪ್ ಆಗಸ್ಟ್ 6-9ರ ವರೆಗೆ ನಡೆಯಲಿದೆ. ಮುಂಬೈಯಲ್ಲಿ ನವೆಂಬರ್ ತಿಂಗಳಿನಿಂದ ಕ್ಯಾಂಪ್ ನಡೆಯಲಿದೆ.

ಈ ಬಗ್ಗೆ ಮಾತನಾಡುತ್ತ ಸಚಿನ್, ' ಇಂಥದ್ದೊಂದು ಅಕಾಡೆಮಿ ಸ್ಥಾಪಿಸುವ ಬಗ್ಗೆ ಸಾಕಷ್ಟು ಮಂದಿ ನನ್ನಲ್ಲಿ ತಿಳಿಸಿದ್ದರು. ಆದರೆ ನನಗೆ ಅವರೇನು ಬಯಸುತ್ತಿದ್ದಾರೆ ಅನ್ನೋದು ನನಗರ್ಥವಾಗಿರಲಿಲ್ಲ. ಯುವಕರನ್ನೇ ಬೆಂಬಲಿಸುತ್ತಿದ್ದರೆ ಬದಲಾವಣೆ ತರಲು ಸಾಧ್ಯವಿಲ್ಲ. ಬದಲಿಗೆ ಎಳವೆಯಿಂದಲೇ ಕ್ರೀಡಾ ಪ್ರತಿಭೆಗೆ ಪ್ರೋತ್ಸಾಹ ದೊರೆತರೆ ಇನ್ನೂ ಉತ್ತಮ. ಆ ನೆಲೆಯಲ್ಲಿಯೆ ಈ ಅಕಾಡೆಮಿ ಪ್ರಾರಂಭವಾಗುತ್ತಿದೆ' ಎಂದು ಸಚಿನ್ ತಿಳಿಸಿದರು.