2024ರ ಟಿ20 ವಿಶ್ವಕಪ್‌ನಲ್ಲಿ ಪಾಕಿಸ್ತಾನದ ಹಿನ್ನಡೆಗೆ ಇದೇ ದೊಡ್ಡ ಕಾರಣ; ಸಹ ಕ್ರಿಕೆಟಿಗನಿಂದಲೇ ಟೀಕೆ

2024ರ ಐಸಿಸಿ ಟಿ20 ವಿಶ್ವಕಪ್‌ ಪಂದ್ಯಾವಳಿಯಲ್ಲಿ ಪಾಕಿಸ್ತಾನ ಕ್ರಿಕೆಟ್ ತಂಡದ ಕಳಪೆ ಪ್ರದರ್ಶನವು ಮಾಜಿ ಕ್ರಿಕೆಟಗರಿಂದ ಭಾರೀ ಟೀಕೆಗಳನ್ನು ಎದುರಿಸುತ್ತಿದೆ. ಯುಎಸ್ಎ ತಂಡ ಸೂಪರ್‌ 8ರ ಹಂತಕ್ಕೆ ಪ್ರವೇಶ ಪಡೆದ ಕಾರಣ, ಲೀಗ್ ಹಂತದಿಂದಲೇ ಪಾಕಿಸ್ತಾನ ತಂಡ ಹೊರಬಿದ್ದಿದೆ.

ಇದೇ ವೇಳೆ ಹಿರಿಯ ಕ್ರಿಕೆಟಿಗ ಅಹ್ಮದ್ ಶೆಹಜಾದ್ ಅವರು ಬಾಬರ್ ಅಜಂ ಅವರನ್ನು ನಾಯಕನಾಗಿ ಮರುನೇಮಕಗೊಳಿಸುವ ಪಿಸಿಬಿ ನಿರ್ಧಾರವನ್ನು ಕಟುವಾಗಿ ಟೀಕಿಸಿದ್ದಾರೆ.

ಎ ಗುಂಪಿನಲ್ಲಿ ಸ್ಥಾನ ಪಡೆದಿದ್ದ ಪಾಕಿಸ್ತಾನ ತಂಡ ಕೆನಡಾ ವಿರುದ್ಧ ಏಳು ವಿಕೆಟ್‌ಗಳ ಗೆಲುವು ಸಾಧಿಸುವ ಮೊದಲು, ಯುಎಸ್‌ಎ ಮತ್ತು ಭಾರತ ವಿರುದ್ಧ ತನ್ನ ಮೊದಲ ಎರಡು ಪಂದ್ಯಗಳನ್ನು ಸೋತಿತ್ತು. ಇದು ಸೂಪರ್ 8ರ ಹಂತಕ್ಕೆ ಮುನ್ನಡೆಯುವ ಭರವಸೆಯನ್ನು ಛಿದ್ರಗೊಳಿಸಿತು.

ಕಳೆದ ವರ್ಷ ಏಕದಿನ ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ತಂಡದ ನಿರಾಶಾದಾಯಕ ಅಭಿಯಾನದ ನಂತರ, ಬಾಬರ್ ಅಜಂ ಎಲ್ಲಾ ಸ್ವರೂಪಗಳ ನಾಯಕತ್ವದಿಂದ ಕೆಳಗಿಳಿದಿದ್ದರು.

ಆದರೆ, ಈ ವರ್ಷದ ಆರಂಭದಲ್ಲಿ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಶಾಹೀನ್ ಶಾ ಆಫ್ರಿದಿ ಬದಲಿಗೆ ಬಾಬರ್ ಅಜಂರನ್ನು ವೈಟ್-ಬಾಲ್ ನಾಯಕನಾಗಿ ಮರು ನೇಮಕ ಮಾಡಲಾಯಿತು. ಈ ಕ್ರಮವು ಪಿಸಿಬಿ ಮುಖ್ಯಸ್ಥ ಮೊಹ್ಸಿನ್ ನಖ್ವಿಯವರ "ಕೆಟ್ಟ ನಿರ್ಧಾರ' ಎಂದು ಅಹ್ಮದ್ ಶೆಹಜಾದ್ ಲೇಬಲ್ ಮಾಡಿದ್ದಾರೆ.

"ಬಾಬರ್ ಅಜಂ ಅವರನ್ನು ಮತ್ತೆ ನಾಯಕನನ್ನಾಗಿ ಮಾಡಿರುವುದು ಪಿಸಿಬಿ ಅಧ್ಯಕ್ಷರ ಕೆಟ್ಟ ನಿರ್ಧಾರವಾಗಿದೆ. ಏಕೆಂದರೆ ಅವರು ಈಗಾಗಲೇ ಪ್ರಯತ್ನಿಸಿದ ಮತ್ತು ಪರೀಕ್ಷಿಸಲ್ಪಟ್ಟ ನಾಯಕರಾಗಿದ್ದರು. ಆಯ್ಕೆ ಸಮಿತಿ ಮುಖ್ಯಸ್ಥ ವಹಾಬ್ ರಿಯಾಜ್ ಕೂಡ ವೃತ್ತಿಪರವಲ್ಲದ ವಿಷಯಗಳನ್ನು ನಿಭಾಯಿಸಿದ್ದಾರೆ," ಎಂದು ಅಹ್ಮದ್ ಶೆಹಜಾದ್ ಜಿಯೋ ನ್ಯೂಸ್‌ಗೆ ತಿಳಿಸಿದರು.

ತಂಡದಲ್ಲಿ ಗುಂಪುಗಾರಿಕೆ, ನಾಯಕತ್ವದ ಕೊರತೆ ಹಿನ್ನಡೆಗೆ ಕಾರಣ

ಮಾಜಿ ಆರಂಭಿಕ ಅಹ್ಮದ್ ಶೆಹಜಾದ್ ಅವರ ಟೀಕೆ ಕೇವಲ ನಾಯಕತ್ವದ ನಿರ್ಧಾರವನ್ನು ಮೀರಿದೆ. ಬಾಬರ್ ಅಜಂ, ಮೊಹಮ್ಮದ್ ರಿಜ್ವಾನ್, ಶಾಹೀನ್ ಅಫ್ರಿದಿ, ಫಖರ್ ಜಮಾನ್ ಮತ್ತು ಹ್ಯಾರಿಸ್ ರೌಫ್ ಅವರಿಗೆ ಅರ್ಹತೆಗಿಂತ ಹೆಚ್ಚಿನ ಅವಕಾಶಗಳನ್ನು ನೀಡಲಾಗಿದೆ ಎಂದು ಆರೋಪಿಸಿದರು.

ಪಾಕಿಸ್ತಾನ ಕ್ರಿಕೆಟ್ ತಂಡದೊಳಗಿನ ನಾಯಕತ್ವದ ಕೊರತೆ ಮತ್ತು ಗುಂಪುಗಾರಿಕೆಯೇ ಪಾಕಿಸ್ತಾನ ತಂಡದ ಅವನತಿಗೆ ಕಾರಣವಾಗಿದೆ ಎಂದು ಅಹ್ಮದ್ ಶೆಹಜಾದ್ ಅಭಿಪ್ರಾಯಪಟ್ಟಿದ್ದಾರೆ.

"ಕಳೆದ ನಾಲ್ಕು ವರ್ಷಗಳಿಂದ ನೀವು ಪಾಕಿಸ್ತಾನ ತಂಡದ ಕ್ರಿಕೆಟ್ ಆಟವನ್ನು ನೋಡಿದರೆ, ಬಾಬರ್ ಅಜಂ, ಮೊಹಮ್ಮದ್ ರಿಜ್ವಾನ್, ಶಾಹೀನ್ ಅಫ್ರಿದಿ, ಫಖರ್ ಜಮಾನ್ ಮತ್ತು ಹ್ಯಾರಿಸ್ ರೌಫ್ ನಿರಂತರವಾಗಿ ಆಡುತ್ತಿದ್ದಾರೆ. ಬಹಳಷ್ಟು ಕಲಿಯಬೇಕಾದುದಕ್ಕಿಂತ ಹೆಚ್ಚಿನ ಸಮಯವನ್ನು ಅವರು ಪಡೆದಿದ್ದಾರೆ. ತಂಡದಲ್ಲಿ ಗುಂಪುಗಳಿವೆ ಮತ್ತು ನಾಯಕತ್ವದ ಕೊರತೆಯು ಗೋಚರಿಸುತ್ತದೆ," ಎಂದು ಅಹ್ಮದ್ ಶೆಹಜಾದ್ ಟೀಕಿಸಿದರು.

ಕೆನಡಾ ವಿರುದ್ಧದ ಪಂದ್ಯದಲ್ಲಿ ಪಾಕಿಸ್ತಾನ ತಂಡದ ನೆಟ್ ರನ್ ರೇಟ್ ಸುಧಾರಿಸಲು ಗಮನ ನೀಡದೆ, ಬಾಬರ್ ಅಜಂ ಮತ್ತು ಮೊಹಮ್ಮದ್ ರಿಜ್ವಾನ್ ವೈಯಕ್ತಿಕ ಮೈಲಿಗಲ್ಲುಗಳಿಗೆ ಆದ್ಯತೆ ನೀಡಿದ್ದಕ್ಕಾಗಿ ಅಹ್ಮದ್ ಶೆಹಜಾದ್ ಕಿಡಿಕಾರಿದರು.

ಟಿ20 ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ತಂಡದ ಅಗತ್ಯಗಳ ಮೇಲೆ ಕೇಂದ್ರೀಕರಿಸುವ ಬದಲು, ವೈಯಕ್ತಿಕ ದಾಖಲೆಗಳಿಗಾಗಿ ಆಡುತ್ತಿದ್ದಾರೆ ಎಂದು ಆರೋಪಿಸಿದರು, ಇದು ರಾಷ್ಟ್ರದ ಕ್ರಿಕೆಟ್‌ಗೆ ಹಾನಿ ಮಾಡಿದೆ ಎಂದು ಅಹ್ಮದ್ ಶೆಹಜಾದ್ ಹೇಳಿದರು.

ಭಾನುವಾರ, ಜೂನ್ 16ರಂದು ಐರ್ಲೆಂಡ್ ವಿರುದ್ಧ ಪಾಕಿಸ್ತಾನ ತಂಡ ತನ್ನ ಅಂತಿಮ ಗುಂಪು ಪಂದ್ಯಕ್ಕೆ ತಯಾರಿ ನಡೆಸುತ್ತಿದೆ. ಪಾಕಿಸ್ತಾನ ಪ್ರಸ್ತುತ ಎರಡು ಅಂಕಗಳು ಮತ್ತು +0.191ರ ನೆಟ್ ರನ್ ರೇಟ್‌ನೊಂದಿಗೆ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ.

ಅಮೆರಿಕ ಮತ್ತು ಭಾರತ ತಂಡಗಳು ಈಗಾಗಲೇ ಸೂಪರ್ 8ರ ಹಂತಕ್ಕೆ ಅರ್ಹತೆ ಪಡೆದಿದ್ದು, ಪಾಕಿಸ್ತಾನ ತಂಡ ತಮ್ಮ ಹೆಮ್ಮೆಗಾಗಿ ಲೀಗ್‌ನ ಕೊನೆಯ ಪಂದ್ಯವನ್ನು ಆಡಬೇಕಾಗಿದೆ.