ಶಿವನಾರಾಯಣ್ ಚಂದ್ರಪಾಲ್ ಸೇರಿ ಮೂವರು ಲೆಜೆಂಡ್‌ಗಳು ಐಸಿಸಿ ಹಾಲ್ ಆಫ್ ಫೇಮ್‌ಗೆ ಸೇರ್ಪಡೆ

ಪಾಕಿಸ್ತಾನದ ಮಾಜಿ ಸ್ಪಿನ್ನರ್ ಅಬ್ದುಲ್ ಖಾದಿರ್, ವೆಸ್ಟ್ ಇಂಡೀಸ್ ಬ್ಯಾಟಿಂಗ್ ದಂತಕಥೆ ಶಿವನಾರಾಯಣ್ ಚಂದ್ರಪಾಲ್ ಮತ್ತು ಇಂಗ್ಲೆಂಡ್‌ನ ಹೆಚ್ಚಿನ ಬಾರಿ ಮಹಿಳಾ ವಿಶ್ವಕಪ್ ವಿಜೇತ ನಾಯಕಿ ಚಾರ್ಲೊಟ್ ಎಡ್ವರ್ಡ್ಸ್ ಐಸಿಸಿ ಹಾಲ್ ಆಫ್ ಫೇಮ್‌ಗೆ ಇತ್ತೀಚಿಗೆ ಸೇರ್ಪಡೆಯಾಗಿದ್ದಾರೆ.

ಅಸ್ತಿತ್ವದಲ್ಲಿರುವ ಹಾಲ್ ಆಫ್ ಫೇಮ್, ಮಾಧ್ಯಮ ಪ್ರತಿನಿಧಿಗಳು ಮತ್ತು FICA ಮತ್ತು ಐಸಿಸಿಯ ಹಿರಿಯ ಕಾರ್ಯನಿರ್ವಾಹಕರನ್ನು ಒಳಗೊಂಡಿರುವ ಮತದಾನ ಪ್ರಕ್ರಿಯೆಯ ನಂತರ ಈ ಮೂವರನ್ನು ಸೇರಿಸಿಕೊಳ್ಳಲಾಗಿದೆ ಎಂದು ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಮಂಗಳವಾರ ತಿಳಿಸಿದೆ.

"ಈ ಸುದ್ದಿಯನ್ನು ಕೇಳುವುದು ಕುಟುಂಬಕ್ಕೆ ಬಹಳ ದೊಡ್ಡ ಗೌರವವಾಗಿದೆ. ನಾವು ಇದನ್ನು ಒಂದು ದೊಡ್ಡ ಸಾಧನೆಯಾಗಿ ನೋಡುತ್ತೇವೆ ಮತ್ತು ನನ್ನ ತಂದೆ ಇಂದಿಗೂ ನಮ್ಮೊಂದಿಗಿದ್ದಿದ್ದರೆ ಅದು ತುಂಬಾ ಹೆಮ್ಮೆಪಡುತ್ತಿದ್ದರು," ಎಂದು ಅಬ್ದುಲ್ ಖಾದಿರ್ ಅವರ ಪುತ್ರ, ಪ್ರಸ್ತುತ ಪಾಕಿಸ್ತಾನ ಅಂತಾರಾಷ್ಟ್ರೀಯ ಆಟಗಾರ ಉಸ್ಮಾನ್ ಖಾದಿರ್ ಹೇಳಿದರು.

ಮಣಿಕಟ್ಟಿನ ಸ್ಪಿನ್ ತಂತ್ರಗಳ ಪ್ರವರ್ತಕ ಎಂದೇ ಖ್ಯಾತಿ ಪಡೆದಿದ್ದ, ಮೂರು ವರ್ಷಗಳ ಹಿಂದೆ ನಿಧನರಾದ ಅಬ್ದುಲ್ ಖಾದಿರ್, 67 ಟೆಸ್ಟ್ ಮತ್ತು 104 ಏಕದಿನ ಪಂದ್ಯಗಳನ್ನು ಆಡಿದ್ದರು ಮತ್ತು ಅವರ 13 ವರ್ಷಗಳ ವೃತ್ತಿಜೀವನದ ಅವಧಿಯಲ್ಲಿ ಕ್ರಮವಾಗಿ 236 ಮತ್ತು 132 ವಿಕೆಟ್‌ಗಳನ್ನು ಪಡೆದರು.

ಅಬ್ದುಲ್ ಖಾದಿರ್ ನಿವೃತ್ತಿಯ ನಂತರ, ಅವರು ದೇಶದ ಸಹ ಆಟಗಾರರಾದ ಮುಷ್ತಾಕ್ ಅಹ್ಮದ್, ಡ್ಯಾನಿಶ್ ಕನೇರಿಯಾ ಮತ್ತು ಶಾಹಿದ್ ಅಫ್ರಿದಿ, ಹಾಗೆಯೇ ಆಸ್ಟ್ರೇಲಿಯಾದ ಶೇನ್ ವಾರ್ನ್ ಮತ್ತು ದಕ್ಷಿಣ ಆಫ್ರಿಕಾದ ಇಮ್ರಾನ್ ತಾಹಿರ್‌ಗೆ ಮಾರ್ಗದರ್ಶನ ನೀಡಿದರು.

ಇನ್ನು ಸಾರ್ವಕಾಲಿಕ ಟೆಸ್ಟ್ ರನ್‌ಗಳ ಪಟ್ಟಿಯಲ್ಲಿ ಎಂಟನೇ ಸ್ಥಾನದಲ್ಲಿರುವ ವೆಸ್ಟ್ ಇಂಡೀಸ್ ಮಾಜಿ ಬ್ಯಾಟರ್ ಶಿವನಾರಾಯಣ್ ಚಂದ್ರಪಾಲ್ ಸತತ ಟೆಸ್ಟ್ ಇನ್ನಿಂಗ್ಸ್‌ನಲ್ಲಿ ಏಳು ಅರ್ಧಶತಕಗಳ ದಾಖಲೆಯನ್ನು ಹೊಂದಿದ್ದಾರೆ.

"ನಾನು ಕುಟುಂಬ, ಸ್ನೇಹಿತರು ಮತ್ತು ಮುಖ್ಯವಾಗಿ ವೆಸ್ಟ್ ಇಂಡೀಸ್ ಕ್ರಿಕೆಟ್ ಅಭಿಮಾನಿಗಳು ಮತ್ತು ನನ್ನ ವೃತ್ತಿಜೀವನದುದ್ದಕ್ಕೂ ನನ್ನನ್ನು ಉತ್ಸಾಹದಿಂದ ಬೆಂಬಲಿಸಿದ ವಿಶ್ವದಾದ್ಯಂತದ ಅಭಿಮಾನಿಗಳೊಂದಿಗೆ ಈ ಕ್ಷಣವನ್ನು ಆನಂದಿಸಲು ಬಯಸುತ್ತೇನೆ," ಎಂದು ಶಿವನಾರಾಯಣ್ ಚಂದ್ರಪಾಲ್ ಹೇಳಿದರು.

ಶಿವನಾರಾಯಣ್ ಚಂದ್ರಪಾಲ್ ಅವರು ವೆಸ್ಟ್ ಇಂಡೀಸ್ ತಂಡದ ಪರವಾಗಿ 164 ಟೆಸ್ಟ್ ಮತ್ತು 268 ಏಕದಿನ ಪಂದ್ಯಗಳನ್ನು ಆಡಿದ್ದಾರೆ.

ಇದೇ ವೇಳೆ, ಎರಡು ದಶಕಗಳ ಕಾಲದ ವೃತ್ತಿಜೀವನದಲ್ಲಿ ಇಂಗ್ಲೆಂಡ್ ಮಹಿಳಾ ತಂಡದ ಮಾಜಿ ನಾಯಕಿ ಚಾರ್ಲೊಟ್ ಎಡ್ವರ್ಡ್ಸ್ 2009ರಲ್ಲಿ ಮಹಿಳಾ ವಿಶ್ವಕಪ್ ಮತ್ತು ಅದೇ ವರ್ಷ ಟಿ20 ವಿಶ್ವಕಪ್ ಗೆದ್ದರು.

"ನಾನು ನನ್ನ ಅಂತಾರಾಷ್ಟ್ರೀಯ ಕ್ರಿಕೆಟ್ ವೃತ್ತಿಜೀವನದ ಪ್ರತಿ ನಿಮಿಷವನ್ನು ಪ್ರೀತಿಸುತ್ತೇನೆ ಮತ್ತು ಐಸಿಸಿ ಹಾಲ್ ಆಫ್ ಫೇಮ್‌ಗೆ ಸೇರ್ಪಡೆಗೊಳ್ಳಲು ನನಗೆ ತುಂಬಾ ಸಂತೋಷವಾಗಿದೆ," ಎಂದು 2016ರಲ್ಲಿ ಏಕದಿನ ಮತ್ತು ಟಿ20 ಪಂದ್ಯಗಳಲ್ಲಿ ಪ್ರಮುಖ ಮಹಿಳಾ ರನ್ ಸ್ಕೋರರ್ ಆಗಿ ನಿವೃತ್ತರಾದ ಚಾರ್ಲೊಟ್ ಎಡ್ವರ್ಡ್ಸ್ ತಿಳಿಸಿದರು.

ಸಿಡ್ನಿಯಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್‌ನಲ್ಲಿ ನ್ಯೂಜಿಲೆಂಡ್ ಮತ್ತು ಪಾಕಿಸ್ತಾನದ ಸೆಮಿಫೈನಲ್ ಪಂದ್ಯದ ಮುಂಚಿತವಾಗಿ ವಿಶೇಷ ಸಮಾರಂಭದಲ್ಲಿ ಎಲ್ಲಾ ಮೂವರು ಹೊಸ ಸೇರ್ಪಡೆಗಳನ್ನು ಗೌರವಿಸಲಾಗುತ್ತದೆ.