ODI ಇನ್ನಿಂಗ್ಸ್‌ನಲ್ಲಿ ಅತಿ ಹೆಚ್ಚು ಬೌಂಡರಿ ದಾಖಲೆ: ಟಾಪ್-5ರಲ್ಲಿ ಭಾರತೀಯರದ್ದೇ ಸಿಂಹಪಾಲು!

ಟಾಪ್-5: ಮಾರ್ಟಿನ್ ಗಪ್ಟಿಲ್

ನ್ಯೂಜಿಲೆಂಡ್ ಬ್ಯಾಟ್ಸ್‌ಮನ್ ಮಾರ್ಟಿನ್ ಗಪ್ಟಿಲ್ ಅತಿ ಹೆಚ್ಚು ಬೌಂಡರಿ ಬಾರಿಸಿದ ಆಟಗಾರರ ಪಟ್ಟಿಯಲ್ಲಿ ಐದನೇ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ವೆಸ್ಟ್ ಇಂಡೀಸ್ ವಿರುದ್ಧದ ಪಂದ್ಯದಲ್ಲಿ 11 ಬೌಂಡರಿ ಬಾರಿಸಿದ್ದ ಮಾರ್ಟಿಮ್ ಗಪ್ಟಿಲ್ 24 ಬೌಂಡರಿಯನ್ನು ಬಾರಿಸಿದ್ದರು. ಈ ಪಂದ್ಯದಲ್ಲಿ ಕೀವಿಸ್ ಬ್ಯಾಟ್ಸ್‌ಮನ್ 237 ರನ್‌ಗಳನ್ನು ಬಾರಿಸಿ ದ್ವಿಶತಕದ ಸಾಧನೆ ಮಾಡಿದವರ ಪಟ್ಟಿಗೂ ಸೇರ್ಪಡೆಗೊಂಡರು.

ಟಾಪ್-4: ಸನತ್ ಜಯಸೂರ್ಯ

ಶ್ರೀಲಂಕಾದ ದಿಗ್ಗಜ ಬ್ಯಾಟ್ಸ್‌ಮನ್ ಸನತ್ ಜಯಸೂರ್ಯ ಈ ಪಟ್ಟಿಯಲ್ಲಿರುವ ನಾಲ್ಕನೇ ಆಟಗಾರ. ನೆದರ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಜಯಸೂರ್ಯ ಈ ಸಾಧನೆಯನ್ನು ಮಾಡಿದ್ದರು. ಜಯಸೂರ್ಯ ಕೂಡ 24 ಬೌಂಡರಿಗಳನ್ನು ಬಾರಿಸಿದ್ದರು. ಈ ಪಂದ್ಯದಲ್ಲಿ ಜಯಸೂರ್ಯ ಕೇವಲ 104 ಎಸೆತಗಳಲ್ಲಿ 157 ರನ್ ಬಾರಿಸಿದ್ದರು.

ಟಾಪ್-3: ವೀರೇಂದ್ರ ಸೆಹ್ವಾಗ್

ಕ್ರಿಕೆಟ್ ಕಂಡ ಸ್ಪೋಟಕ ಆಟಗಾರರಲ್ಲಿ ವೀರೇಂದ್ರ ಸೆಹ್ವಾಗ್ ಕೂಡ ಒಬ್ಬರು. ಮೊದಲ ಎಸತವನ್ನೇ ಬೌಂಡರಿಗೆ ಅಟ್ಟುವುದಕ್ಕೆ ಸೆಹ್ವಾಗ್ ಖ್ಯಾತರಾಗಿದ್ದಾರೆ. ಈ ಪಟ್ಟಿಯಲ್ಲಿ ಸೆಹ್ವಾಗ್ ಮೂರನೇ ಸ್ಥಾನದಲ್ಲಿದ್ದಾರೆ. ವೆಸ್ಟ್ ಇಂಡೀಸ್ ವಿರುದ್ದದ ಪಂದ್ಯದಲ್ಲಿ ಸೆಹ್ವಾಗ್ 25 ಬೌಂಡರಿ ಬಾರಿಸಿದ್ದರು. 7 ಸಿಕ್ಸರ್‌ಗಳನ್ನು ಒಳಗೊಂಡಿದ್ದ ಈ ಇನ್ನಿಂಗ್ಸ್‌ನಲ್ಲಿ ಸೆಹ್ವಾಗ್ 219 ರನ್ ಬಾರಿಸಿ ಏಕದಿನದಲ್ಲಿ ದ್ವಿಶತಕದ ಸಾಧನೆಯನ್ನು ಮಾಡಿದ್ದರು.

ಟಾಪ್-2: ಸಚಿನ್ ತೆಂಡೂಲ್ಕರ್

ಈ ಪಟ್ಟಿಯಲ್ಲಿ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಕೂಡ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ಎರಡನೇ ಸ್ಥಾನದಲ್ಲಿರುವ ಸಚಿನ್ ಕೂಡ 25 ಬೌಂಡರಿಗಳನ್ನು ಬಾರಿಸಿದ್ದಾರೆ. ಈ ಸಾಧನೆಕೂಡ ಸಚಿನ್ ದ್ವಿಶತಕ ಸಿಡಿಸಿದ ಪಂದ್ಯದಲ್ಲೇ ದಾಖಲಾಗಿದೆ. ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ ಬಾರಿಸಿದ ಮೊದಲ ದ್ವಿಶತಕದಲ್ಲಿ ಸಚಿನ್ ಈ ಸಾಧನೆಯನ್ನು ಮಾಡಿದ್ದಾರೆ. ದಕ್ಷಿಣ ಆಫ್ರಿಕಾ ವಿರುದ್ಧ ಈ ಪಂದ್ಯ ನಡೆದಿತ್ತು.

ಟಾಪ್-1: ರೋಹಿತ್ ಶರ್ಮಾ

ಈ ಪಟ್ಟಿಯಲ್ಲಿರುವ ಮತ್ತೋರ್ವ ಭಾರತೀಯ ಬ್ಯಾಟ್ಸ್‌ಮನ್ ರೋಹಿತ್ ಶರ್ಮಾ. ಎಲ್ಲರಿಗಿಂತಲೂ ಹೆಚ್ಚು ಬೌಂಡರಿಯನ್ನು ಬಾರಿಸಿ ಈ ದಾಖಲೆಯನ್ನು ತಮ್ಮ ಹೆಸರಿನಲ್ಲಿ ರೋಹಿತ್ ಶರ್ಮಾ ಬರೆದುಕೊಂಡಿದ್ದಾರೆ. ಏಕದಿನ ಇತಿಹಾಸದಲ್ಲಿ ದಾಖಲಾಗಿರುವ ಸರ್ವಾಧಿಕ 264 ರನ್ ಗಳಿಸಿದ ಸಂದರ್ಭದಲ್ಲಿ ರೋಹಿತ್ ಶರ್ಮಾ ಈ ಸಾಧನೆಯನ್ನು ಮಾಡಿದ್ದಾರೆ. ಅಂದಹಾಗೆ ರೋಹಿತ್ ಶರ್ಮಾ ಈ ಪಂದ್ಯದಲ್ಲಿ ಬಾರಿಸಿದ ಬೌಂಡರಿಗಳ ಸಂಖ್ಯೆ ಬರೊಬ್ಬರಿ 33. ಈ ಪಂದ್ಯದಲ್ಲಿ 9 ಸಿಕ್ಸರ್ ಕೂಡ ಶರ್ಮಾ ಬಾರಿಸಿದ್ದಾರೆ.