ನನ್ನ ಬ್ಯಾಟ್‌ನಲ್ಲಿ AI ಚಿಪ್‌ ಹಾಕಿಕೊಟ್ಟಿದ್ದು ಇವರೇ ಎಂದ ವೈಭವ್: ಬ್ಯಾಟ್ ಪರೀಕ್ಷೆಗೆ ಪಾಕಿಸ್ತಾನಿ ವಿಶ್ಲೇಷಕ ಪಟ್ಟು

ಇಂಡಿಯನ್ ಪ್ರೀಮಿಯರ್ ಲೀಗ್‌ (ಐಪಿಎಲ್‌) ನಡೆಯುತ್ತಿದೆ. ಈ ವೇಳೆ ಸ್ಟಾರ್ ಆಟಗಾರರ ಆಟ ಅಭಿಮಾನಿಗಳಿಗೆ ಮುದ ನೀಡಿದೆ. ಅದ್ರಲ್ಲೂ ರಾಜಸ್ಥಾನ್ ರಾಯಲ್ಸ್ ತಂಡದ 15 ವರ್ಷದ ಯುವ ಬ್ಯಾಟರ್‌ ವೈಭವ್ ಸೂರ್ಯವಂಶಿ ಸಂಚಲನ ಮೂಡಿಸಿದ್ದಾರೆ. ಈ ಆವೃತ್ತಿಯ ಐಪಿಎಲ್‌ನಲ್ಲಿ ತಮ್ಮ ಭರ್ಜರಿ ಪ್ರದರ್ಶನ ನೀಡುತ್ತಿರುವ ವೈಭವ್ ರಾಯಲ್ಸ್ ಗೆಲುವಿನಲ್ಲಿ ಮಿಂಚುತ್ತಿದ್ದಾರೆ. ವೈಭವ್ ಸೂರ್ಯವಂಶಿ ಬ್ಯಾಟಿಂಗ್ ಕಂಡು ಎಲ್ಲರೂ ಹುಬ್ಬೇರಿಸಿದ್ದಾರೆ.

ಇತ್ತೀಚಿಗೆ ವೈಭವ್ ಸೂರ್ಯವಂಶಿ ಪಂಜಾಬ್‌ ಕಿಂಗ್ಸ್‌ ವಿರುದ್ಧ ಬ್ಯಾಟಿಂಗ್ ನಡೆಸಿದರು. ಈ ಪಂದ್ಯದಲ್ಲಿ ತಮ್ಮ ನೈಜ ಆಟವನ್ನು ಆಡಿ ಗಮನ ಸೆಳೆದರು. ಇವರ ಆಕ್ರಮಣಕಾರಿ ಆಟವನ್ನು ಕಂಡು ಇಡೀ ಜಗತ್ತು ಸಲಾಂ ಎಂದಿದೆ. ಈ ನಡುವೆ ವೈಭವ್ ಸೂರ್ಯವಂಶಿ ಅವರ ಒಂದು ವಿಡಿಯೋ ಇನ್‌ಸ್ಟಾಗ್ರಾಮ್‌ನಲ್ಲಿ ಸಾಕಷ್ಟು ವೈರಲ್ ಆಗಿದೆ.

ರಾಜಸ್ಥಾನ್ ರಾಯಲ್ಸ್‌ ತನ್ನ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಒಂದು ವಿಡಿಯೋ ಹಂಚಿಕೊಂಡಿದೆ. ಈ ವಿಡಿಯೋದಲ್ಲಿ ಒಂದು ಪ್ರಶ್ನೆ ಕೇಳಲಾಗುತ್ತದೆ. ನಿಮ್ಮ ಬ್ಯಾಟ್‌ನಲ್ಲಿ ಎಐ (AI) ಚಿಪ್‌ ಇದೆಯಾ ಎಂದು. ಅದಕ್ಕೆ ವೈಭವ್ ಸೂರ್ಯವಂಶಿ, ದೇವರೆ ಅಳವಡಿಸಿ ಕಳೆಸಿದ್ದಾನೆ. ದೇವರು ನನಗೆ ಮೊದಲೇ ಹೇಳಿದ್ದನು ಇದೇ ಬ್ಯಾಟ್ ಬಳಸುವಂತೆ ತಿಳಿಸಿದ್ದಾನೆ ಎಂದು ತಿಳಿಸಿದ್ದಾರೆ. ಈ ವಿಡಿಯೋ ಈಗ ವೈರಲ್ ಆಗುತ್ತಿದೆ.

ವಿಶ್ಲೇಷಕ ಪಟ್ಟು

ಹಮರಿವೆಬ್‌.ಕಾಮ್‌ ಯೂಟ್ಯೂಬ್ ಚಾನೆಲ್‌ಗೆ ಪಾಕಿಸ್ತಾನಿ ಕ್ರಿಕೆಟ್ ತಜ್ಞ ನೌಮನ್ ನಿಯಾಜ್ ಅವರು ವೈಭವ್ ಅವರ ಬ್ಯಾಟ್‌ನಲ್ಲಿ ಚಿಪ್ ಇದೆ ಎಂದು ಆರೋಪಿಸಿದ್ದಾರೆ. ಅಲ್ಲದೆ ಡೋಪಿಂಗ್ ಪರೀಕ್ಷೆಗಳನ್ನು ನಡೆಸುವಂತೆಯೇ, ವೈಭವ್ ಬ್ಯಾಟ್ ಅನ್ನು ಪರೀಕ್ಷೆಗಾಗಿ ಪ್ರಯೋಗಾಲಯಕ್ಕೆ ಕಳುಹಿಸಿ. ಅವನು ಬಹುಶಃ ತನ್ನ ಬ್ಯಾಟ್‌ನಲ್ಲಿ AI ಚಿಪ್ ಅನ್ನು ಬಳಸುತ್ತಾನೆ" ಎಂದು ಆರೋಪಿಸಿದ್ದಾರೆ.

ವೈಭವ್ ಸಾಧನೆ

15 ವರ್ಷದ ಯುವ ಬ್ಯಾಟರ್ ವೈಭವ್ ಸೂರ್ಯವಂಶಿ 19ನೇ ಆವೃತ್ತಿ ಐಪಿಎಲ್‌ನಲ್ಲಿ ಕಮಾಲ್ ಮಾಡಿದ್ದಾರೆ. ಎರಡನೇ ಆವೃತ್ತಿಯ ಐಪಿಎಲ್ ಆಡುತ್ತಿರುವ ವೈಭವ್ ತಮ್ಮ ಅಬ್ಬರ ಮುಂದುವರೆಸಿದ್ದಾರೆ. ತಾವಾಡಿದ ಮೊದಲ ಐಪಿಎಲ್‌ ಆವೃತ್ತಿಯಲ್ಲಿ 35 ಎಸೆತಗಳಲ್ಲಿ ಶತಕ ಬಾರಿಸಿದ್ದ ವೈಭವ್, ಈ ಬಾರಿ 36 ಎಸೆತಗಳಲ್ಲಿ ಶತಕ ಸಿಡಿಸಿದ್ದಾರೆ. ಸದ್ಯ ವೈಭವ್ ಆರೆಂಜ್ ಕ್ಯಾಪ್ ರೇಸ್‌ನಲ್ಲಿದ್ದಾರೆ. ಇವರು ಆಡಿದ 9 ಪಂದ್ಯಗಳಲ್ಲಿ 44ರ ಸರಾಸರಿಯಲ್ಲಿ 400 ರನ್‌ ಕಲೆ ಹಾಕಿದ್ದಾರೆ. ಇದರಲ್ಲಿ 1 ಶತಕ, 2 ಅರ್ಧಶತಕಗಳು ಸೇರಿವೆ. ಈ ವೇಳೆ ಇವರ ಬ್ಯಾಟ್‌ನಿಂದ 34 ಸಿಕ್ಸರ್‌, 37 ಬೌಂಡರಿಗಳು ಹರಿದು ಬಂದಿವೆ.

ಕಳೆದ ಬಾರಿಯ ಐಪಿಎಲ್‌ನಲ್ಲಿ ವೈಭವ್ ಸೂರ್ಯವಂಶಿ ಅಮೋಘ ಪ್ರದರ್ಶನ ನೀಡಿದ್ದರಿಂದ ಇವರಿಗೆ ಅಂಡರ್ 19 ವಿಶ್ವಕಪ್‌ನಲ್ಲಿ ಆಡುವ ಅವಕಾಶ ಲಭಿಸಿತು. ಈ ಮೆಗಾ ಟೂರ್ನಿಯಲ್ಲೂ ಸ್ಥಿರ ಪ್ರದರ್ಶನ ನೀಡಿ ಸರಣಿ ಶ್ರೇಷ್ಠ ಪ್ರಶಸ್ತಿಯನ್ನು ಪಡೆದಿದ್ದಾರೆ.